محمود فارس الفنان المتألق في حوار خاص ومميز مع عالم النجوم

محمود فارس  السينما هي الطموح والشغف والأحلام  .. الفتوة كان دور مميز وحبيته

إعداد / دعاء نصر .. حوار / دعاء سنبل

محمود فارس فنان موهوب منذ الصغر عاشق للفن ويمتلك كاريزما وحضوره مكنه من وضع بصمته في أي عمل يشارك به،  يسعى دائماً للتميز  والتنوع  في أدواره ، لفت نظر الجمهور منذ بدايته ووصل إلى قلب المشاهد يسعى دائماً للأفضل  ، والصعب ليظهر كل مايمتلكه من موهبة.

ولد في عام 1973 خريج المعهد العالي الفنون المسرح بدا حياته الفنية عام 1990  بدايته كانت من خلال المسرح قبل أن يترشح للمشاركة في فيلم عمارة يعقوبيان من خلال المخرج مروان حامد، موضحا أنه شارك بعد ذلك في فيلمي قط وفار وكف القمر شارك  في مسلسل “حواري بوخاريست “مع الفنان أمير كرارة ، ومسلسل “تحت السيطرة ” مع الفنانة نيللي كريم ، وتوالت أعماله ونجاحاته وكان أخر أعماله مسلسل الفتوة في رمضان 2020.

في حوار خاص مع جريدة عالم النجوم فتح قلبه ورد على كل أسئلتنا وهي:

السينما هي الطموح والشغف والأحلام  .. الفتوة كان دور مميز وحبيته مَحمود فَارس بداية ممكن تقول للناس نبذة عنك  ؟ وعن الفن في حياتك  ..  يمثل لك إيه؟

اسمي مَحمود فارس،  ممثل وكل احلامي ان اعمل افلام حلوة و كويسة تعجب الناس   .. بدأت التمثيل في المسرح من فترة كبيرة وبدأت أول فيلم اشتغل فيه في السينما في عمارة يعقوبيان مع استاذ مروان حامد والكاتب العظيم  استاذ وحيد حامد  ودي كانت بداية عظيمة بالنسبالي في 2005 بدأت في يعقوبيان وهي فوضي مع يوسف شاهين وتاليف استاذ ناصر عبد الرحمن وفيلم حين ميسرة مع استاذ خالد يوسف واستاذ ناصر عبد الرحمن دي البدايات بعد المسرح،  الفن يمثل حياة بالنسبالي  حياتي كلها  من اول ما بدات ان ابقي واعي من وانا طفل  فأنا فنان وبحب التمثيل فأنا بالنسبالي الحياة كلها.

شارك بالعديد من الأعمال الفنية لكن البداية كانت من خلال المسرح  بيمثل أيه المسرح في حياتك وشايف أيه اللى ناقص المسرح عشان يستعيد هيبته وجمهوره زي زمان؟

 هو حقيقي البداية كانت في المسرح كانت مرحلة ممتعة ومازلت للحظة بشتغل علي المسرح وبحاول اعمل عروض مسرحية لغاية السنة دي 2020 يارب ان شاءالله بس الدنيا ترجع تاني بعد الكورونا ونفتح مسرح ان شاءالله، 

المسرح هو أساس لعبة الفن كلها في المسرح وانا بحب المسرح ومسرحي اساسا المسرح عندنا مش ازمة كبيرة في مختلف لغاية دلوقت اعتقد مرحلة الكورونا رجعت للمسرح هيبته شوية بعد مارجع في عروض اون لاين وعروض بتتصور على الإنترنت والتليفزيون.

واعتقد المرحلة اللي جاية هيبقي فيها انتعاشة كبيرة للمسرح وبتمني ان انا اكون من الناس اللي يقدموا مسرح للجمهور في السنوات اللي جاية باذن الله  هو المسرح علشان يرجع هيبته زي مابتقولي لازم له إنتاج ضخم والمسرح وإنتاجه الضخم بس على مااعتقد بعد ما بدأ كايرو شروق يعني بدء يرجع تاني المسرح للإنتاج الضخم المتميز  الرائع الامكانيات العظيمة اللي اتعمل بيها الجيل الجديد.

