روضة عارف من البيزنس إلى الإعلام.. أيقونة إعلامية لها تأثير إيجابي في المجتمع
كتب : ايثر عمرو
كثيرًا من الناس تندهش ويظهر فى ذهنها علامات إستفهام حول دراسة روضة عارف البيزنس و أيضاً عملها فى الإعلام و حدثت طفرة و هذه من ضمن الصعوبات التي واجهتها لأنها اثبتت نفسها في مجال صعب ومتسع الآفاق رغم عدم دراستها له وإليكم الآن الحوار لفك الألغاز .
روضة عارف كيف بدأت مشوارها وما هي نقطة التحول التي بسببها اصبح لكِ أثر كبير على سوشيال ميديا ؟
انا روضة عارف عندي 21 سنة، في الفرقة الرابعة إدارة اعمال، انا بكتب من وانا عندي 13 سنة، زمان التكنولوجيا مكنتش بالتطور ده فـ مكنش فيه مساحة او فرصة أنشر فيها و بدأت نشرها على السوشيال ميديا من 3 سنين وبدأت تنال أعجاب أشخاص ويتفاعلوا عليها و يتأثروا بيها فـ ده شجعني أستمر خصوصًا بعد ما لقيت أصحاب مواقع إلكترونية بتعرض عليا أن أنشر فيها.
وبالفعل بدأت أنشر مقالات في موضوعات مختلفة عن مُشتتات الوقت و استثمار الذات وكل ما يخص التنمية الذاتية وعلم النفس ، فـ نقدر نقول إن بدايتي كانت الكتابة و في أثناء اجازة كورونا حبيت أستغل معلومات دراستي و طورتها بكورسات ذاتية اونلاين و بعدها بفترة قدمت محاضرات اونلاين في التسويق لأصحاب المشاريع الصغيرة و الحرف اليدوية
وسبب التحول بشكل كبير هي إن إتعرض عليا من إعلامي عجبته كتاباتي أن أكون إعداد تحريري للبرنامج بتاعه و بالفعل وافقت و بدأت و نجحت جداً في الموضوع لما إتعلمت في الشغل اكتر و بقيت بسلط الضوء علي أشخاص تستحق الدعم والظهور لكن تعلم الشغلانة و ممارستها مكنش لوحده كفاية سوق العمل مُختلف تماماً عن الدراسة و التعامل مع الأشخاص اللي بتشوفها في مسيرتك فـ بقيت بطور من مهاراتي
وبنصح أي شخص بيقرأ المقال ده إنه مهما كان شاطر في شغله فـ هيزداد تفوق أكتر لما يجتهد و يشتغل علي مهاراته، و بعد شهور إترقيت و بقيت رئيس تحرير البرنامج و بزاول مهنة الإعداد بشكل رسمي لكن كنت مازالت لسه بطمح لأكبر و بتوفيق ربنا إشتغلت مع رئيس مجلس إدارة قناة الحدث اليوم أستاذة عبير الشيخ مُقدمة برنامج كلام هوانم. ثم إعداد برنامج كلام حوا علي قناة النهار. و مقالاتي أصبحت تتنشر في جريدة الجمهورية و الأخبار اليوم الورقيين.
سبب نجاحي هو الأثر اللي قدرت أسيبه وسط الناس كنت بفرح جدا و مازلت اما حد يقولي إن حياته إتغيرت بسبب مقال بقلمي او فرصة ربنا حطني في طريق شخص محتاجني عشان اوفرهاله او كنت سبب في ظهور اول شخص في التلفزيون او نصيحة لشخص في وقت هو محتاجها فيه اتمني الناس تفتكرني بالخير دايماً، لما نجحت محبتش أنجح لوحدي و زي ما ربنا وفقني و يسرهالي في حاجات كتير وصلتلها حبيت كمان أسهلها ع غيري و بقيت كل فترة أنشر مقالات للشباب في مواقع و جرايد مُختلفة و خدت لقب الأيقونة و في شهر إبريل إتنشر مقال عن الشخصيات المؤثرة في السوشيال ميديا و كنت ضمنهم.
ايه اللي روضة عارف بترسمه فى طريقها بس لسه محققتوش ؟
حلم من أهم أحلامي من سنين أن أشوف كتاب علي رُفوف معرض الكتاب و يكون بأسمي فـ بالفعل بدأت الفترة أتفرغ لكتابة كتابي و هيتنشر في الوقت المناسب لأن عايزه أبذل كل جُهدي اللي يخليه كتاب فريد من نوعه.
بما تنصحي الكُتاب في بدايتهم ؟
انصح كل كاتب إن يستمر وميأسش الفرصة بتيجي في الوقت المناسب وان السوشيال ميديا بقت بتوفرلنا مساحة لنشر افكارنا ومقالاتنا و إنك تقدر بقلمك تغير العالم و من خلالها هتيجي الفرص اللي تفتحلك فرصة في مكان أكبر وعايزة اوجه رسالة لكل موقع او جريدة إن يوفروا عامود ثابت للكُتاب الشباب و ميصعبوهاش عليهم.
ومش شرط يبقا كاتب كبير او عنده متابعين عشان نوفر للشخص مساحة نشر، كل شخص بيكتب بيشارك من أفكاره وروحه مع العالم حتي لو فيه شخص واحد بس هيتأثر بيها..
ما هي أكتر الأشياء التي اثرت عليكي بالسلب وقدرتي تتخطيها بنجاحك؟
انا بشبه السلبيات بالعواميد اللي بتكون في الطريق، فـ تخيل وانت سايق إلتفيت عشان تبص وراك طبيعي تلبس في عامود فـ عشان كدا طول مانا عندي هدف و عايزة احققه بركز بس في طريقي وإني أوصل ومبحاولش ابداً التفت لأي شئ ورايا واصعب حاجه ممكن قابلتني هي لما لقيت تعليقات من ناس بتقولي ” روضة إنتي قدوتي ” ، عشان مش مهم تبقا مُبهر، المهم تبقا حقيقي.
