شكل الدنيا ف عيني باخ .. بقلم / حمادة العسكري
شكل الدنيا ف عيني باخ
إحساس قلبي فجأه شاخ
نفسي أسافر كون بعيد
نفسي أغير المناخ
طعم حياتي مر خام
مجروح قلبي جرح تام
نفسي ف أي شئ جديد
إن شالله حتى ف منام
ماشيه الدنيا معايا عكس
إسمي ف دايره جنبه إكس
ماشي طريقي كعب داير
عمر ماثانيه وقفلي تاكس
تعبان جوه قلبي كبت
إتنين عندي زي سبت
حزني مش ضيف ولا زاير
نابت جوه قلبي نبت
دايما قلبي غير متاح
برج ف عقلي طار وراح
كل يوم بالليل بعيد
ذكريات أصعب جراح
عمري عدى مني ضاع
أمر الأيام آه مطاع
لاويه لقلبي كل إيد
واخداها معايا بالدراع
ماشي الدنيا معايا عكس
إسمي ف دايره وجنبه إكس
ماشي طريقي كعب داير
عمر ماثانيه وقفلي تاكس
تعبان جوه قلبي كبت
إتنين عندي زي سبت
حزني مش ضيف ولا زاير
نابت جوه قلبي نبت
