كل ما تكبر … بقلم الشاعر الغنائي: حمادة العسكري

كل ما تكبر

نظرك يضعف بس الرؤيه بتوضح أكتر

وناس غاليين كل مادي العين تشوفهم أصغر

تفوق لروحك وتلقى روحك بتبطل

حب الناس اللي تعطل وبتخسر

كل ما تكبر

تقص صحاب وتقص حبايب وتنقص

ماتغرك لمه مشي الناقص بيرخص

واللي بيمشي على الحبلين ويترقص

ينقطع حبل يقع على رأسه يتكسر

كل ما تكبر

بتقرأ الدنيا أكتر وتفوق من ضياعك 

تتغير طباعك سنه ورا سنه ورا سنه

لما تفوق لروحك مين اللي قال أنانيه

بطلت تبقى ضحية ما بطلتش جدعنه

كل ما تكبر

يقول كلامك يبقى عبارة عن سكات

بتتولد جواك حاجات وتموت حاجات 

وحاجات كنت مستنيها بقى لما جات

مابقتش فرحان بيها أصلها جات متأخر

كل ما تكبر

بتبتسم في عز المواجع والهموم

بتتقسم جرحك مدارية الهدوم 

وقعت ياما ولسه فيك الحيل تقوم

كتر الصدمات قوة قلبك مبقاش يتأثر

كل ما تكبر

بتقرأ الدنيا أكتر وتفوق من ضياعك

تتغير طباعك سنه ورا سنه ورا سنه

لما تفوق لروحك مين اللي قال أنانيه

بطلت تبقى ضحية بس ما بطلتش جدعنه