الفنان الشاب “علاء خالد” فى حوار خاص لـ جريدة “عالم النجوم” ويكشف عن كواليس أعماله وحياته
إعداد وحوار: منار عبد الناصر
فنان شاب صاحب موهبة فنية قوية، له كاريزما مختلفة في سن صغير إستطاع التمثيل أمام كبار النجوم مثل ميرفت أمين وصلاح عبدالله وهاني سلامة وغيرهم وكان لنا حوار خاص مع الموهوب المتميز الفنان علاء خالد.. وإليكم نص الحوار
فى بداية حوارنا عرفنا بـ علاء خالد ؟
أنا علاء خالد عندي ٢٠ سنة عايش فى ٦ اكتوبر وكنت شقي جداً وانا صغير وعندي اخ اسمه عمرو واخت اسمها بسمة ونفسي اكون A1 جيلي فى التمثيل وديماً عندي احساس اني مش حابب أكون مجرد ممثل عادي فـ طول الوقت عندي طموح ونفسي احقق نجاح كل ثانية سواء على مستوى شغلي أو على مستوى دراستي أو في الحياة نفسي افتح اكتر من مشروع فـ طول الوقت عندي طموح إني نفسي انجح نجاح مش عادي في وقت قصير وسن صغير ودايماً بصلي واقول يارب وأنا واثق فى ربنا وموهبتي واني هحقق كل دة قريب جداً ونفسي برضو اكون مصدر طاقة إيجابية لكل الناس والشباب ف انا عندي احلام كتير جداً والأهم من كل دة اني احققها وان شاء الله هوصل لكل احلامي ف سن صغير.
كلمنا عن مشاركتك فى مسلسل قيد عائلي ؟
كانت تجربة جميلة جداً وبنيت جزء كبير من شخصيتي خاصةً اني محظوظ اني اشارك في عمل من بطولة ٣٠ نجم واني امثل مع استاذتي وحبيبة قلبي ميرڤت امين وعم صلاح عبدلله العسل و استاذي ووالدي اللي مربيني استاذ محمد رياض واستاذة ميرنا وليد وغيرهم كتير فـ كانت تجربة ممتعة بكل المقايس بالنسبالي كـ علاء خالد وبالنسبة كـ سليم وجية.
كيف كانت كواليس عمل مسلسل عمر و دياب ؟
مصطفي خاطر ده ألذ وأجمل ممثل ممكن الواحد يمثل قدامة في العالم وكان تمثيلنا أكثره ارتجالية مني أنا ومصطفى هو اخويا الكبير وحبيب قلبي وبعد لما خلصت قولته ان شاء الله هنتقابل قريب ف عمل تاني قالي ايه ده انتا خلصت كدة !! قولتلو اه .. قالي طب تعالى اعرفك وكان على ربيع واوس اوس قاعدين .. خدنى فى حضنه ودخل بيا عليهم وقالهم اعرفكم ب اخويا الصغير اللي هيقعدكم فى البيت علاء خالد ف اوس اوس قالو احنا كدة كدة قاعدين ف البيت تعال اقعد جنبنا وقعدنا قضناها ضحك وهزار .. حقيقي المسلسل كان كوميدي والكواليس كانت موجة كوميدي.
ما هي الادوار التي تحب أن تقدمها ؟
والله نفسي اعمل كل شخصية فى الشارع المصري وكل شخصية بعيدة عني وعن شكلي تماماً.. فـ نفسي اقدم ادوار كتير بس اكتر حاجة نفسي أعمل دور مدمن واعمل أكشن دي بجد أمنية حياتي فى اللحظة اللي بكلمك فيها دلوقتي ونفسي اعمل أكتر من شخصية ف كل ثانية بيكون نفسي أعمل شخصية مختلفة واقدمها بإسلوبي الخاص.
ما هو التمثيل من وجهة نظرك ؟
هو العيش بصدق فى ظروف خيالية.