دكتور يحيي الفخراني اكيد دي رجعت هيبة المسرح من جديد ورجعت الجمهور للمسرح المحترم بالاضافة ان  المسرح القطاع الخاص بتاع مسرح مصر يعني انا شايف ان في انواع مختلفة من المسرح موجودة في السوق المصري وعلى خشبة المسرح المصري وبتمنى انها تفضل واتمنى اننا نوصل للجمهور ويجلنا في كل مكان.

مين رشحك لفيلم عمارة يعقوبيان وهل يعد الفيلم إنطلاقة لـ محمود فارس مع كوكبة من أكبر النجوم في مصر؟

  اه رشحني لفيلم عمارة يعقوبيان هو صديقي المنتج دلوقت صفي الدين محمود بصراحة كان هو الكاستن دايركت بتاع الفيلم وهو رشحني لـ أستاذ مروان حامد واختارني في الدور ده وقدمني الاستاذ وحيد حامد طبعا وكان بالنسبالي بداية عظيمة واتشرفت بيها الحقيقي للحظة.

مين من النجوم شاركته في عمل ويتمنى شاركه تاني ومين لسه محلفش الحظ للعمل معه لكن تتمنى مشاركته  ؟ ومين أكتر مخرج وأنت شغال معاه بتبقا سايب له نفسك ومرتاح؟

طبعا شرف كبير ان الواحد يشارك في أول بدايته سينما أول سينما في حياتي فيلم  اكون فيه مع العظماء كلهم الزعيم عادل امام الست يسرا هانم أستاذ خالد صالح استاذ نور الشريف أستاذ خالد الصاوي هند صبري كان فيلم عظيم آسر ياسين ناس كتير مش عايز انسى حد بس الحقيقي انا اتشرف ان اكون واحد من فيلم يعقوبيان وهو في تاريخي يعتبر الفيلم  الأول الذي شاركت فيه في السينما وبالنسبالي حاجة عظيمة إن الذي قدمني للسينما استاذ مروان حامد وأستاذ وحيد حامد.  

في ناس كتير بتمنى اشتغل معاهم

انا بتمني ان اشتغل تاني مع كل الناس اللي اشتغلت معاهم قبل كده بس انا دايما بحب ان يكون في جديد اكون مختلف اخد خطوة كمان غير اللى حصل قبل كده يعني لسه في نجوم كتير بتمنى اشتغل معاهم زي الزعيم بتمني ان اقف قدامه مرة ثانية بعد يعقوبيان … بتمني ان اشتغل مع أحمد حلمي بتمني مع احمد السقا،  احمد عز منة شلبى طبعا السندريلا هانم من الاحلام هند صبري في ناس كتير بتمنى اشتغل معاهم وادمهم الطموح بقي ان اشتغل مع ناس جديدة انا بحب أفكار الترويج الاولي.. دي والحمد لله ماشية مستمرة معاية ونشتغل بفريق جديد شباب ده نفس الشرف اللي عندي اشتغل مع الكبار  احب اشتغل مع الفنانين الجداد. 

الاستاذ سامر محسن من اعظم المخرجين اللي انا اشتغلت معاهم استاذ احمد سمير فرج من الناس اللي انا اثق فيهم 100٪ اشتغل معاه واتمنى.

طبعا بحلم ان اشتغل مع الاستاذ داود السيد واستاذ يسري نصرالله واستاذ شريف عرفة. 

