وسط زحمة الحياة .. بقلم / حمادة العسكري
وسط زحمة الحياه
أيوا تاهت الأماني
كل ماأمشي ف إتجاه
بتوه وبتغرب مكاني
عقلي شت وقلبي تاه
مفيش حاجه مطمناني
جوه قلبي جرح نازف
الجروح جوايا بارزه
تفيد بإيه بس أسف
ماتداويش حتى غرزه
الشده فرزت الحبايب
إتصفوا من أول فرزه
كل النوافذ مغلقه
إتعدمت عندي الثقه
كل ده بيدور معايا
بقت حكايه مرهقه
وسط الحياه في مدبحه
متاحه كل الأسلحه
حرب دايره في كل مكان
يدسوك عشان المصلحه
آن الأوان وكله بان
الشده عرت الغلاوه
خاب العشم مفيش أمان
مش غشم لأ دي غباوه
كتر التخلي والخذلان
علم القلب القساوه
بجد تسلم المواقف
البصر بيكون حديد
اللي كنت ف جرحه واقف
في جرحي إتفرج من بعيد
كتفي مال من الهموم
كل يوم وجع جديد
كل النوافذ مغلقه
إتعدمت عندي الثقه
كل ده بيدور معايا
بقت حكايه مرهقه
وسط الحياه في مدبحه
متاحه كل الأسلحه
حرب دايره في كل مكان
يدسوك عشان المصلحه
