محمود عامر لـ عالم النجوم: أنا عاشق للفن بجميع أشكاله
إعداد وحوار: سعيد المسلماني
في اطلالة براقة ومن داخل فاعليات مهرجان صناع السعادة بحضور الفنان ” محمود عامر ” ليشرف المهرجان بتكريمة كـ أحد نجوم ومبدعي الفن بمصر وظهوره الدائم على منصات التتويج.
والجدير بالذكر أن الفنان محمود عامر هو فنان ذو انطباع خاص، في تجسيد الادوار والشخصيات سواء كانت في السينما او المسرح او في الدراما، وضع بين متابعيه بصمة الود والمصداقية في التعبير سواء كانت من خلال اللقاءات التليفزيونية أو عن طريق السوشيال ميديا.
تنفرد جريدة عالم النجوم لتسعد متابعيها وقرأها بكل ما هو جديد من فكر وإبداع وتميز، وتغطية حصرية للمهرجانات والمحافل الفنية، ومن خلال تغطية مهرجان ” صناع السعادة” أن نلتقي مع نجمنا الفنان “محمود عامر ” ونتمنى لكم ان تسعدو معنا باللقاء وبحواره الخاص لـ عالم النجوم
في البداية نرحب بالفنان الكبير محمود عامر؟
اهلا وسهلا بحضرتك وانا سعيد جدا بوجودي معاكم في عالم النجوم ويارب دائما متألقين ومبدعين صحفيا وإعلاميا
ماذا يعني لك محبه جمهورك؟
محبة الناس دي كنز ومحدش يقدر يستغني عنها ووجودنا مع الناس دائما بيكون مصدر للسعادة ليهم ولينا طبعا ، لان حب الجمهور جزء كبير من نجاحه ومن تكوينه.
وفي حاجة بحب اذكرها دائما دعوة امي رحمها الله
“ربنا يحبب فيك خلقة”
إنطباع حضرتك عن المهرجان وفكرته؟
المهرجانات بطبيعتها شئ جميل وبيكون داعم لكل نجاح
بشكر كل القائمين على المهرجان، وطبعا شكر خاص للمنسق الإعلامي للمهرجان الصحفية ” مادونا عادل عدلي” علي دعوة الحضور والتكريم، بس انا بطبيعة الحال مش بحب أجامل ولا أتجمل في كلامي ودا المعروف عني
ولكن وجهة نظري في المهرجان بشكل شخصي هو أن أي تجربة في بدايتها بتكون ليها شئ مختلف أكيد بيكون فيه بعض الهنات .
بس فكرة انك تعمل مهرجان ويكون بمسمى صناع السعادة وانك تجمع كل من يسعدو البشر في مكان واحد، وكثرة المكرمين بأعمال مختلفة دا بيعمل نوع من انواع التشتيت.
ولكن لو أنت عندك حاجتين تقدر تلم الموضوع وتقدر توفق بينهم. علي سبيل المثال ” الكوافير، والماكير ، الإخراج والتمثيل، لكن الناس عندها رغبه انها تنجح وباذن الله السنه الجايه يحققوا اللي بيتمنوه .
ما هي ابداعات النجم الكبير محمود عامر بين السينما والدراما والمسرح؟
انا بشكرك على السؤال الجميل الملم بكل الجوانب الفنية والجمع بين علامات الإحساس والقيم والرسائل الفكرية والمجتمعية والربط بينهم، طبعا انا عاشق الفن بجميع أشكاله سواء كان دراما أو سينما أو مسرح بحب اقرأ العمل علشان اشوف هيكون فيه توافق بيني وبين الشخصية ولا لائه وبناء عليه يحدد ويقرر انطباعي عن الشخصية وكيفية التعامل معها.
“حواديت الأراجوز ” رسالة مجتمعية ذات فكر وإبداع مسرحي؟
حواديت الأراجوز هي رسالة واحساس ممتع سواء من خلال الأداء والتعامل مع الجمهور ، والحمد لله سعيد بإني انتقلت بها. لمدن كثيرة وحقيقية في محافظات مصر منها الفيوم وبني سويف والمنيا وسوهاج والإسكندرية ودمياط وبنها ، لناس بيسعو بإصرار حقيقي لرؤية هذا العمل ، أنت متخيل في ناس واحنا في القرن الـ 21 اول مرة يتفرجو على مسرح، ودا دور الثقافة في التوعية ونشر الفن بشتى أساليبه التي تسعى للترابط الأسري ووصول الرسالة المجتمعية السليمة.
