كريم سامي مغاوري وسبب هجومه على نقابة المهن التمثيلية
إعداد/ نهى مرسي وحوار/ سعيد المسلماني
الفنان كريم سامي مغاوري، ممثل مصري، حاصل على بكالوريوس المعهد العالي للفنون المسرحية بالتمثيل والإخراج عام 2007. وهو نجل الفنان القدير سامي مغاوري، شاب خفيف الظل، طموح، ناجح، مقبل علي الحياة، يتمتع بشعبية كبيرة، يدخل القلب دون أستأذن، دخل مجال التمثيل عن طريق الصدفة، من خلال مسرحية “تكسب يا خيشة”، عام 1994، كما شارك كريم في عدد من الأعمال الفنية منها مسلسلات احلامك اوامر ستات قادرة، راجل وست ستات، ربع رومي، جوز ماما، بيت العيلة، السيرة العاشورية، مش ألف ليلة وليلة، مش فريندز، فيفا أطاطا، الجماعة2، بخلاف أفلام اوعى وشك، على جنب يا اسطى، وليه خلتني أحبك، حديد.
وفي حوار خاص مع الفنان كريم سامي مغاوري كان هذا اللقاء مع عالم النجوم :
الجزء الثالث:
لماذا هاجمت نقابة المهن التمثيلية وما وجه أعتراضك ؟
أنا بقالي فترة كبيرة جدًا بلاحظ إن نقابة المهن التمثيلية تكاد تكون في حالة تواطؤ في إظهار أو ترك اللا موهوبين ينتشروا على الساحة .. ودي حاجة أنا شايفها ومتمسك بيها جدا، الموضوع مبقاش زي زمان إن نسبة ال10% خارج النقابة لأ ده أصبح ال10% هنا النقابيين والباقي من برة.. أي حد بيفشل في مهنته بيروح يشتغل ممثل ، أي حد عنده شوية علاقات بيروح يشتغل ممثل ، أي حد عنده فولورز على الإنستجرام أو التيك توك أو غيره بيبقى ممثل .. والممثلين والدارسين والناس اللي دي مهنتهم الحقيقية متسابين مبيشتغلوش.. آه في ناس بتشتغل.
ولكن في عدد كبير جدًا أكبر بكتير حتى الآن مبيشتغلش ودي حاجة تضايق، في موهوبين بشكل كبير جدا تم تهميشهم والنقابة مخدتش أي موقف لإن تم وعد الناس في برامج إنتخابية من أعضاء المجلس بالتشغيل والوعود دي لم تنفذ حتى الآن وفي بعض المصالح الشخصية هي اللي بيتم إدارة النقابة بيها على حساب الأعضاء وعلى حساب الموهوبين لصالح اللا موهوبين .. ولكن أنا مازلت بقول إن الناس عندها وعي والناس جمهور هيعرف يفرز كويس جدا الموهوب والغير موهوب.. حتى لو غير الموهوب ده كان تريند لفترة أو شائع يعني في الموهوب هو اللي هيستمر هو اللى هيبقى هو اللى هيفضل ؛ والفن الحقيقي هو اللي هيستمر.
كريم سامي مغاوري لا ينتقد عمل فني بشكل سلبي ولا ينتقد فنان زميل حتى لو العمل أو الزميل مش عاجبه .. هل هذا صحيح ولماذا ؟
أنا شغلتي ممثل لو في حاجة عجبتني هقولها .. لو في زميل أو عمل ماعجبنيش يعني لو في حاجة ماعجبتنيش زي ما بنقول بالبلدي كده مينفعش أعمل الحاجة السيئة سعر ، مينفعش أحط عليها سبوت أو إهتمام ، لكن الجيد أو الكويس أو الحلو لازم أقول عليه.. لكن السيئ هتجاهله تماما مش هلفت الأنظار له خالص .. لإن ممكن إللي مش عاجبني يكون عاجب غيري فأنا كده بلقي عليه الأضواء وبحطه في مجال ودايرة اهتمام أنا المفروض محطوش فيها.. وفي ظل الفترة الحالية دي اللي إحنا فيها في شئ كتير على الساحة.. فلأ مش هنتقدم ولكن هبرز الجيد هقول الكويس.
