مدحت صالح: “تتر مسلسل راجعين يا هوى قرفتها كانت حلوة”
كتبت: ثريا الصاوي
تحدث الفنان مدحت صالح من خلال مداخلة هاتفية ببرنامج “فن مشكل”، المذاع عبر إذاعة “شعبي إف إم” عن تتر مسلسل “راجعين يا هوى” و اغنية “مبحبش حد يصحيني”.
وقال: “أغنية مسلسل راجعين يا هوى كانت قرفتها حلوة، فهي من كلمات تامر حسين وألحان عزيز الشافعي اللي أعمالهم دايما قريبة من قلوب الناس، وهما ذاكروا حدوتة المسلسل وقدروا يصيغوها في أغنية كويس أوي”.
وأضاف مدحت صالح: “عزيز الشافعي من الملحنين اللي بيريح أي مطرب بيشتغل معه، أما خالد النبوي عشرة عمر وصديقي واشتغلنا مع بعض زمان في فيلم (إحنا ولاد النهاردة)، فهو من النجوم اللي بتقدم فكرة تفيد الناس ومواضيع مميزة”.
وعن وضعه كممثل قال: “بحس إنى ضيف على زمايلي و حبايبي وأصدقائي في التمثيل، وبرتاح أكتر لما بحس إن شغلتي الأساسية هى الغناء”.
وتابع: “أغنية (مبحبش حد يصيحيني) ليها قصة وهى إني كنت قاعد مع أصدقاء دراسة ولينا ذكريات مذاكرة مع بعض وكانت أهم حاجة وقتها النوم.. فلما عمرو الشاذلي الملحن بعتهالي هو ومحمد شفيق الموزع والمؤلف إيهاب عبد العظيم حسيت كأنهم كانوا سامعين إحنا بنرغي فى إيه والأغنية دمها خفيف وحبينا نرسم الابتسامة لولادنا عشان الارتباك والتوتر في الامتحانات”.
واختتم حديثه قائلًا: “الفترة الجاية إن شاء الله هتنزل أغنيات تباعا كل أسبوعين، ودلوقتي بستعد لحفلات الصيف.. عندي حفلة في مكتبة الإسكندرية أغسطس المقبل”.
