نهاد ابو القمصان : بر الوالدين مش شيك على بياض قابل للصرف في أي وقت
دعمت الإعلامية والمحامية المشهورة والمدافعة دائما عن حقوق المرأة المطربة الشعبية بوسي بعد هجوم شرس من الاعلام والصحف ضدها، بعد ظهور والدها الذي قال انه محتاج لها ماديا وانه مريض وطالب مساعدتها، وجاؤت بوسي مع الإعلامية منى الشاذلي ترد على والدها ، كنت فين اما كنت مستنية حد من أهلي يجبلي حقي؟
كتبت نهاد ابو القمصان هذه الكلمات لدعم المطربة بوسي قائلة:
بر الوالدين مش شيك على بياض قابل للصرف فى اى وقت، بر الوالدين مسئولية ، نتيجة تتحقق بالبر بالابناء.
العلاقة رايح جاى
لو حد من الوالدين كان مؤذى نفسيا وانسانيا لولاده ما ينفعش افعص الولاد وابتزهم عاطفيا ودينيا واقول لا دا ابوك او دا امك لازم تبره
لو الولاد عملو كدا يبقى تفضل منهم نتيجة لقوة نفسية هائلة قادرة تبلع الاذية والالم
لكن لو الولاد معندهمش القوة دى معناه ان بقولهم موتو علشان شخص مكلفش نفسه يديكو الحياة ودا اكبر ظلم
اللى قالته بوسى انذار لكل ام قاسية و كل اب رامى ولاده
كل اب سايب امهم تتمرمط فى المحاكم سنين فى قضية نفقه علشان تجيب لقمه ياكلوها
اولادنا مخزون استراتيجى يسندنا لما نكبر ونحتاج لهم
اذا ما راعيناش المخزون دا واهتمينا بيه
لما نحتاجه هنلاقيه غير صالح للاستخدام وبعيدا عن الابتزاز الدينى
البر مرتبط بالتربية
اللى بيرمى ومش بيربى ما يدورش على بر
اللى بيربى بالضرب والاذية
ما يدورش على الرحمة والحنية
ياما شفت اهالى مرميين والانطباع الاول ان ولادهم ولاد حرام ما رعوش اهلهم
لما حققت اكثر ودخلت فى التفاصيل اكتشفت ان بعض الاهالى دى كان عايز الشنق من اللى عمله فى ولاده
الاب مش ذكر نحل شغلنته يخصب الملكة
الاب ضهر وسند وامان بوجوده فى ظهر ولاده ويقولهم طول الوقت انا هنا ممكن اخد رصاصة فى قلبى بدل منك.
