جهاز حماية المستهلك يلزم «غبور» باسترجاع سيارة «شيري تيجو» بعد عامين ونصف بسبب عيوب الصناعة
متابعة: تامر عادل
تجربة مثيره أثارت مواقع التواصل الاجتماعي خلال الساعات القليلة الماضية، رواها صاحب سيارة «شيرى تيجو» موديل عام 2019، أشاد خلالها بجهاز حماية المستهلك والذي أنتصر لحقوقه ضد عيوب الصناعة بسيارته ضد شركة «غبور اوتو» وكيل شيرى تيجو في مصر، وألزمت التوكيل باسترجاع السيارة بعد نحو عامين ونصف من الاستخدام، بعد ظهور عيوب صناعة بها.
وقال محمد حسنى صاحب التجربة التي أشاد خلالها بجهاز حماية المستهلك على صفحته على «فيس بوك» ونشرتها أغلب صفحات توكيلات وأصحاب السيارات :” لما نتكلم على جهاز محترم.. نبقى بنتكلم على جهاز حماية المستهلك تجربتي معاهم أكتر من رائعة.. إشتريت عربيه شيرى تيجو 2019.. وبعد سنتين ونص اكتشفت إن البويه بتقع من على العربية لوحدها.. فى أماكن متفرقه. وأنا مش باعمل صيانة فى التوكيل نهائي.
وتابع صاحب الشكوى:” رحت التوكيل قبل رمضان بيومين فى الأول رفضوا بحجة إنى مش باعمل صيانة عندهم.. ومع إصرارى قالولى سيب العربية وهانشوف وعلى مدار 20 يوم رحت 3 مرات والعربية إتعرضت على 3 جهات من داخل التوكيل وكل لجنه بتقول وبتأكد إن ده مش عيب صناعه ده مؤثر خارجى.. يعنى ايه ياجدعان مؤثر خارجى؟؟؟.. وانت ماشى الكاوتش بينطر زلط بيجرح البويه من على الاعتاب.. طيب والسقف والكبوت والشنطه ؟؟ مانعرفش.
وأضاف صاحب الشكوى:” المهم مش عيب صناعه وتقريبا طردونى.. عملت شكوى فى الجهاز المحترم مرفقه بالصور.. كلمونى وجابو الممثل القانونى لغبور على الخط.. حاول يتهرب من المسؤليه بحجة انى مش باعمل صيانه عندهم..لكن الشخص المحترم بتاع الجهاز كان صارم جدا.. وقاله كلامك مش منطقي.. بتاع غبور قاله خلاص يجيب العربيه نعملهاله.. ونعمله خصم 10%. أنا رفضت.. ممثل الجهاز قال العربية مش هاتروح التوكيل تانى.. تتعرض على لجنه من كلية هندسه فرع المطريه.. وأنا ادفع الرسوم.. حوالي 2600 جنيه. وأن طلع القرار في صالحى استردها. وافقت طبعا.”.
وتابع:” ورحت كلية هندسه ودفعت 2640. وغبور كان باعت 2 من عنده يحضروا الكشف.. حاولو يتدخلوا.. لكن إتفاجأت إن بتوع كلية هندسه مش بيهزروا.. وقالو التقرير خلال اسبوعين بيروح على الجهاز. بعد اسبوعين كلمني الجهاز وجاب بتاع غبور على الخط. وقال التقرير طلع ان العربيه بها عيوب صناعه يصعب اصلاحها.. وسألونى على طلباتى.. قلتلهم قولا واحدا.. الاسترجاع او الاستبدال. طبعا بتاع غبور هايتجنن.. قال طيب نعملها على حسابنا. أنا رفضت.. قالولى القرار النهائي بعد اسبوع.. وطلع الاقرار النهائي الملزم. الاسترجاع أو الاستبدال.. وبالفعل عملت عقد مسجل لغبور ورحت رميت لهم العربية وأخدت فلوسي مخصوم منها جزء بسيط قيمه الاستهلاك وده قرار الجهاز.. مشيت من غبور منتصر.. يمكن بعد 6 شهور اه. بس النتيجة مرضيه”.
ووجه صاحب الشكوى التحية لجهاز حماية المستهلك قائلاً:” تحياتي لجهاز حماية المستهلك.. تحياتي لكل شخص مش بيسيب حقه.. مش تحياتي لغبور فيه حاجه مهمه.. إحساس الانتصار ده لإنك لما تلاقى نفسك لوحدك بطولك ضد كيان كبير وهو يحاول يستعرض قوته ونفوذه وانت تنتصر فى النهاية. غير إنك بتكون سعيد إنك رجعت حقك.. بتكون سعيد إنه حاول يستهين بيك وبذكائك وماقدرش”.
