محمد داوود” فنان الأركت”: أحلامي أعمل معرض كبير خاص لشغلي بحضور الشخصيات المهمة
حوار: أحمد الدخاخني
محمد إبراهيم داوود, فنان تشكيلي شاب من أبناء قرية العراقية بمركز الشهداء بمحافظة المنوفية, ويدرس حالياً في الفرقة الرابعة بكلية الآداب قسم الإعلام شعبة الإذاعة والتلفزيون بجامعة المنوفية, والذي يبلغ من العمر 21 عاماً, حيث يبدع محمد بإتقان في فن حفر وتفريغ الخشب ” فن الاركت” لعمل تصميمات مفرغة وبمقايس محددة تعطي صورة حقيقية تجذب الأنظار, ونجح في تفريغ أخشاب على أشكال شخصيات مشهورة مثل الكابتن محمود الخطيب والفنان كريم عبد العزيز والمطرب تامر حسني.
وفي حوار خاص تواصلت ” عالم النجوم” مع الفنان التشكيلي محمد داوود, للحديث عن بدايته في فن الاركت وعن أحلامه الكبيرة, كما يلي:
في البداية متى اكتشفت موهبتك في الرسم أو النحت على الخشب ؟
الموضوع بدأ معايا صدفة, أنا كنت دخلت كلية آداب عشان أرضي والدتي وماكنتش حابب الكلية وكنت شايف حياتي انتهت لما رسبت في اختبارات الكلية الجوية, فبعد ترم كامل في فرقة أولى صديق طفولتي أسامة جندي قالي تعالى ندخل المرسم نتعلم رسم, وكان ده بعد ما والدتي كانت كل يوم تقولي اتعلم حاجة جديده في الكليه وروح نشاط أو روح المكتبة اقرا كتب عشان أكسر الملل, فدخلت مرسم الكلية وكانت الفنانة خلود خالد زميلتنا بتعلم رسم وبدأنا بس أنا متوفقتش في الرسم واتعلمت فن الاركت اليدوي في المرسم ولقيت نفسي فيه وحبيته جدا, ده كان تقريبا الترم التاني ليا في الكلية يعني من سنتين.
ما هي الصعوبات التي تواجهها في مشوارك ؟
أول ما بدأت الصعوبات اللي كانت بتواجهني أن مفيش تقدير لفن الاركت ومش معروف لناس كتير جدا هو إيه أساساً والمعظم فاكر أنه نحت أو رسم وهو مش كده أو كده, في الأول كنت بواجه إحباطات كتير جدا هتعمل ايه بفنك ده؟, شوي الخشب الابلاكاش دول هيوصلوك لحاجة؟ وكمية طاقة سلبية متتوصفش لحد ما بدأت أول نجاح ليا ومبقتش أهتم لأي كلام يتقال ومركز في شغلي وبس, والصعوبات حالياً أني بدأت تمثيل في مسرح الكلية وبروڤات طول اليوم, فمطلوب أني أركز في التمثيل والمسرح والكلية والفن اللي بعمله والمعارض ومش هينفع أضيع حاجة علي حساب حاجة لأني بسعي في الكل والنتيجة على ربنا, فالصعوبة الأكبر دلوقتي في الوقت.
كم من الوقت تستغرق في التشكيل ؟
الوقت علي حسب كل حاجة وشغلها يعني مثلاً لو هعمل كلمة فبتكون دقايق, بالنسبة للمجسمات فممكن من يوم لحد ٣ أسابيع, سبونج بوب مثلا يوم, والهيكل حوالى ٣ أسابيع, البورتريه بيختلف على حسب تفاصيل شغله نفسه, فمثلا من ١٠ ساعات لو بوتريه شغله قليل وآخر بورتريه عملته بورتريه الفنان كريم عبد العزيز حوالي ٤٢ ساعة شغل صافي.
هل حصلت على جوائز أو تكريم ؟
حصلت علي مركز أول في الاركت في معارض كلية الآداب بعد إشادة من سيادة العميد الدكتور أسامه مدني عميد كلية الآداب والأستاذ الدكتور عادل مبارك رئيس جامعة المنوفية, ودكتور نانسي أسعد نائب رئيس الجامعة, ودكتور نهى عثمان مستشار اللجنة الفنية بكلية الآداب, وحصلت علي أربع شهادات تقدير وأوسكار ودروع عن مشاركتي في ٣ معارض دولية.
ما هي أحلامك الكبيرة التي تسعى لتحقيقها ؟
أحلامي هي أن أعمل معرض خاص لشغلي ويكون بحضور الشخصيات المهمة ويكون معرض كبير جداً وأكون رسخت اسم كبير ليا في مجال فن الأركت, وأكمل في مجال التمثيل وأبقي ممثل مشهور, كمان أكون مذيع أو إعلامي بحكم أني في إعلام لو ربنا موفقنيش في التمثيل.