تاريخ مشرف من الأعمال اللي شاركت فيها وكان أخرها الفتوة في رمضان 2020  ؟ المسلسل ونجح وحقق نسبة مشاهدة هايلة أيه رد فعل الناس عن دورك فيه؟ وأيه أكثر المسلسلات اللي شدك وتابعته بشغف غير الفتوة؟

الفتوة كان دور مميز وحبيته كان من احلي اللي حصل السنة دي وانا بحب شغل ياسر جلال ودايما ناجح يعني الفتوة عمل رد فعل حلو وانا مبسوط بيه وعجبني والناس انبسطت فده بيفرحني لما بعمل حاجة الناس تنبسط منها ببقى فرحان وبتمني اعمل كمان اكتر السنة دى كان عندنا مسلسلات كتيرة وحلوة وطبعا الاختيار ده كان حاجة عظيمة جدا  اتمنى ان اشارك في الجزء الثاني يارب مسلسل 100 وش ده عظمة عظمة  حاجة كده في منتهي الابداع والرقي  حكايات كتير عجبني اعمال كتير السنة دى حصلت،  بس طبعا كنت بتفرج علي الفتوة والاختيار و 100 وش ف دي اعمال كتير مقدرش اتابع اكثر من 3 أعمال في رمضان. 

كلمنا عن إحساسك عند حصولك على جائزة أحسن ممثل من المركز الكاثوليكي عن فيلم ” بين بحرين “ وخصوصا أنه بيناقش قضية مجتمعية هامة؟

فيلم بين بحرين طبعا أنا فخور بالفيلم بصناعة وبالزمله اللي مشاركين معانا فيه هو عنوان كبير لايقونة النجاح مَحمود فارس بصي جائزة أحسن ممثل سنة 2019 منافسة مع 33 فيلم اللي نزلوا في السينما ف دي حاجة تشرف اي فنان ان ينافس ويكسب الجائزة الاولي احسن ممثل في الدورة 68  لمهرجان المركز الكاثوليكي  الذي هو بيضاهي مهرجان فينيسيا كانت الدورة 68 السنة دي سوري مهرجان برلين دي حاجة اتشرف بيها جدا كمحَمود فَارس الفنان وهي الجائزة الأولى ليه في عالم السينما.

ف بتأكيد فرحان بيها زي الأوسكار اعتقد مهما حصل من جوايز وفي يوم الواحد خد اوسكار هيا نفس الاحساس بالفرح والمتعة والفرح والثقة التي اعطتها لي الجايزة من تاني في فني وفي افلامي و حطتني علي اول الطريق يارب نعمل أفلام كده،  الفيلم خد 19 جائزة في العالم ودي حاجة تشرفني اوي الاسم رفع اسم السينما المصرية وشرفنا في العالم ف دي حاجة تشرفنا كلنا فيلم بين بحرين كان أيقونة نجاح في حياتي حصلت وبتمني ان اكبر بيه واعمل افلام تعجب الناس،  وتناقش قضاياها وهمومها ومشاكلها ومتاعبها وافراحها،  بين بحرين هو فيلم  شبه الناس  مات قلبها وروحها من حكايتها وحوادتها الناس واحنا بنصور في جزيرة الدهب كانوا بيقفوا يعيطوا هلي المشاهد اللي بنعملها في اللوكيشن، وهما شايفين   كاميرات وتصوير بس تفاعلوا مع اللي بيتفرجوا عليه كانه حقيقة تهيلي دي كانت حاجة في منتهي السعادة ف ده كان ادامنا فكنا ككرو فيلم طايرين من الفرح،  ده في فيلم بين بحرين.

الفنان محمود فارس في في لقاء له مع منى الشاذلي

اشتغلت مسرح وسينما ودراما  أيهما أحب لقلبك  ؟ ولماذا؟

بحب كل انواع الفنون من المسرح للتليفزيون للسينما لكن خليني اقولك ان السينما هي الطموح والشغف والاحلام بحب السيما اكتر وبحب ان اعمل افلام اكتر بحب اعمل افلام كتيره منها يعجب الناس ومنها تسليهم يعني انا مش اقدر اقول او اي حد في الدنيا بيعمل اعمال عظيمة طول الوقت انا احب اعمل افلام حتي لو هدفها متعة الجمهور واسعاده انا بحب اعملها برده 