مين أكتر حد بيشجعك ؟
هي كانت واحدة صاحبتي كنا مرتبطين ومكانتش بتحب اللي أنا كنت بعمله وكنت لما بخلص فيلم أو فيديو كنت بخليها تشوف شغلي فـ كان دائماً فيه طاقة إحباط غريبة ومفيش تشجيع منها ، فـ مشيت بالطاقة السلبية وقولت انا لازم انجح و اثبت لها اني صح وكمان مكنش مجرد ممثل لا انا لازم اكون A1 جيلي ، وعشان اثبتلها اني ناجح ومع كل خطوة الناس اللي كانت بتقف ف ضهري كانت بتزيد من جمهور لصحابي لأهلي، كل الناس بقوا واقفين ورايا وفى ضهري وهي اكيد بتشوف نجاحي وحتي لو مبتشوفش ف هي اكيد بتسمع عنه بس كده ،فـ بشكرها برضو عشان لولا وجودها وكلامها إللي كان بيحبطني مكنتش هكون موجود دلوقتي.
ايه أقرب عمل لـ علاء خالد ؟
والله كل دور بحب نفسي وبحس اني مولود من جديد وبكون ناسي علاء خالد تماماً و يتعايش مع الأحداث والكواليس بشكل غريب لدرجة اني عيني دمعت وزعلت ف اخر يوم تصوير فى مسلسل قيد عائلي وقلبي كان مكسور ان سليم باباه ومامته انفصلوا وزعلان ع كل حاجة بتحصل وبقول لنفسي يابني دة تمثيل انت ايه اللي بتعملو ف نفسك ده بس أعتقد اني بنسي نفسي مع كل شخصية وبتعيش جوايا .. فـ كل شخصية عملتها قريبة لقلبي جداً و مفيش حاجة اقرب من حاجة زي كدة مفيش حد من اولادك قريب لقلبك اكتر من التاني بتحبيهم كلهم بالتساوي في كل أدواري بحبها كأنهم أولادي بالظبط.
هل عملت صداقات في الوسط الفني ؟
انا بقي عندي خوات كبار فى الوسط الفني ممثلين ومخرجين ومنتجين ( أحمد الفيشاوي , نضال الشافعي , مصطفي خاطر , محمد رياض , محمد عز , هاني سلامة , صلاح عبدلله , ميرڤت امين , ميرنا وليد , المخرج تامر حمزة , وشادي أبو شادي والمنتج ريمون مقار ) ممثلين كتير جداً قريبين ليا وأصحابي بس أقربهم ( احمد الفيشاوي ونضال الشافعي وصلاح عبدلله ومحمد رياض ).
متى بدأت تحس انك اتعرفت فى الشارع ؟
والله من أيام ما كنت بعمل أفلام قصيرة ومع أول فيلم عملته الناس عرفتني وكانت بتناديني بـ إسم الشخصية فى الشارع ومن هنا عرفت إن الناس عرفتني بس مع كل عمل شهرتي بتزيد وعلاقاتي بتزيد وأعتقد لما وصلت للملايين على اليوتيوب والتيك توك ومواقع التواصل عرفت إن خلاص بقى هو كل يوم فيه ناس جديدة بتعرفني وبقيت مشهور ولما بقيت ادخل أي مكان لازم ناس تيجي تتصور معايا أو تيجي تسلم عليا.
مين من نجوم الصف الأول بتعتبرة قدوة ليك ؟
مع إحترامي لكل نجوم مصر والعالم كله بس “أنا قدوتي أنا” بعد ١٠ سنين أو قدام شوية ودايماً نفسي أعمل مدرسة تمثيل لوحدي ويكون ليا اسلوبي الخاص ف التمثيل .. وغير كل ده نفسي أوصل للعالمية بس من خلال بلدي ودة حلم كبير شوية فـ إن شاء الله أحققه فى المستقبل وأكون أول واحد فى العالم قدر يحقق العالمية من بلدة، فـقدوتي في التمثيل والفن هو علاء خالد في المستقبل.
