ملك هاني لـ عالم النجوم: أتمني أكون مشهورة وأشرف مصر وأكون السندريلا التي ينتظرها متابعيها
إعداد وحوار: سعيد المسلماني
عندما يشع نور الموهبة تجد السعادة العارمة بين كاتب المقال وشاعر ومتابع للإبداع، في حضور أروع ما يكون بين ابداع الحروف و براعة الإلقاء وجمال الروح نجد موهبه من المواهب الرائعة ، هي طفلة ذات إطلالة جميلة ألقت الكثير من الأشعار أحبت القاء الشعر وتتمني دعم موهبتها الأخرى لتكون مقدمة برامج تليفزيونية ولقيت الدعم والترحيب من الأسرة، لتظهر بضوئها الإبداعي في سماء مواهب الأطفال،
بنت الجيزة الجميلة “ملك” صاحبة الـ 9 سنوات والنصف شاركت في العديد من اللقاءات والمسابقات فازت في بعض منها وأسعدت الجميع بين داعم ومهنئ ومبارك للنجاح.
وإيمانا منا وتوفيقا من الله ودعم من مؤسسة عالم النجوم الإعلامية التي تسعى دائما لدعم المواهب وظهورها،
سعدنا باللقاء والحوار مع الموهبه الجميلة ” ملك هاني ” بطرح لها بعض الاسئلة لترسم السعادة من بين كلماتها وحوارها الجميل لكل متابعي المواهب
في البداية أحب أتعرف بيكي ؟
طبعا شئ يسعدني جدا وانا سعيدة جدا بوجودي مع حضرتك
انا ملك هاني عبد المعبود عندي 9 سنوات ونصف في المرحلة الابتدائية ومن مواليد الجيزة
ممكن تكلميني عن موهبتك ؟
في الحقيقة هي مش موهبة واحدة والحمد لله.
موهبتي الأساسية هي إلقاء الشعر بالفصحى والعامية وأساس حبي للشعر، لان الشعر دائما ليه إقبال عند المتابعين وله حضور مميز، يجذب انتباه الحاضرين بيلمس إحساسهم ، وبيكون فيه شئ من القبول ودي حاجه بكون سعيدة جدا بيها.
بالاضافة طبعا إني بمثل مسرح ومقدمة برامج وحفلات ، وكان ليه حضور بأكثر من تجمع سواء كان مدرسي او حفلات أو لقاءات آخري.
مين صاحب الفضل في إكتشاف موهبتك ودعمها؟
بعد ربنا طبعا ” ماما ” صاحبة الفضل الأول والأخير على دعمها الكبير ليا بإني أنمي موهبتي وأظهر بالشكل الجميل والمشرف دا. وبعد ماما دعم بابا واخواتي ربنا يباركلي فيهم هم اسباب كل شئ انا فيه وهوصله بإذن الله
وطبعا مقدرش انسي الشاعر اللي اتدربت وبدأت معاه ، والان عمو وليد عاطف مؤسس ايفرست
هل تم مشاركتك في مسابقات ومهرجانات؟
شاركت في مسابقات كثيرة منها
تالنت بالعربي ، إيفرست للأدب ، مهرجان الطفل المبدع ، مسابقة الدولة للمبدع الصغير ، مسابقة القراءة للجميع ، مسابقة قصر ثقافة الطفل ، وفي مسابقات لمراكز ثقافية علي الفيس بوك شاركت فيها والحمد لله بكون في منتهي السعادة.
“ملك” كان ليكي ظهور على الشاشة الصغيرة؟
ظهرت في برامج تلفزيونية ، برنامج بكرة لينا وبرنامج مواهب من مصر
هل تم حصولك على جوائز وتكريمات؟
حصلت علي المركز الاول وأخذت لقب القمة وسفيرة الطفولة لمسابقة ايفرست للأدب
وحصلت على المركز الأول على الجمهورية بمهرجان الطفل المبدع .
وتم إختياري من أفضل 10 أطفال مبدعين وطبعا لسه في انتظار النتيجة النهائية
إحساسك إيه بوقوفك على المسرح؟
بكون مبسوطه جدا جدا سواء كنت على المسرح لإلقاء الشعر أو من خلال المسابقات التي شاركت فيها،
وطبعا كل دا إحساس ولما بفوز بيكون احساس تاني خالص ، بكون طايرة من الفرحة بكون زي الفراشة.
كيف يتم التوافق بين الدراسة والموهبة في هذا السن الصغير؟
الحمد لله موهبتي مبتأثرش على دراستي بالعكس بتديني الدافع الكبير بإني اقرأ كتير وطبعا كل دا بمساعدة ماما.
بنظم المواعيد وبنعمل جدول بين المذاكرة وتنمية الموهبة ، وأمارس حياتي الطبيعية.
بلعب وبتفرج علي التليفزيون والكرتون يعني مش بحرم نفسي من حاجه.
إيه الامنية اللي “ملك” نفسها تحققها؟
نفسي أحقق حاجات كتير جدا وانا لسه في بداية الطريق، عاوزة اشترك وادخل مسابقات اكتر وافوز بمراكز واكون حاجه كبيره اتشرف بيها واشرف مصر بيها.
وبتمني لما اكبر يكون ليه برنامج تليفزيوني واعمل لقاءات ويكون ليه متابعين كتير ، ولسه مع الوقت كل حلم يكبر و يكون ليه امنيات اكثر واكثر
وبعد خمس سنين هكون في ثالثة اعدادي ويكون حلمي اكبر واكون السندريلا اللي بيستناها الناس في كل مكان..
ونفسي اكون مشهوره بس الناس تتعلم مني واكون قدوة للي هيكون بعدي.
رسالة تحبي توجهيها للمواهب اللي من سنك واللي هيكونو بعدك؟
نمي موهبتك وأسعى لتحقيق هدفك، وكدا هتبقى ليك وجود وهتوصل لتحقيق حلمك ، بس أهم شئ متهملش في دراستك ، لان لو أهملت في دراستك هيكون التأثير الأكبر على موهبتك وبإذن الله كلنا موفقين
شكرا ليكي يا ملك علي اللقاء والحوار الجميل دا ، وبإذن الله تكوني موفقة في كل شئ.
شكرا جدا وانا سعدت بوجودي مع حضرتك وأتمنى يكون اللقاء نال إعجاب حضرتك
شكرا لحضرتك وشكرا جدا لـ عالم النجوم
