“ممس” .. أول نداء للفنان “محمد محمود” بحفل العيد القومي الـ 71 للإسكندرية

كتبت: مايسة عبد الحميد 

دخول مفاجئ ومؤثر للفنان محمد محمود على الحضور لحفل العيد القومي الـ 71 للإسكندرية .

تعالت أصوات الحضور بالنداء للفنان الكوميدي العملاق محمد محمود “ممس” وكان ذلك شديد الآثر على الفنان وعبر عن سعادته بذلك.

أستضيف الفنان محمد محمود في الجلسة الحوارية إلى جانب عدد من الضيوف وهم الفنانة لقاء سويدان، الأستاذ أحمد الوكيل رئيس الغرفة التجارية بالإسكندرية، والفنانة بوسي شلبي ، والشاعرة أماني محفوظ، والفنانة سما إبراهيم، والفنان محمد محمود .

توجه الفنان محمد محمود بالشكر لمحافظ الإسكندرية اللواء محمد الشريف للدعوة الكريمة وعرض بصورة مبسطة ذكرياته مع الإسكندرية ومدى عشقه لها ولأهلها.

كلمة الفنان محمد محمود

“أولا شكرا على الدعوة الكريمة شكرا معالي المحافظ على الدعوة الكريمة عايز أقول أنا لست سكندري المولد ولكني سكندري الهوى أنا عاشق الإسكندرية، الناس من كتر ما بيشوفوني هنا بيقولوا لي أنت إسكندراني أقول لهم طبعا أنا فعلا إسكندراني فخلاص طلع في الوسط كله، في الشارع المصري كله، والفانز عندي على وسائل التواصل الاجتماعي، لما بيقراوا خبر عني أو منزل بوست بيقولوا ابن بلدنا .

إسكندراني وانا ما بنفيش ده لأن أنا بشرف إني فعلا أكون سكندري، إسكندرية بالنسبة لي الطفولة والصبى والشباب والنضج أنا مريت بكل المراحل دي هنا من وأنا صغير واحنا بنيجي نصيف في إسكندرية وعشش سيدي بشر، لحد ما بقيت ممثل وجبت مسارح الإسكندرية من الأنفوشي حتى المنتزه، ليه في كل مسرح رواية عملتها، في كل مكان في إسكندرية ليا فيه ذكرى، عملت مسرحيات مع كبار النجوم وعملت مسرحية في بداية حياتي أنا البطل الأول بتاعها عشت كل حاجة في إسكندرية من كتر ما يقال عني إني سكندري تمنيت إن ابويا يرجع تاني واساله وقول له قول الصراحة أنا منين.

والله العظيم لولا طبيعة عملي لاتمنى أن أغير محل اقامتي وأجي أعيش في إسكندرية، أنا سعيد فعلا بالدعوة دي لان حسيت ان الناس بتتعامل معايا على إن أنا سكندري وده شرف ليا، جمهور إسكندرية الذواق لما امتهنت مهنة التمثيل اثبتولي إن هم جمهور ذواق، المسرحية اللي ما تنجحش في القاهرة أو ما نلاقيش الصدى اللي احنا متوقعينه بنيجي إسكندرية لأن الجمهور ده ذواق ما يحبش اللي يضحك عليه يحب اللي يضحك معاه، المنتجين لما عرفوا مدى حبي للإسكندرية بيستغلوا النقطة دي كتير قوي لما نيجي نتفق نقول له عايز كذا يقول لي هو كذا يقول لي على فكرة الشغل كله في إسكندرية اقول له خلاص اللي انت عايزه وأسكت.

فيلم أمير البحار اللي ربنا جعله سبب اني أخرج من عنق الزجاجة لأني طول عمري اتحسبت ممثل مسرحي لحد ما عملت أمير البحار اللي الإسكندرية كان ليها الفضل بعد ربنا إن الناس تحبني وتعرفني وأبدأ أنتشر وأتعرف في السينما والتليفزيون بعد هذا الفيلم اللي صورناه هنا، لو قعدت أحكي عن ذكرياتي في إسكندرية هنحتاج وقت كبير قوي، شاكر جدا جدا أفضلكم شاكر على الدعوة الكريمة اتمنى كل الناس تقول لي إن أنا إسكندراني أنا كل وقتي باجي اقضيه هنا مدام ما عنديش شغل من حب الاسكندريه لما ربنا اذن ويبقى ليا مكان الأولاد قالوا لي احنا عايزين في الساحل قلت لهم لا الساحل مش إسكندرية لازم أ سكن جوه إسكندرية عشان احس بيها وهم عارفين مدى عشقي ليها وأخد الشقة اللي أنا أخذتها في الماكس في إسكندرية، الحمد لله اشكركم جدا على الدعوة دي يا رب دايما اكون عند حسن الظن”.

الجدير بالذكر أن الاحتفالقد شهده اللواء وليد حمودة قائد المنطقة الشماليه العسكرية، واللواء خالد البروي مساعد الوزير مدير أمن الاسكندرية، والدكتور أحمد زايد مدير مكتبة الإسكندرية، والدكتور عبد العزيز قنصوه رئيس جامعة الإسكندرية، والأستاذ أحمد الوكيل رئيس الغرفة التجارية بالإسكندرية، والدكتور أحمد جمال نائب المحافظ، والدكتورة جاكلين عازر نائب المحافظ، وقناصل وسفراء الدول الأجنبية، وأعضاء مجلسي النواب والشيوخ، ولفيف من القيادات الدينية والأمنية والتنفيذية بالمحافظة.