هبة وأمجد.. موهبة مشتركة في تصميم المجسمات المصغرة وفنون الهاند ميد
حوار: أحمد الدخاخني
زوجان جمع بينهما الحب والفن ويمتلكان هواية واحدة, الفنانة التشكيلية هبة عبد العال التي تخرجت من كلية التجارة بجامعة قناة السويس, وتخرج زوجها وإبن خالتها الفنان التشكيلي أمجد الدياسطي من كلية التجارة بجامعة القاهرة, واستقرا في مدينة المنصورة, ويبدع الزوجان في تصميم بيوت افتراضية وعرائس لها ومجسمات ومصغرات للتراث المصري وأنشطة ووسائل تعليمية وأنواع مختلفة من فنون الهاند ميد, وعندما نجحا في كسب ثقة العملاء حتى باتوا يسألون عن خطوات التصميم قاما بإنشاء قناة تعليمية على موقع يوتيوب بإسم ” فوم وفنون “.
في حوار خاص تواصلت ” عالم النجوم ” مع الفنانة هبة عبد العال للحديث عن بداية ممارسة الهواية التي تجمعهما والجوائز التي حصلوا عليها وأحلامهما الكبيرة, كما يلي:
متى كانت البداية في عمل التصميمات والهاند ميد ؟
بداية الشغل الفعلي لينا بقى لينا عملاء من 3سنين, لكن الموهبة وحبنا للهاند ميد كان من زمان وإحنا صغيرين كمان, وكنا بنحب نعمل إعادة تدوير لأي حاجة عندنا في البيت ومجسمات صغير بالكرتون وأنا كنت بشتغل تطريز كمان وكروشيه وأعمال بالخرز حاجات كتير, ولما اتجوزنا بقينا نعمل حاجات لبيتنا ولبناتنا زي فانوس وزينة رمضان وأعياد ميلادهم وأي مناسبة بتيجي.
هل كان هناك صعوبات واجهتوها في التصميم ؟
الحقيقة اللي ساعدنا في تصميمات أعمالنا أن أمجد طبيعة شغله ومعرفته ببرامج الجرافيك ال 2D وال 3D كان ليه دور في شغلنا وأننا نطلع تصميمات وأفكار جديدة ومميزة خاصة بينا, والحمد لله ده اللي اتميزنا بيه وعجب عملائنا جدا أنه شغل دايماً جديد ومش متكرر ولا شبه حد.
ما مدى إقبال الناس والأطفال على التصميمات ؟
الحقيقة اول ما عملنا البيدج بتاعتنا وبدأنا بعرض اول أعمالنا وكان العرائس المجسمة بالفوم وفكرتها عجبت العمل جداً لأنها كانت جديدة وخصوصاً أننا كنا مش بنعملها مجرد عروسة, كان ليها هدف مثلا زي مقلمة مكتب للأطفال أو الكبار أو حامل مناديل, وكمان كنا بنحاول ننفذ العروسة بالماتيريال اللي تستحمل معاملة الأطفال ماتتكسرش بسهولة وكان عليها إقبال كبير الحمدلله, وبعد كده بدأ العمل يطلبوا مننا شغل جديد زي أنشطة مدرسية وزينة وفوانيس رمضان والحمد لله قدرنا نكسب ثقة عملائنا بجودة شغلنا والفنش الجيد للشغل بشهادة منهم, ولما بدأنا في تنفيذ ال doll house طبعا كانت فكرة جديدة للأطفال اكتسبناها من بناتنا لأني كنت بدوخ بصراحة لما أشتري لعب جديدة فعجبهم الفكرة جدا وخصوصاً أنها تفاعلية وتناسب البنات والأولاد كمان حسب الشخصية الكرتونيه اللي بيحبوها بنفذ البيت بيه, وبدأ الموضوع ينتشر مع أصحاب بناتي وكمان عملائنا وبقى فيه إقبال عليه بيوت العرائس لأنه نوع جديد من لعب الأطفال وكله من خامات آمنة للأطفال وبتعيش معاهم فترة طويلة من غير كسر َلا حاجة.
من هو أكثر الناس تشجيعاً لكما في العمل ؟
ملك وندى بناتنا بيشجعونا جداً وهما مقياس نجاح أي شغل أو فكرة جديدة بنعملها لأن بنقدر من خلالهم أننا نعرف تفكير باقي الأطفال, وطبعا تشجيع العملاء لينا ده بيخلينا نفرح قوي وعايزين نبتكر أكتر ونبقى على قد ثقتهم فينا, وعلى فكرة احنا لقينا إقبال من العملاء مش بس أنهم يشتروا منتجاتنا إنما اكتشفنا حبهم أنهم يتعلموا ازاي يشتغلوا الهاند ميد وبيسالوا كتير عن الخطوات, وطبعا لصعوبة الشرح في كومنت أو رسالة فكرنا أننا نفتح قناة تعليمية على اليوتيوب فيها كل خطوات الشغل من الأول للآخر والحمد لله كانت خطوة مهمة وناجحة بفضل ربنا وبفضل العملاء كمان لأنهم شجعونا جداً وكانوا مبسوطين.
ما هي الجوائز التي حصلتوا عليها ؟
الحمد لله حصلنا على شهادات تقدير من المعارض الفنيه اللي كنا بنشارك فيها, طبعا علشان الكورونا مكناش بنعرف نروح معارض واقعية وأغلب المعارض كانت الكترونية.
ما هي الأحلام الكبيرة التي تسعوا لتحقيقها ؟
نفسنا بإذن الله نعمل ورش تعليمية سواء للأطفال أو الكبار لأنهم بيطلبو مننا ورش وخصوصاً ورش لتعليم فن المصغرات وال Doll house وكمان نفسنا شغلنا يبقي براند مشهور في مصر والوطن العربي.
