ياسمين صبري لـ صاحبة السعادة… “عندي اكتفاء وبعرف اضحك على نفسي”
كتبت/ مادونا عادل عدلي
كانت الفنانة ياسمين صبرى، ضيفة في برنامج “صاحبة السعادة” للفنانة والإعلامية إسعاد يونس، المذاع على قناة Dmc
وقالت الفنانة ياسمين صبري: “فى ناس بتحب تبقى شاغلة الناس، ولكن انا شخصية عندى اكتفاء من جوايا وإن مش بدور أنى أشغل الناس وهي حاجة من عند ربنا”.
وكشفت ياسمين صبري: “الفنان محمود عبد العزيز في مسلسل جبل الحلال كان بيعاملنى أكنى بنته وبينصحنى وبيكلمنى، وقالى خلى بالك من الدايرة اللى حواليكى هما دول اللى بيوقعوا، وبحمد ربنا أن ربنا حط ناس كويسة في حياتى من بدرى، وغير انى بسمع للى حواليا أنا عندى عينين وبدور وأقول لنفسى أقدر أعمل إيه أحسن من كده”.
وأضافت: أنا بعرف أضحك على نفسى، يعنى مثلا لما بتفرج على حاجة لنفسى، وجه مشهد مش عاجبنى بقول يا نهار أسود وأحيانا بقلب القناة، ومش بكون متأزمة، وزى ما انا كده برده لما بشوف مشهد عملته حلو بشكر في نفسى زى مشاهد كتير في مسلسل طريقى عملتها حلو”.
ويذكر أن تعاقدت ياسمين صبرى على بطولة مسلسل جديد مكون من 15 حلقة للعرض في شهر رمضان المقبل، واستقرت ياسمين على سيناريو من تأليف محمد رجاء ووقع الاختيار على المخرج خالد مرعى لتولى مسؤولية العمل الذى يتم التحضير له حالياً حيث يجرى الاستقرار على الاسم للعمل وترشيح الفنانين المشاركين في البطولة.
والجدير بالذكر أن آخر أعمال ياسمين صبرى، مسلسل “فرصة تانية” الذى عرض في شهر رمضان 2020، وشارك في بطولته أحمد مجدى، هبة مجدى، أيتن عامر، دياب، ادوارد، محمود البزاوى، سارة الشامى، محمد أبو داود، نهال عنبر، اشرف زكى، عمر الشناوى، هبة عبد الغنى، عصام السقا، أحمد الشامى، ابتهال الصريطى، غفران محمد، هدى الاتربى، كريم عبد الخالق، ومعالجة دراما محمد سيد بشير وتأليف مصطفى جمال هاشم وإخراج مرقس عادل وإنتاج شركة سينرجى.
