محمد يسري يوجه رسالة لـ الفنان رشوان توفيق بعد أزمته الأخيرة
كتبت: ثريا الصاوي
وجه الفنان محمد يسري نجل الفنان الراحل إبراهيم يسري، رسالة إلى الفنان القدير رشوان توفيق بعد ما حدث له عن قيام ابنته وحفيده رفع قضايا ضده.
وكتب يسري عبر حسابه الرسمي بموقع “فيس بوك”: “أبويا الله يرحمه لما توفى أنا مكنتش فاهم حاجة خالص، يمكن الناس اللي مرت بالموقف هي اللي هتبقى فاهمة أوي أنا قصدي إيه، بس أنا مكنتش أنا والحقيقة إني مرجعتش أنا، بس وقتها انا مكنتش أنا فعلا، مكنتش مستوعب، مكنتش فاهم وكان ربنا هو اللي بيلهم جسمي أنه يتصرف، ده كان إحساسي وقتها”.
وتابع: “في وسط التكفين والصلاة والدفنة الواحد بيبقى بجد في حتة تانية خالص، لدرجة أن في تفاصيل أنا بسمعها من ناس كانت معايا وقتها، أكني بسمعها لأول مرة، اللي بحاول أقوله إن في تفاصيل كتير أوي ممكن الواحد ينساها في الوقت ده من كتر ما دماغه بتبقي في الابتلاء اللي هو فيه، لكن حاجة من الحاجات اللي عمري ما هنساها يوم دفنة أبويا الله يرحمه كان الأستاذ الكبير رشوان توفيق”.
وأكمل محمد يسري: “أبويا اتوفى في 2015، وبالرغم من إني دائمًا حاسس أن ده كان من عمر بحاله، لكن الحقيقة أن 2015 دي من 6 سنين، وإحنا مدافن العائلة في طريق الواحات يعني بكل المقاييس مشوار متخيل أنه أكيد قاسي ومتعب بالذات على حد سنه كبير، لما كنت باخد العزاء في المدافن”.
وأضاف: “فجأة لاقيت الأستاذ رشوان توفيق داخل علينا، ومعه حد جنبه يساعده فكلنا اتحركنا عليه عشان نجيبله كرسي ويقعد، وهو مصمم أن هو يخش لأبويا، وقعد يحضني ويطبطب عليا ويقول إبراهيم ده ابني وهو بيعيط وبيحكيلي عن أبويا وأد إيه هو بيحبه”.
وأكمل يسري: “الحقيقة أنه للأسف مشفتش الأستاذ توفيق في حياتي غير 4 مرات مثلا، منهم المرة دي، يعني مقدرش أقول إنه كان من أصدقاء أو أساتذة أبويا القريبين منه مثلا، لكن ده كان احساسه بيه وهو في الآخر في الحقيقة لا ابنه ولا قريبه حتى”.
واختتم حديثه: “وربنا عالم قد إيه الموقف ده بالرغم من أنه ممكن ميبانش قد إيه تأثيره كبير، لكن الحقيقة أنه حاجة من الحاجات إلى هفضل دائما شاكر ليها في الوقت ده، لأني مؤمن أن ربنا طبطب على قلبي من خلال الراجل ده، تخيلوا رجل زي ده عامل إزاي مع عيلته.. ربنا يكرمك ويحبب فيك خلقه ويديك طول العمر والصحة والستر يا أستاذ رشوان وتفضل معانا بفنك و بإنسانيتك”.
