كريم قاسم يوجه رسالة دعم إلى الفنانة ريهام حجاج
كتبت: ثريا الصاوي
نشرت الفنانة ريهام حجاج فيديو عبر حسابها الرسمي بموقع إنستجرام للفنان الشاب كريم قاسم قائلًا: ” مسلسل «يوتيرن» واجه افتراء من بعض الناس، حد يطلع يعمل مونتير ويقولك أنا اشتغلت وهو أصلا مالهوش علاقة بالمسلسل، وواحدة تتكلم على التتر وتقولك أصلها ظلمتني”.
وتابع: “يا جماعة أنتوا بتلغوا مؤسسة كاملة، فيه شركة إنتاج، وفيه مخرج، وفيه ناس تانية بتاخد قرارات، أنا عمال أغني ظلم ظلمات بتاعة التتر بسبب المواقف دي، في إيه يا جماعة، وابتديت أحس إن فيه حاجة ممنهجة، بالذات ضد ريهام”.
وأضاف قاسم: “انا متفهم إن فيه ناس ممكن ما تحبش ممثل، لكن لما جيت أركز شوية، ولما تابعت الكومنتات، لقيت حوالي 70 ٪ منها صفحات فاك عمرها ما نشرت بوستات، وبالمناسبة أنا تاني سنة أشتغل مع ريهام حجاج مشوفتش منها حاجة واحدة وحشة، بل بالعكس وقفت جانبي كتير”.
وأكمل: “أوقات كتير ماكنتش قادر أشتغل سواء السنة دي، أو السنة قبل اللي فاتت أو متضايق من حاجة أو كدة، كانت هي تتدخل وتحل رغم إن ده مش شغلانتها، وفعلا أنا مشوفتش منها حاجة واحدة وحشة”.
واستكمل الفنان كريم قاسم: “أما فيما يتعلق بالأستاذ توفيق، إحنا كلنا اتفاجئنا إنه نزل البوست ده في التوقيت ده، بس أنا برضه مع شغلي معاه مقدر جدا، لأن الظروف اللي بنشتغل فيها أتغيرت، إحنا بنصور يوميا 14 و18 ساعة وأحيانا بنوصل لـ 23 ساعة يوميا، وطبعا أنا مقدر ظروفه الصحية”.
وفي هذا السياق مسلسل “يوتيرن” من بطولة ريهام حجاج، صفاء الطوخي، كريم قاسم، توفيق عبد الحميد، عبير منير، هلا السعيد وعدد آخر من الفنانين، والعمل تأليف أيمن سلامة، من إنتاج جمال العدل، وإخراج سامح عبد العزيز.