” المداح ” آخر الأعمال الدرامية للفنان محمود عامر … ممكن توضح لنا رؤيتك للعمل؟
مسلسل المداح عمل جميل جدًا وكل نجومه ابدعوا وتألقوا، وانا شخصيًا عملي حالة جميلة في قلوب الناس، وبفضل الله في جزء ثالث بناء على طلب المحطة نفسها بعد عرضها الجزء الثاني مباشرة ، وطبعا الجزء الثاني كان أقوى من الجزء الاول بكتير ، وان شاء الله الجزء الثالث يكون أقوى من الجزء الثاني ، لان في حالة حب بين الجمهور ونجوم العمل وعلى رأسهم الفنان الكبير حمادة هلال.
هل كانت هناك تخوفات من عمل الجزء الثاني بعد نجاح الجزء الأول للمداح؟
والله عادة و الطبيعي إن الجزء لما بيننجح بيكون الكل متخوف من الجزء الثاني ، وانا قولت علي الجزء الاول قبل ما يتعرض ان الحصان الأسود في الماراثون الرمضاني ، ولما قرأت الورق الخاص بالجزء الثاني ، وطبعا بإحساسي كـ فنان قولت الجزء دا هيكون الحصان الاقوي للموسم القادم ، لان انت بتكون عارف الشخصيات رايحه فين .
هل قراءة أوراق الجزء الثاني من المداح قبل البدء في التصوير لها احساسها الخاص؟
أكيد طبعا بيفرق كتير ، انت كـ فنان بتحس بالورق بيقول ايه الشخصيات رايحة فين، وكان فيه بعض الحلقات كنت ببقي قلقان جدًا في حالة من الرعشة، واتصلت بالاستاذ “أمين جمال” اقوله الراجل دا طلع ازاي دا ميت ومدفون قدامنا، ودا مش حلو ولا تخيلات ورفض يقول التفاصيل وكانت كلمتة الدائمة ” من خلال الأحداث هتعرف كل التفاصيل، وعرفنا بعد كده كل شئ وعرفنا أن سبب رفضه هو تشويق رغم أننا فريق العمل واحتفظ بكل شئ لتفاصيل الأحداث.
ما هي تفاصيل الجزء الثالث من المداح؟
الجزء الثالث حاليا مفيش اي حد يعرف اي شئ عن تفاصيله ” السر الكهنوتي ” وانا من اعتقادي مش هيكون قبل شهرين ، علشان يكون جاهز بإذن الله للماراثون الرمضاني القادم ، بناء على طلب القناة التي قامت بعرض الجزء الثاني وبشدة عمل الجزء الثالث من المداح ، ودا طبعا بناء على رغبة الجمهور وتقبلهم ومتابعتهم للعمل.
ماذا يعني للفنان محمود عامر حواديت الأراجوز؟
الاراجوز تراث مصري صميم ، كل الأجيال كانت بتحبة واتعلقت بيه حتي الجيل الجديد ” التابلت” والالعاب الالكترونية لما بيحضرو العمل بيكونو سعداء جدا بالعمل وحواديتة.
تفاصيل حواديت الأراجوز :
العمل عبارة عن ثلاثة حكايات داخل العمل كل حدوتة وقتها ما يقرب من 20 دقيقة فـ الولد او البنت مبيزهقش او بيمل من المشاهدة ، لان كل حدوتة من الـ 3 بتوصل فكرة جديدة ومعلومة ورسالة معينة ، وبعد انتهاء العمل الاولاد بيقعدو يتكلمو مع اهاليهم انا عملت كذا وكذا واتفرجت وفهمت حدوتة من حواديت الأراجوز ، ودي بتكون رسالة هدفها الترابط الأسري.
أنا لازم أعمل كده علشان مسبش الأولاد فريسة للحاجات اللي بتتعرض وبتودي بأولادنا إلى اشياء لا نتمنها لهم.
ولكن التراث المصري انتمائه للوطن هو حصن دفاع لأي تيارات أخرى في أي مكان، ولازم وضروري جدًا جدًا كلنا نهتم بالطفل.
ما هي رؤية الفنان محمود عامر لـ السوشيال ميديا؟
في البداية رسالة صريحة ” منه لله اللي عمل السوشيال ميديا ” لان دي أول الاشياء التي أثارت وسعت إلى التفكك الأسري وعمل فجوة في العلاقات ، رغم ان فيها حاجات ايجابية بس فيها بردو خداع وتزييف للحقائق، أسباب خراب البيوت في الوطن العربي أحد أكبر وأهم أسبابه “الفيس بوك” و “إنستجرام” و “التيك توك” مواقع التواصل بشكل عام.
وجود الأولاد دول في المسرح أو السينما من وجدان المصريين بتفرق معاه وبالتالي بتفرق مع المجتمع ككل.
