محمد رمضان: فيه فنانين نجحوا فى بلادهم العربية لكن منجحوش فى مصر

استضافت الإعلامية جيهان عبدالله، النجم محمد رمضان، فى حلقة من برنامجها «أجمد 7»، المعروض على إذاعة «نجوم إف إم»، وتحدث رمضان خلال اللقاء عن موضوعات مختلفة تتعلق بمشواره الفنى وأعماله المقبلة والماضية.

وقال رمضان خلال البرنامج: «فيه فنانين نجحوا فى بلادهم العربية لكن منجحوش فى مصر، أنا بدأت فى أصعب مكان موجود فى الوطن العربى، وهو الساحة الغنائية المصرية، وصعب إن أى حد ينجح فى مصر، وممكن أنجح لكن الاستمرار صعب، كمان أبقى فى مكانة كبيرة».

وأضاف: «لما بدأت أقدم حفلات، عملت زى ماجستير فى ما هى الحفلة، واكتشفت إن زمان الحفلة كانت عبارة عن تخت المغنى بيقعد عليه، والجمهور يبقى قاعد قدامه مربع فى قعدة غنائية، والمطرب يقعد يدندن».

وتابع: «بعد كده الموضوع تطور والمغني بقى يقوم يقف، ويقعد على كرسى، ولكن ممنوع يحرك رجله أو راسه، بيبقى زى الخشبة على المسرح، وبعد كده حصل تطور وبقى يهز راسه ويرفع ايده فى أواخر الستينيات، زى ما كنا بنشوف عبدالحليم حافظ، اللى بعشقه وبحب أسمعه».

واستكمل: «بعدين فى منتصف الثمانينيات المغنى بقى يشيل المايك ويتحرك بيه على المسرح، ودا كان غريب على الناس إزاى المغنى يعمل كده».

واستطرد: «بضايق جدا لما حد يقول إن مصر عالم ثالث، لا مصر عالم أول، كل أصحابى اللى فى مصر عالم أول، أنا ليا صحاب إنجليز وفرنسيين وعندى صحاب مصريين أذكى منهم، ومتعلمين وبيتكلموا أحسن منهم، وملمين بكل اللى بيحصل فى العالم».