كنت عارف الفراق جاي .. بقلم / حمادة العسكري 

كنت عارف الفراق جاي عاجلاً
الفراق كان ناقصه بس يتعلن
رغم إن هو كان جارحني كلي
بقول تملي هو أغلى وأولاً

مع السلامه وقته جنبي كان هرج
مش هيدخل تاني بعد أما خرج
لما جاني يقول هيمشي من حياتي
قلبي قالي يااااه أخيرا الفرج

يلا بقى مفيش نصيب متعوضه
سنين معاه كانت عينيا مغمضه
ليه إبتدى بجرح قلبي والآلام
يفيد بإيه بس الكلام والفضفضه

معدش بينا أي إحساس مشترك
خد السنين ومر أيامه ترك
قسوة ردوده بوخت بينا الكلام
من وجوده خدت إيه غير الأرك

كان ودي ينهي بشكل حلو ومحترم
هو ده رد الجمايل والكرم
ناس بترمي من إيديها الشئ قوام
ماتحسهوش غير لما منه تتحرم

يلا بقى مفيش نصيب متعوضه
سنين معاه كانت عينيا مغمضه
ليه إبتدى بجرح قلبي والآلام
يفيد بإيه بس الكلام والفضفضه