علاء خالد .. لو مكنتش فنان كنت ممكن تشتغل ايه ؟
كنت هشتغل فنان عشان دي الحاجة اللي لقيت نفسي فيها وقلبي حبها وعقلي صدقه وأجمعوا على حاجة واحدة حب الفن والتمثيل.. وعندي طموح تاني خارج الوسط اني افتح كافيه أو مطعم وإن شاء الله يحصل ده قريب جداً .. وأياً كانت شغلانتي فى الحياة هتكون برضو برتبة فنان فى مجالي.
كلمني عن دورك في مسلسل بين السما والأرض؟
شخصية عادل تايسون فى مسلسل بين السما والارض اتبسط جداً بيها لأنها مش شبهي تماماً وانا طبيعتي اني بحب الحاجات اللي بعيدة عني وعن شكلي وعن شخصيتي فـ كانت من اكتر الحاجات اللي قلبي مرفر حرفياً وانا بقرأها وحتى قولت لنفسي هما اكيد مفكريني حد تاني عشان شكلي وشعري ولون عيني مش شبه عادل هما غلطوا باين ولا كان قصدهم حد تاني.. بس المخرج الاستاذ محمد العدل ومساعد أول أستاذ طارق الكاشف كان عندهم ثقة فيا وفى موهبتي فـ انا كنت لازم اكون قد الثقه دي وبشكرهم جداً
وحتى اتفاجئت ان الدكاترة اللي فى الجامعة بتاعتي حبوا شخصية عادل تايسون جداً وقعدو اتكلمو معايا عن المسلسل وفرحت جداً بردود فعلهم وانا فى التصوير برضو مسلمتش على أستاذ هاني سلامة وطول الوقت مش طايقين بعض حتى افتكر ان واحنا بنصور ال shot في حد من الطلاب اللي كانوا قاعدين فى المدرج قال الواد ده مستفز اوووي ونفسي اقوم اضربو فـ فرحت عشان استفزيت اللي موجودين واحنا بنمثل ف قولت مابالك بقا اللي هيتفرج فـ فرحت عشان شوفت النجاح بدري ومن قبل ما المسلسل يتذاع اصلاً وبعد ما خلصت روحت لأستاذ هاني سلامة وحضنا بعض وقالي انت شكلك واسلوبك غير تماماً اللي شوفته جوا وانت بتمثل .. انت ممثل موهوب وهتنجح فى المستقبل وابقى قول هاني سلامة قال
فـ قولتله يا نهار ابيض انا حظي حلو عشان بسمع الكلام ده من حضرتك وحظي وحش ان الكلام دة ماتصورش.. ده أنا بقوم كل يوم بقول لنفسي هبطل تمثيل خلاص عشان محبط قالي اوعي انت هتكون نجم قريب وركب العربية ومشي ( حسيت احساس غريب مفهمتهوش لحد دلوقتي بس دايماً بقول يارب)
ما هي الأكلة المفضلة عند علاء خالد ؟
الحمام واللحمة والجمبري وبحب كل الأكل بصراحة جداً ومؤخراً بقيت طول الوقت يلا ناكل وانا جعان بس دول اكتر اكل بحبهم اوووي والأقرب لقلبي بصراحة.
فى نهاية الحوار وجه نصيحة لكل شاب فى سنك وطموح ونفسه يوصل ؟
1 – طور من نفسك كل ثانية عشان تكون دايماً الأول فى السباق
2 – إرضي ربك إرضي باباك إرضي مامتك
3 – ابعد عن اي حاجة تعطلك وابعد عن المخدرات
5 – خليك دايماً طموح وعندك شغف
5 – متقعدش في قعدة انت مش هتتعلم منها ولا هتستفيد منها ب حاجة
6 – متخليش حلمك يعطلك عن دراستك بالعكس عشان أنا عندي حلم نفسي احققه وأكون الأول فية برضو فى دراستي هكون الأول فيها وكل سنة اجيب تقديرات وأعلى الدرجات
7 – ثقف نفسك طول الوقت واتعلم حاجات جديدة واول مرة تعملها
8 – اهزر واضحك من قلبك و متشلش الهم عشان ربنا كبير وقادر على كل شئ ومهما كانت احلامك كبيرة ومستحيلة فى الدنيا عند ربنا صغيرة وقادر يحققهالك كلها واكتر كمان ف غمضة عين.
