محسن صبري في حوار خاص يتحدث عن أعماله الرمضانية وطقوسه

إعداد وحوار / دعاء نصر 

محسن صبري شارك في افلام الخادمة مع النجمة نادية الجندي ومسلسل الطاحونة مع يحيي شاهين “الجزء الأول والثاني” ، ثم أنقطع حوالى عشر سنوات عن التمثيل ثم عاد ليشارك في عدة مسلسلات منها واحة الغروب، الميزان، عفاريت عدلي علام، فارس الرومانسية، ولاد تسعة ودوره الذي أحدث ضجة في مسلسل نصيبي وقسمتي .

عمل أيضا بالإخراج بجانب التمثيل، فقد شارك في إخراج بعض البرامج التليفزيونية وقبلها عمل مساعداً للإخراج في بعض السهرات التليفزيونية .

محسن صبري ما الأجواء الخاصة والطقوس التي تداوم عليها في شهر رمضان الكريم؟

الموضوع صعب دلوقتي بالنسبة لي لان الحقيقة انا حاليا عايش لوحدي زوجتي رجعت تونس والطيران اتحظر بعدها بسبب كورونا ومش عارفة تنزل فمعنديش طقوس رمضانية ، بس من الطقوس اللي انا بداوم عليها في شهر رمضان كل سنة الحقيقة انا ما عنديش طقوس كتيرة أوي لان يعني مشكلة الطقوس دي ان هي مرتبطة بالطفولة شوية

بس انا بحب اشارك في زينة الشارع مع الاطفال اللي بيجوا يلموا حق الزينة و كده و بحب اشارك و بحب اتفرج واقول ملاحظاتي وممكن يجيبه الخيط بتاع الزينة منين ويودوه فين بحب الحكاية دي يعني كمان مسألة المعايدة انا بحب اعيد على أسرتي وعلى أصدقائي المقربين معايدة تليفونية والفانز و على اصدقائي على صفحتي على فيسبوك وبرد عليهم وبرد على كل الناس اللي ردت على المعايدة كده يعني دي من طقوس رمضان التي بحافظ عليها لغايه دلوقت.

ويستكمل الفنان القدير حديثه :

يعني الحقيقة انا كنت بحب جدا جدا وانا طفل أوي ابقى مشارك باللعب بالفانوس بعد الفطار والدنيا ضلمة ونولع الشمعة ونقول حالو يا حالو وانا لما كبرت شوية بقيت بحب اشوف الطقس دي يعني واحب اشوف الاطفال وهم بيعملوا ده والحقيقة لما بشوف دلوقت بقى نادر جدا

يعني بس كان دايما زمان بيفكرنى بيتهوفن في المعزوفة دي ان في مجموعة اطفال فيهم طفل ضرير مش بيشوف القمر وهو بيستخبي وراء السحاب ويظهر وراء السحاب وفرحة الاطفال لما بيظهر وكده هم عملوا القطعة دي خصيصا. للطفل ده علشان يحسوا لحظة ظهور القمر يعني حاجة إنسانية لطيفة وشبيه عندنا بالضبط حالو يا حالو والفانوس والشمعة ونوره في الظلمة في الحقيقة

إيه أكتر أكلة بتحب تاكلها من وانت صغير أول يوم رمضان ؟ واكتر اكلة بالنسبالك بتميز رمضان ؟

احلى أكلة بحبها على مدار عمري هما آكلتين رقم واحد المفضلة وهي البسلة باللحمة انا من وانا طفل بعشقها بيجي بعدها على طول البطاطس المكعبات المطبوخة في الحلة مش الصينية كانت مرات ابويا الحقيقة شاطرة جدا في الاكلتين دول و بعد وفاة والدي لما كنت بروح لها كانت بتعمل لي الاكلتين دول او لو عملتهم كانت لازم تكلمني وتقول لي محسن انا عملتلك بسلة او بطاطس مكعبات دول الاكلات اللي انا بحبها قوي

