ملايكه بجناحات بقلم الشاعر الغنائي: حماده العسكري
وسعوا أنا نازل الساحه
مش هدي لحد مساحه
بطلت أحن
واللي هيتجن
مش شايف ولا ساعه راحه
تلعبو على مين أنا بابا
والنبي لا دنتو غلابه
بمزاجي سايبكو
كاشف ألاعيبكو
ياناس بوشوش كدابه
تكتبوا ع الفيس بوستات
زي ملايكه بجناحات
وإبليس منكو بيتعلم
الأسافين والحوارات
كلكوا على بعض أونطه
كان قربي منكم ورطه
إديتكو كتير من عمري
وطلعتم أكبر غلطه
بطلوا شغل الحكايات
قال رجاله بشنبات
بطلوا تلقيح
أما أنتو صحيح
عاملين زي الستات
أفعالكوا بجد تغيظ
عاملين زي البراويز
منظر وخلاص
من غير إحساس
ملكوش غالي ولا عزيز
غلكو براكم طافح
تحقدوا دايما ع الناجح
جواكم شر ماليكم
مفيكوش ولا صاحب صالح
الصاحب كلمه كبيره
كلمه ليها معاني كتيره
في أي ظروف تلاقيه
مش محتاج تأشيره
والبت اللي أنا حبيتها
روحت ودقيت باب بيتها
كان حب سنين
شيلتها في العين
من عمري كتير إديتها
عايشتها أيام رايقه
م الشهد دي كانت دايقه
وف وقت الضيقه
باعت في دقيقه
خلعت بت المضايقه
مابقاش فيه لحد أمان
مهما هتوفي هتتخان
حاسب لا تقع تنداس
ياعيني على الغلبان
سحبانا الدنيا وراها
ماشين وطريقنا متاهه
بكفوفها تعلم فينا
مين لاقي راحته معاها
