هبة أيمن تتقن في تصميم الأزياء وتحلم بتوسيع مشروعها داخل وخارج مصر 

كتب- أحمد الدخاخني 

تواصلت جريدة عالم النجوم مع مصممة الأزياء هبة أيمن البلاوي، للحديث عن مشوارها في عالم الأزياء والخياطة، وهي من بنات من مركز مغاغة التابع لمحافظة المنيا، طالبة بكلية الآداب قسم الاعلام شعبة الصحافة بجامعة المنيا، والتي تبلغ من العمر 23 عاماً.

وتبدع هبة في تصميم الأزياء والملابس بمختلف الألوان، فتنال إعجاب الفتيات اللاتي ينظرن اليها وتكون الفكرة جاهزة للتنفيذ والارتداء.

وتتحدث هبة أيمن عن بداية مشوارها قائلة: ” الموضوع بدأ كلعبة وأنا ف ابتدائى بخيط لبس وبعمل حاجات كتير كنت بخيط للعيال جيراني و لأصحابي لبس للعرايس وللالعاب بتاعتنا وكنت ببيع القطعة ب 5قروش او ببريزة اللي هي 10 قروش، ولما كنت ف ابتدائي بردو كنت بحب البس لبس مختلف عن اللي بينباع حواليا فكنت بفكر ازاي اعمل لبس مختلف واقول لامي انا حابة اللبس يكون شكله كذا. 

وتضيف هبة: “وبعدها في إعدادي حبيت إني خلاص لازم أقعد على المكنة واخيط بنفسي، فمكنتش بحب ألبس زي المدرسة اللي بينباع وبدأت اعمل لنفسي زي بنفس اللون المحدد للزي واصحابي والمدرسين كانوا بيحبوه ويقولوا جميل وبدات اتشجع واعمل لاصحابي القريبين وبعدها كبرت وحبيت الموضوع والمجال اكتر بسبب والدتي فقررت وانا ف ثانوية عامة اني أدخل فنون جميلة أو تربية فنية، لكن التنسيق مساعدنيش ادخل اي كلية فنية، فدخلت آداب إعلام”.

وتكمل: “قررت إني أدعم واساعد كل الموهبين في الظهور علي ساحة السوشيال ميديا وبالفعل ساعدت شباب كتير ولاد وبنات في أنهم يكملوا في طريق تحقيقهم وممارستهم لموهبتهم على مواقع كتير الكترونية وفي جرايد مختلفة ولكن من جوايا كنت بتمني اني اكون أنا كمان بمارس اللي بحبه واخد خطوة فعالة بجد في طريق تحقيق حلمي، فقدمت في أكاديمية دراسة تصميم أزياء وحلي، ودبلومة سنتين معتمدة”.

وتوضح هبة الهدف من التصميم سواء تجارة أم هواية قائلة:” انا بعتبره الاتنين ف بعض ممارسة هواية علشان انا حبيت الطريق دا واخترته بنفسي مش دراسة هي اللي جابراني اكمل فيه، وتجارة علشان اتحول لمنتج مش انه مقتصر عليا أنا بس، وبحاول أضيف حاجة في المجال بجد، وهو بما اني بعاني شوية وشايفة ناس كتير حواليا بيشكوا من أسعار الملابس الجاهزة بالرغم من قلة تفاصيلها

بس بتبقي سعرها، رافع فأنا هدفي إني اعمل سعر يناسب كل اللي حواليا بجد لأن كفاية الغلي ف كل شيء حواليا”.

وتكمل: “كمان هدفي اني أحاول اتغلب على نقطة بيعاني منها ناس كتير وهي ان مش كلنا بنبقي الجمهور المستهدف للقطع اللي بتنباع في السوق أو القطع الجاهزة، وإن كل سن بيبقي محتاج لبس معين يناسب طبيعة شغله وحياته اليومية، وده مبقاش متوفر خالص حوالينا، فالخياطة بتيح ليا وللي حواليا يلبسوا اللي يناسبهم بجد وينفع مع مبادئهم وشخصيتهم لان الزي بتاعنا او استايل لبسنا بقا كمرآة لينا ف كل مراحل العمر”. 

وتتابع: “بحب أوي أراعي نقطة عند البنات والستات وهي ان فيه ستات كتير مبتحبش تبقي لابسة زي ما الكل لابس، في كتير ودي حاجة فينا كلنا كبنات انها لما بتلبس حاحة مختلفة عن اللي حواليها بيبقي عندها ثقة ف نفسها بجد”.

وعن أحلامها التي تسعى لتحقيقها فتقول هبة:” نفسي في حاجات تخدم بعضها يبقي براند باسمي له صيت بجد وينتشر على نطاق واسع، وفي نفس الوقت أتمكن إني أبقي مدربة تصميم أزياء وباترون واستايلنج وأدي تدريب متكامل في المجال علشان بحب اوي أعلّم كل الناس الحاجة اللي بحبها، وكمان بتمني من ربنا يرزقني إني اقدر أعمل ده وكمان اخدم هوايتي وشغلي اللي بحبه بمجالي الدراسي ويبقي عني مجلة فاشون، ونفسي بجد أسافر بره مصر يعني بتمني يحالفني الحظ ومشيئة القدر وأسافر بيروت او فرنسا”.

واختتمت هبة قائلة:”أنا بحاول أعمل ده ع الضيق بس الوقت والمقدرة المادية مش مساعداني، يعني أديت من فترة ورشة وكانت مفيدة اوي بجد لكل اللي حضر بس ملقتش حد يساعدني اني اكمل اعدادتها، واهو البراند عندي بس على صغير في البيت”.