كريم سامي مغاوري: نفسي أمثل مع عادل إمام ويحيي الفخراني ويسرا
إعداد / نهى مرسي وحوار / سعيد المسلماني
كريم سامي مغاوري، ممثل مصري، حاصل على بكالوريوس المعهد العالي للفنون المسرحية بالتمثيل والإخراج عام 2007. وهو نجل الفنان القدير سامي مغاوري، شاب خفيف الظل. طموح، ناجح، مقبل علي الحياة، يتمتع بشعبية كبيرة، يدخل القلب دون أستأذن. دخل مجال التمثيل عن طريق الصدفة، من خلال مسرحية “تكسب يا خيشة”، عام 1994،
وفي حوار خاص مع الفنان كريم سامي مغاوري كان هذا اللقاء مع عالم النجوم :
الجزء الرابع:
ما هي أحب الأعمال إلى قلبك ؟
أغلب الأعمال إللي أنا اشتغلت فيها بحبها وسببتلي في رد فعل كويس جدًا مع الجمهور ونقلة مختلفة في حياتي.. لو اتكلمنا عن (إوعى وشك) أو اتكلمنا عن (على جنب يسطى) أو (أحلامك أوامر) أو (ستات قادرة) أو (مش فريندز) أو (حديد) أو ( راجل وست ستات ) (جوز ماما ) يعني أعمال كتير جدا حتى القديمة إللي أنا بدأت بيها حياتي الناس فاكراها لحد النهاردة .. فكل حاجة فيهم أنا بعتز إن أنا اشتغلت فيها وبحبها .. يعني كل عمل عملته زي طفل من أطفالي يعني مع إني مش متزوج بس بحس إنهم كده.
هل هناك فنانة أو فنان تتمنى العمل معه ؟
في فنانين كتير أنا حابب أشتغل معاهم ؛ أنا نفسي أشتغل طبعا مع الزعيم “عادل إمام” مع الفنان “يحيى الفخراني” والفنانة “يسرا” .. في فنانين كتير وبرضه من جيل الوسط أقدر أقول “كريم عبد العزيز” و”أحمد عز” و”ياسر جلال” و”أحمد مكي” و”أمير كرارة” و”آسر ياسين” .. وفي مخرجين نفسي أشتغل معاهم زي المخرج “تامر محسن” المخرج “محمد يس” المخرج “خالد مرعي” المخرجة “كاملة أبو ذكري”. مش عايز أنسى لأن بالفعل في أسماء كبيرة جدا أنا نفسي أشتغل معاهم.. طبعا المخرج “شريف عرفة” في أسماء كتير جدًا جدًا جدًا نفسي أشتغل معاهم وأخوض معاهم التجربة وإن شاء الله يعني ده يحصل في القريب العاجل.
ما هي أخر أعمال الفنان كريم سامي مغاوري ؟
إحنا أنتهينا من تصوير فيلم (سقراط ونبيلة) بطولة الفنان “أشرف عبد الباقي” والفنانة “دينا” والفنان “أحمد فتحي” والفنان “محمد فهيم” إخراج المخرج “هشام الشافعي”.. أنا عامل فيه دور حلو جدًا ومختلف وجديد عليا .. إن شاء الله الفيلم ده هينزل في الصيف .. ده رابع عمل مع الفنان “أشرف عبد الباقي”.. ودايما الأعمال اللي عملتها مع الفنان “أشرف عبد الباقي” كانت وش الخير عليا ،وكانت نقلة مختلفة في حياتي .. أنا عملت معاه (على جنب يسطى) و(مش ألف ليلة وليلة) و(راجل وست ستات) وكلها أعمال نحط. وبصمت في عقول الناس.. وإن شاء الله الفيلم ده يكون مختلف وبصمة أخرى .. وفي مسلسل (مزاد الشر) إخراج “ممدوح زكي” بطولة الفنانة الكبيرة “هالة فاخر” والفنان “كمال أبو رية” وده هنستعد لتصويره بعد رمضان مباشرة.. وفي عمل آخر تم الإتفاق عليه بس إن شاء الله يعني عالم النجوم هتكون أول جريدة تعرف عنه معلومات أول بس ما أبدأ التصوير إن شاء الله.
