النجمة ميمي جمال تكشف لجريدة عالم النجوم عن سبب رفض والدتها الزواج من لحسن مصطفى 

كتبت / مادونا عادل عدلي 

نجمة من أهم نجوم الوطن العربي ، ترعرعت في أحضان الفن ونشأت في المسارح والسينمات وأحبت الفن وأحبها كثيرا 

من منا عندما يراها لم يبستم ففي وجهها قبول كبير فهي نجمة سطعت في سماء الفن 

وتواصلت جريدة عالم النجوم مع النجمة الكبيرة ميمي جمال لتتحدث وتكشفت عن تفاصيل لأول مرة عن تعرضها لـ الخيانة وعن تفاصيل كثيرة لها مع زوجها الراحل ووالدتها

هل بالفعل صرحتي قبل ذلك بخيانة زوجك الراحل “حسن مصطفى”

في الحقيقة كان في مسرحية بتتصور في الإسكندرية، و بيشارك فيها جوزي الفنان الراحل حسن مصطفى، وكانت هناك واحدة تشارك في المسرحية، من البنات الصغيرة، عمرها 18 سنة كانت بتمثل معاه” والبنت كانت بتدخل له الغرفة لوحدها، وتفضل تقول له شوف أنا كاتبة اسمك على أيدي، وكلام غير مقبول من بنت صغيرة مع رجل كبير وتلقيت اتصالا من إحدى السيدات في المسرح بالإسكندرية، أخبرتني بما يحدث، من حسن مصطفى مع البنت الصغيرة صاحبة الـ 18 عامًا، في الإسكندرية، وأن هناك شيئا غير مقبول، ومشاهد لا يقبلها أحد، أن حسن يقوم كل يوم بتوصيل البنت للبيت كل يوم، “ خيانة يعني وحدثت مشادة كبيرة، ولكن لم يحدث طلاق بسبب هذا الأمر 

لماذا حدث الطلاق بينك وبين استاذ حسن رغم كل هذا الحب؟

حدث الطلاق في مشادة كبيرة بعد أن أصبح الحب ينقص، وانشغلت في أكثر من عمل الحقيقة انا كنت بدلعه، ولكن في فترة ما الشغل خدني منه، فطلقني، وبعد فترة رجعنا لبعض بعد أن طلبت من أحد المخرجين التدخل و حل المشكلة و المشكلة كانت من عندي مش من عند حسن وكان هناك سوء تفاهم”.

حدثيني عن دخولك عالم الفن

في البداية أنا بدأت تمثيل وعندي 9 سنين، عملت فيلم “أقوى من الحب” مع المخرج عز الدين ذو الفقار، وكنت غاوية وبحب التمثيل لأنه كان بيجري في دمي من وأنا صغيرة” و كنت في مدرسة فرنساوي، وكان معايا بنت زميلة ليا، أبوها مساعد مخرج اسمه عبد الله بركات، وكانوا في الفترة دي بيدوروا على بنت تعمل (أقوى من الحب) مش نيللي ولا لبلبة ولا فيروز، لأنه عايز بنت جادة شوية مش بترقص وتغني، فزميلتي قالت لأبوها معايا بنت في المدرسة غاوية تقلد الناس وتقعد تمثل وروحت وقتها أقابله ووالدتي كانت معايا وأنا رايحة له، فقالي (أنتي عايزة تمثلي)، قولتله (نفسي أمثل)، فروحنا عمارة الإيموبيليا وقابلنا المخرج عز الدين ذو الفقار، وشافني وقالي (عيطي) فبصيت له وقولتله (مفيش حاجة تخليني أعيط)، فقالي (عارفة لو كنتي عيطتي، مكنتش خدتك، لأنك هتبقي بتمثلي وبتعملي أي حاجة، لكن أنتي كده بتحسي)، وخدني واشتغلت الفيلم ده وبعدها كملت دراسة في المدرسة لحد سن 13 – 14 سنة، وسمعت إن في الجامعة بيصوروا فيلم اسمه (بين الأطلال) وإن عز الدين ذو الفقار هو المخرج، فقولت بس دي فرصتي وجاتلي، فـ هروح وأقوله أنا اللي كنت بمثل معاك وأنا صغيرة، وفعلا خدت الدور ورجعت البيت مبسوطة جدًا” وبعد كده بدأت أعمل أدوار صغيرة، والشغل ده في دمي وجوايا وعايزة أمثل، وكان وقتها فيه مسرح اسمه “المسرح الحر” وكل الممثلين اللي فيه أساتذة في المعهد، واللي يمثل فيه كأنه دخل المعهد، فقولت مش مهم الأجر، أنا عايزة أدخل أتعلم رغم إني عندي الموهبة، فقولتش طالما مدخلتش المعهد يبقى أستفيد، واشتغلت في المسرح الحر وعملت معاهم 4 أو 5 مسرحيات”.

حدثيني قليلا عن زوجك الراحل حسن مصطفى ؟

زوجي كان شديد الغيرة عليا، وأي راجل بيحب الست بيغير عليها، ولما كان بيقولي كذا غلط كنت بسمع كلامه حسن مكنش صعب إلا في حاجات معينة زي اختيار اللبس بتاع المسرح، وفي الفترة اللي طلعنا فيها كان في انفتاح وأحضان وبوس وميكروجيب.. وهو إنسان شرقي، كان بيسيبني أمثل وكل حاجة، بس كان في حتة خشا”

حدثيني عن رفض والدتك للزواج من الفنان حسن مصطفى ؟

والدتي رفضت زواجي من الفنان الراحل حسن مصطفى، لأنه كان متزوجا من قبل ومنفصلا ولديه ابنة قالت لي “لا هو صغير ولا حليوة ولا غني ولا إنتي أول بخته، لكن أنتِ بنت صغيرة وشكلك كويس، وممكن تتجوزي جوازة أحسن من كده”.

ووالدتي قالت لي “أنتِ بدأتِ تشقي طريقك، ليه تتجوزي واحد أكبر منك في السن موظف زيه زيك ومفيش أي ميزة، وقلت لها إنه الوحيد اللي لما بقعد معاه بكلمه بيسمعني وبني آدم حساس وطيب، ومحتضني ودفيانة معاه”

حدثيني عن قراءتك للسيناريو عندما يعرض عليكي ؟ 

في البداية أقوم بقراءة السيناريو كاملًا عندما يُعرض عليا، ولا أقف عند دوري أو الشخصية التي أجسدها فقط، للوقوف على مدى التأثير الذي تقوم به الشخصية في الأحداث، وما إذا كان دوري مميزًا من عدمه، أم مجرد دور تقليدي ولا يوجد أي تطورات تحدث للشخصية.

وفي نهاية حوارنا نتمنى أن تعيش الفنانة ميمي جمال في سعادة وفرح وجريدة عالم النجوم تتقدم لها بخالص الشكر