شاركت الفنان محمد رمضان في مسلسل نسر الصعيد أيه رأيك في كـ فنان وهل الضجة اللي معموله حواليه وأقوال البعض أنه أفسد الذوق العام حقيقة ولا هو بيواكب العصر؟

حقيقي انا اشتركت في نسر الصعيد كنت ضيف شرف في المسلسل وحقيقي مبسوط بيه وسعيد بيه بحب شخصية الضو اللي كانت في المسلسل،  محمد رمضان هو فنان انا بحبه على المستوى الشخصي أعماله بتنجح  عنده جمهوره الذي يحبه وبستناه،  الضجة اللي معموله حواليه والدوشة والحاجات دي معتقدش ان ليه ذنب فيها حياة المشاهير والفنانين فيها الكلام ده هو نجم من نجوم الصف الأول.

فطبيعي أن يكون في حياته كل الدوشة والاشاعات اللي بتحصل حواليه،  بس رمضان هو فنان شاطر ومميز بس هو قال في حوار مرة في التليفزيون قال ان هو لسه صغير لما هيكبر اكيد تصرفاته هتتغير، وعيه هيكبر مش هيعمل الحاجات الصغيرة اللي ممكن يكون بيعملها دلوقتي هو قال كده بنفسه،  وانا حقيقي بحبه.. وبحب شغله اما الناس اللي بتنتقد اعتقد محدش  هينجو من النقد مهما حصل هو بيعمل كده دي أدوات العصر وأدوات صناعة السوشيال ميديا هو الراجل عنده صناعة السوشيال ميديا كبيرة هيا عملاله المشاكل اللي بشوفها  دي.

كان المفروض لولا الظروف التى يمر بها العالم أننا كنا هنشوف محمود فارس في مسلسل خالد بن الوليد صح ممكن تحكيلنا نبذة عن دورك فيه؟ وايه الجديد لحضرتك خلال الفترة الجاية؟

 والله يارب ياكريم نشوف خلينا  نشوف يعني مسلسل  لسه في التحضير والتجهيز لكن انا مضيت المسلسل طبعا لكن لسه مبداتش التصوير. 

الجديد بقى عندنا في فيلم جديد   هينزل في العيد الكبير هو اوردي نزل في الخليج وردود الأفعال جاية من هناك والناس سعيدة بالفيلم يارب ان شاء الله الفيلم هينزل في العيد هنا ف السينما يعجب الناس دا الجديد اللي عندنا.  

بنجهز أكثر من عمل في السينما يارب علي خير الحقيقية مركز في السينما لأن بحبها اكتر لان شايفه ان دي مرحلة السينما بالنسبالي.  

محمود فارس تتمنى تحقق أيه قبل أنتهاء 2020  ؟ وتقول لمحبينك أيه بمناسبة عيد الأضحى المبارك؟

بتمنى 2020 تعدي علي خير ويحدثنا فيها في النص التاني اللي جاي ان شاء الله يبقي افضل من نصفها الاول لان نصف السنه الاول ضاع في الكورونا ويارب يحفظ كل الناس.. ويحفظ الجمهور المصري والجمهور العربي والناس في العالم عموما .. وينجينا من الفيروس ده ان شاء الله ربنا يحفظنا ويهدينا منه علي خير، واعتقد ان ان شاء الله أفضل وتبقي سنة كلها سعادة.. وخير ان شاءالله وحقيقي كل سنة وكل الشعب المصري والشعب العربي.. بخير بمناسبة عيد الاضحي ربنا يحفظ كل الناس ويعيد علينا كل الايام بخير وعيد اضحي  مبارك علي حضرتك.. وعلي الامة الاسلامية والامة العربية جميعا وطبعا معايدة حقيقة شخصية لكل جمهور الشعب المصري والعالم العربي العظيم .. اللي انا بنتمي ليه واللي هو بيرفعنا كلنا في السما كأبطال في السينما وفي الأفلام بمحبتهم وعيد سعيد علينا جميعا يارب.