كيفية استخدام السوشيال ميديا من وجهة نظر الفنان محمود عامر؟
استخدام السوشيال ميديا ثقافة للأشياء التي نسعى للوصول إليها، ولكل ما يريد مسعي، كل واحد بيدور علي الاشياء اللي بيحبها وبيكون حاب متابعتها او الاطلاع عليها.
وفي أوقات بيدخلك السوشيال ميديا من وحي الأفكار اللي بتتكلم فيها بعيدا عن فكرة البحث، ممكن اكون بتكلم في فكرة السينمات ، بعد الانتهاء من الكلام فجأة تلاقي كل عروض السينما قدامك علي السوشيال ميديا، يبقي هو اللي بيفرض نفسه عليك بالتواجد مش أنت اللي عاوزه.
ونفس النظام لو بدور على إسم مستشفي بتلاقي كل المواقع البحثية بتظهرلك اللي كنت بتكلم فيه يبقى كده أنت مش بتعطيني خدمات أنت تفرض نفسك عليه وبتتجسس عليه.
رسالة تحب توجهها لكل أب وأم من خلال اللقاء حتي نخرج من عنق زجاجة السوشيال ميديا؟
أنصح كل اب وام وكل أسرة حاولو تكونو اقرب لبعض مش من خلال الرسائل الالكترونية ولكن من خلال الفكر والتواصل والمحبة، ياريت الأسر ترجع زي زمان
” انا اعرف اسرة مكونة من ولدين وبنت وأب وأم. الرابط الوحيد بينهم في التعامل داخل الشقة عن طريق محادثات الواتس أب. ومش بيكون في تجمع بينهم غير في رمضان ”
علشان كدا اتمنى ان الايام كلها تكون رمضان علشان اللمة والعلاقات الاسرية ترجع زي زمان.
هل رمضان حاليا بنفس إحساس رمضان زمان؟
رمضان كان زمان حتى رمضان الايام دي مش زي رمضان زمان خالص في كل شئ ، لك ان تتخيل ان كل حاجة قديمة ليها احساسها، وممكن تلاقي شباب الجيل الجديد يقولك ياريتنا عشنا معاكم ايام زمان، رغم هما معشوش الأيام دي بس فعلا حسو بيها من حكاياتنا وكلامنا عنها ، عن الصدق والبراءة في كل شئ حتي في التعاملات العادية.
هل توجد أعمال جديدة للفنان محمود عامر؟
انا حاليا بصور مسلسل إسمه “أعمل إيه” إخراج الأستاذ أحمد عبد الحميد ، بطولة خالد الصاوي، وصابرين، وبعض النجوم،
سوف يتم عرضه بإذن الله في النصف الثاني من سبتمبر.
ممكن تكلمنا عن شخصيتك الحالية في مسلسل ” أعمل إيه ” ؟
طبعا انا مش بحب أحرق الشخصية للمشاهد، بس انا عامل شخصية فيه هتعكنن على طوب الأرض ، بتأثير الشخصية عليه انا قعدت في البيت 3 أيام مش مبسوط ،بسبب العياط اللي ممكن يكفيني لـ سنة قدام.
لان دي شخصية بتفاصيلها واللى حصلها موجود في كل بيت مصري وعربي، وان شاء الله تعجب الجمهور واكون دائما عند حسن ظنهم في جميع أعمالي سواء كان سينما او مسرح او دراما.
وفي عمل تاني مع الاستاذ “رامي رزق الله” موضوع تاني خالص ، بدور راجل مدرس لغة عربية ودين واخلاق وشخصية طيبة جدا ، والثاني ناظر مدرسة بس أجارك الله.
ما هي رؤيتك للتريندات وظهورها السريع على السوشيال ميديا؟
أي حاجة بتكون خارج النطاق الأدبي بتكون ” ترند” مفيش حاجة كويسة بتعمل ترند، ولا في حاجة ليها قيمة بتعمل ترند ، كلها مشاكل عن تشتيت علاقات بين طلاق وسب وقذف. وإهانات بين الاشخاص وبعضهم، لكن ترند مهذب أو شئ كويس معتقدش إنه وقتها هيكون ترند.
رسالة توجهها لجمهورك ومتابعينك من خلال عالم النجوم !!
أولا عالم النجوم ليها فضل كبير جدا علي معظم الفنانين ، وأنا متابع جيد جدا لكل التفاعلات والأعمال.
وأحب أوجه رسالتي لكل المشاهدين والمشاهدات اي حد عنده حلم يصدقه ويمشي وراه ، حتى لو فيه مليون عقبة قدامه، صدق حلمك هيتحقق بأمر الله.
بشكر حضرتك جدا الفنان الكبير ” محمود عامر ” علي اللقاء الجميل والممتع متمنين لك التوفيق الدائم في كل أعمالك القادمة بإذن الله.
