ياسمين عبدالعزيز لـ منى الشاذلي “أنا موت فعلاً”
متابعة: ثريا الصاوي
استضافت الإعلامية منى الشاذلي النجمة ياسمين عبد العزيز اليوم الأربعاء في برنامج “معكم”على قناة cbc.
وذكرت الشاذلي في بداية الحلقة إن خبر مرض ياسمين عبدالعزيز أحدث فيضا من الدعوات: “ربنا ينجيكِ يا ياسمين” لأن لها رصيد من المحبة في قلوب الناس، وتحول الإنترنت إلى دفتر دعاء وللمرة الأولى تتكلم ياسمين عبد العزيز عن كواليس فترة مرضها.
واستقبل جمهور الحلقة ياسمين عبد العزيز استقبالاً حارا، وقالت في بداية حديثها: “مكنتش عارفة ان في يوم هطلع في برنامج اتكلم فيه عن حاجة زى كدة، كنت داخلة اعمل عملية بسيطة جدا ومش أول مرة أعملها، عملتها 5 مرات، وكنت اعملها وامشى على طول اروح شغلى ومحدش يعرف حاجة”.
وتابعت ياسمين عبد العزيز: “كان الدكتور بيقولى إزاي تستحملي الوجع ده إنتى بطلة، وأنا بطبعى مش شكاية، روحت أعمل العملية، قلت للدكتور العملية هتاخد قد إيه، قال ساعتين أو تلاتة، كان معايا أحمد وبنتى وصاحبتى، دخلت عملت العملية وكان فيه عملية تانية في نفس الوقت، يعني في شهرين عملت 4 عمليات، دكتور التجميل بيجمل بطني، طلعت من العملية بألم رهيب جدا وبصرخ وأقول أنا بموت”.
وأكملت: “فيه تفاصيل أنا مش فاكراها، من كتر ما كانوا بيدونى مسكنات ومخدر، البعض اعتقد إنى بدلع، بعد كام يوم الدكاترة قالوا لو مدخلتش أعمل عملية بعد ساعة هموت، حدث ثقب فى القولون وتسمم في الدم، دخلت العمليات وكنت حاسة إنى مش هطلع”.
واستكملت ياسمين عبد العزيز باكية: “وأنا داخلة قلت لأخويا الكبير خلي بالك من ياسمين وسيف أولادي.. كنت حاسة إنى هموت، ولما دخلت كانت حالتي صعبة، طلعوني من العملية على العناية المركزة”.
