مراد فكري “حريقة” في مسلسل ولاد إمبابة وحوار خاص لجريدة عالم النجوم

مراد فكري يكشف عن حريقة ولاد إمبابة في رمضان 2020 وعن طقوسه الرمضانية

إعداد / دعاء نصر .. حوار / دعاء سنبل

مراد فكري الفنان الشاب الطموح ، الذي اشتهر بتقديم دور الشاب المنحرف أو ابن البلد والمناطق الشعبية، لفت الأنظار بدوره في مسلسل “ابن حلال” ، وفيلم “الألماني” ،يعتبر دوره في مسلسل “ابن حلال” عام 2014، حيث قام بشخصية “سيد صرصار”، نقلة في مشواره الفني ، الشاب الصاعد ، تخرج من الألسن و يتقن ثلاث لغات، ودرس في مرحلة التعليم الجامعي أيضا بالمعهد العالي للسينما .

أزاي بتقضي يومك في رمضان ؟ أيه الطقوس والأجواء الرمضانية الخاصة بيك ؟

الصيام طبعا ، قراءة القرآن ، الذهاب للمسجد أثناء التراويح وأثناء الفروض الثانية ، التجمعات العائلية فأنا بحبها جدا ، زيارة الأماكن اللي بيبقي فيها مناسبات لوزارة الثقافة زي القلعة ، زي ليالي المحروسة بمنطقة السيدة زينب ، زي مهرجان الأوبرا الحاجات دي انا بحبها جدا من ايام معهد سينما داخل لي مثلا في ١٤ ، ١٥ سنة مداوم عليها ف ده بالنسبة لي رمضان

أيه أكتر حاجة في التلفزيون كانت بتحسسك بشهر رمضان لما بتتفرج عليها ؟

اكتر حاجة في التليفزيون بتحسسني ان رمضان جه الفوازير ألف ليلة وليلة وبكار محمدا يا رسول الله والمسلسلات الدينية افتقدناها افتقدنا بقى لنا فترة المسلسلات الدينية افتقدنا بقى لنا فترة الفوازير بقت الفوازير عبارة عن ست كوم ومسلسلات كوميدي فقط لا غير ، كان الأول الفوازير بيكون فيها استعراض زي نيللي و زي شيريهان و زي نادين ووائل نور و حالفني الحظ ان اشتغلت مرتين في الفوازير ، اشتغلت مرة في الفوازير بتاعة نادين ووائل نور و اشتغلت في الفوازير بتاعة عبد الله محمود ومحمد سعد وياسمين عبدالعزيز اخراج محمد عبد النبي سنة ٢٠٠٣

مراد فكري : هتقدم ايه لجمهورك في رمضان 2020 ؟

هتشوفوني بقي في رمضان ان شاء الله السنة انا مشارك بعملين بعد غياب ٣ سنين عن الشاشة التلفزيونية راجع بشكل كوميدي من خلال مسلسل ولاد إمبابة وبشارك كضيف شرف مع الفنان ياسر جلال في الحلقة ال ١٦ و ال ١٨ مِن مسلسل الفتوة

والحمدلله رغم ان الحلقتين يعتبروا ٨ مشاهد بس انا بقول ان هو دور مهم محوري جدا هيغير الأحداث كلها بيعرف ياسر جلال حقيقة ناس بيقرر الانتقام منهم بعد الحلقة ال ١٨ و الدور كان كبير بصراحة وبعد كده أتعرض الديكور بتاع المسلسل أثناء العاصفة لانهيار كبير أدي لوقوع جزء كبير من الحارة

اضطروا انهم يرموها فأخذوا وقت فطبعا انتي عارفة ان رمضان على الأبواب مع وجود الكورونا وحظر التجوال وخوف كتير من الممثلين من النزول من بيتهم فاضطروا انهم يعملوا بعض التعديلات على الورق فخس الدور من عِشر حلقات لحلقتين ومع ذلك مارفضتهوش لاني بحب النجم ياسر جلال ولان عايز ارجع أشارك الناس في رمضان ، بس الحمدلله بعمل مساحة كبيرة جدا قد تكون حوالي ال ٣٠ حلقة أحد أبطال مسلسل ولاد إمبابة بدور كوميدي جدا “حريقة” وهو ولد من سكان حارة في شارع محمد علي عنده وطموح انه يبقى مطرب مهرجانات وبيحاول انه يلم فلوس من اي حتة علشان يسجل مهرجان واول ما بيلم الفلوس بيعرف قرار منع غناء المهرجانات بتبقي مفاجاة كبيرة جدا له بتأدي ممكن الي الجنان مثلا

تفتكر هيكون في تراويح ولمة العيلة السنة دى ولا الوضع اللى احنا في بسبب كورونا هيستمر ؟

والله طبعا نتمنى ان يبقى في تجمع في التراويح علشان نحس برمضان وعشان ده بيبقى ربنا مدينا زي عرض أوكازيون كده نغسل به ذنوبنا ونرجع به لقوامنا وثوابنا ، كمان انا من حي حدائق القبة و زي ما انتي عارفة حدائق القبة هو في جزء منه شعبي حوالي ٨٠٪؜ أو ٧٠٪؜ في حالة رقي بقاله فترة

بس انا برضه ميال في شهر رمضان أنزل الجزء الشعبي بتاع المنطقة عندنا لان بلاقي فيه اولاد صغيرين ماسكة الفوانيس وبتغني اغاني رمضان والناس مجتمعة سواء بقي على كافيهات على قهاوي ادام البيوت ، في ناس بتعمل قاعدات بعد مائدة الرحمن كده ويشيلوا الاكل يروحوا مجمعين الترابيزة دي ومنزلين عليها المشاريب الرمضانية ويقعدوا يتكلموا وبيهزروا في شهر رمضان و في التوبة و في العبادة فالواحد نفسه اكيد اكيد الحكاية دي تحصل تاني وعشمنا كبير بأن فيروس كورونا يبدا يهدا وان وزارة الصحة تاخد احتياطها بالنسبة لفيروس كورونا اكتر من كده وان هي تبقي يعني بمجرد ربنا يجعلها سبب وسند لينا في الوعكة العالمية دي ان احنا نرجع تاني لرمضان وطقوس شهر رمضان .

تحب تقول أيه لمحبينك وللشعب المصري بمناسبة قدوم شهر رمضان؟

احب اقول لكل الناس حبايبي كل سنة وأنتم طيبين في بيوتكم محميين وبفضل ربنا مباركين و بإذنك يارب ان شاء الله من كل الأوبئة ومن المشاكل احنا من الناجيين لأن مصر مذكورة في القرآن ومهدي لجميع الديانات السماوية أرض مباركة و ربنا بيحبها وعارف ان الشعب المصري شعب طيب وشعب صامد ادام كل المشاكل واللي احنا فيه يا جماعة مجرد اختبار من ربنا ، نتمنى منه عز وجل أنه يعديها علي خير ، كل سنة وأنتم طيبين ورمضان كريم ، ٢٠٢٠ تجمعنا علي خير ، اخوكم مراد فكري ابو داليدا