يعني بالنسبة لرمضان بقى انا بحب جدا المكرونة البشاميل لانها كانت بتفكرني بمكرونة امي الله يرحمها المكرونة كانت رقم واحد في العالم الحقيقة محدش بيعرف يعملها زيها والوحيدة دلوقتي اللي بتعرف تعملها يعني قريب منها شوية اختي نفس الحكاية لو عملت البشاميل لازم تقول لي تعال كل بشاميل او لو انا رايح اقول لها انا جاي اعملي مكرونة بشاميل دي الاكلات اللي بحبها أوي طبعا جنب الرقاق ورق العنب والملوخية الحاجات اللذيذة بتاعتنا دي اللي احنا مشهورين بها .

هنشوف حضرتك في رمضان في أيه ؟

بأذن الله انا عندي السنة دي “وأحب تاني ليه” للنجمة ياسمين عبد العزيز والفنان شريف منير و الفنان كريم فهمي و اتمني ان المسلسل نسبة المشاهدة المأمولة لان الحقيقة فريق العمل المخرج والمؤلف مصطفى فكري والمخرج محمود ياسين المؤلف الأثنين مشهود لهم جدا بالكفاءة في كتابة الدراما وإخراجها التلفزيوني فأتمنى ان السنة دي تكون في كفاءة السنين اللي فاتت ان شاء الله بعد رمضان على طول هنستعد باستكمال

ومسلسل خالد ابن الوليد اللي بدأنا تصويره قبل رمضان لكن متوفقناش الحقيقة فإن احنا اللي نجهزه ونحضره لرمضان في ان شاء الله بعد رمضان مباشرتا هنبتدي فيهم ان شاء الله علشان نلحق رمضان اللي جاي ان شاء الله. وان شاء الله عندي مسرح بعد رمضان مع المخرجة الرائعة مروة رضوان ويارب نبتدي نحضر فيه على طول برضه نلحق في السيزون الرمضاني .

أكتر حاجة في التلفزيون كانت بتحسسك أن رمضان لما بتتفرج عليها ؟ وايه رأيك في اللي بيتقدم في رمضان دلوقتي ؟

يعني بيحصل في رمضان دائما ان انا ببتدي مشاهده قدر المستطاع كل الاعمال اعدي كده من محطة لمحطة و اشوف أجواء المسلسلات عاملة ايه لما احس ان في مسلسلين أو ثلاثة شديني قوي وابتدي اتفرج عليهم و هو ده اللي هيحصل ان شاء الله زي كل سنة يعني و طبعا هتفرج على مسلسلي من الدرجة الاولى يعني اكيد يعني ويا رب اتمنى انه يعجب الناس و يحقق اللي انا نفسي فيه يعني طبعا بحب اسمع صوت النقشبندي والحصري والشيخ رفعت كل القمم بتوع قران الكريم والأدعية الرمضانية انا بحبها جدا جدا بتحسسني بجد إن رمضان جاء يعني ومع نهاية رمضان الاغنية الشهيرة بتاعت لسه بدري يا شهر الصيام أنا ببكي مع الاغنية دي وجدتي كمان كانت بتقعد تبكي لما كانت بتسمعها انا بحب الاغنية دي جدا جدا

محسن صبري تحب تقول أيه لمحبينك وللشعب المصري بمناسبة قدوم شهر رمضان؟

يعني احب اقول لكل اصدقائي و معجبيني وكل شعب مصري في رمضان ربنا يحفظ شعب مصر يا رب الغمة دي تتزاح اتمنى ان الفيروس ما يتفاقمش وتزيد نسبة الشفاء عن نسبة المصابين وبقول لهم كل رمضان وانتم طيبين وبخير ورمضان كريم عليكم ويارب كل مصري ينول نفحة من نفحات رمضان بحق كرمه وخيره اللي احنا ما نقدرش نعيش من غيره .