محمد حسني يتحدث عن طقوسه الرمضانية وعن ما أفتقده في رمضان
اعداد وحوار/ دعاء نصر
محمد حسني حاصل علي بكالوريوس تجارة التحق بأكاديمية الفنون لدراسة النقد الفني وهو من مواليد المنصورة ، التحق في بدايته بمسرح جامعة المنصورة كلية التجارة .. ومن بعدها التحق بأكاديمية الفنون لدراسة النقد الفنى.
قدم العديد من الأدوار من أشهرها مسلسل “الدالي” الذي أدي فيه دور ضابط أمن دولة (عاصم) والذي عرفه من خلاله الجمهور عبر قفشاته الكوميدية إلى جانب أدواره في مسلسلات ” سلسال الدم ” مع الفنانة عبلة كامل ورياض الخولي في أجزائه الثلاثة مسلسل ” شطرنج “.
ما الأجواء الخاصة والطقوس التي تداوم عليها في شهر رمضان الكريم؟
الأجواء والطقوس طبعا هي طقوس ذي يعني انا من المنصورة فا في منطقة المنصورة بتحب تحتفل اوي بشهر رمضان وبنزين شوارعنا وكنا حريصين طبعا على القرآن على الصلاة في المسجد على التراويح دايما الصيام. يعني طقوس كده جميلة بنحتفي بشهر رمضان. و يعني بيبقي فيها التزام اكتر و ث فيها صيام وفيها قرآن وفيها مصحف حاجات كتيرة كويسة و دي طبعا الطقوس التي كنّا حرصين عليها. وتزور العائلات والموائد ، كان في طقوس حلوة طقوس دافية يعني يارب يارب السنة دي الأمور تتحسن ونعرف نعيشها ان شاء الله.
الفنان محمد حسني ايه الشئ اللي كنت بتحبه في رمضان زمان افتقدته في رمضان دلوقتي ؟
يعني انا مع الانشغال. والحياة العملية والانتقال من محافظة لأخرى وكده بتفقدي طبعا لمة العيلة ولمتهم حوالين ترابيزة واحدة بناكل طبعا كلنا فيها التزاور يعني بنحاول بقدر الإمكان نعمل ده بس طبعا بالتقنيات الحديثة زي التليفون اللي سهل المأموريات اللي هو مكالمة تليفون دلوقتي ولا رسالة. لكن طبعا ده مايغنيش عن لمة العيلة و الدفا اللي في لمة العيلة كلها حوالين يعني سفرة واحدة بناكل فيها كلنا دي الحاجات اللي بنفقدها ولمة حتي الناس في الشارع الدفا بتاع الأحياء الشعبية اللي هو بقينا نفتقده بجد .
أكتر حاجة في التلفزيون كانت بتحسس محمد حسني أن رمضان أما بتتفرج عليها ؟ وايه رأيك في اللي بيتقدم في رمضان دلوقتي ؟
طبعا الفوازير زمان لما كنّا بنستنى عمو فؤاد والفنانة نيللي والفنانة شيريهان و سمورة وفطوطة دي كانت علامات بتحسسنا برمضان اوي وطقوس رمضان طبعا افتقدناها دلوقتي. وحتى بجو المسلسلات والكلام ده كله برضه ، لا كان الأول طعمه احلي كانت اللمة حوالين التليفزيون قناة واحدة. ولا قناتين دي بتخلينا كلنا كان فيها سعادة اكتر. اعتقد ان كان فيها سعادة اكتر ، التطور ده لازم هيحصل بس احنا للاسف في تطور كتير بيخلينا نلغي حاجات اللي فيها الدفا يعني الدفا بتاع الأسرة ، متابعة حد زي عمو فؤاد الله يرحمه يعني ده بيخلينا كنا بنبقى مبسوطين اكتر
التقدم بيحصل ومحدش يقدر ينكره ده لازم ان ده سنة الحياة وكده بس هي الحكاية كلها ان احنا زمان احنا عشنا فترات احلى مثلا بالعرايس ، بالبرامج القديمة ، ده كان بيحسسنا احنا كأطفال صغيرين بأن رمضان فعلا جه. ده علامة من علامات رمضان ان البرامج تكون موجودة. المسلسل الواحد اللي هو في القناة الواحدة اللي بنتفرج عليه مثلا زي ما اتفرجنا علي رافت الهجان الحامية ، زيزينيا و أرابيسك الحاجات دي كلها برضه كان بيبقى لها نسبة مشاهدة أعلى من دلوقتي كتير طبعا. و تفاعل اكتر من دلوقتي كتير لان انتي بتتكلمي في تعدد القنوات ده خلي يمكن اه لو نزل مثلا عشرين مسلسل ولا تلاتين مسلسل اه هتتفرجي في الاخر علي واحد ولا اتنين والباقي كله هتعدي عليه كده لكن يختلف الموضوع عن زمان لما كنتي تتابعي
أيه أكتر أكله بتحب تاكلها من وانت صغير أول يوم رمضان ؟ واكتر اكلة بالنسبالك بتميز رمضان ؟
أكتر أكلة بحبها طبعا كانت الوالدة الله يرحمها كانت ست بيت كويسة جدا. وطباخة محترمة جدا بس اللي نفتقده مش الأكلات اللي نفتقده الدفء اللي هو حتى لو كنا بناكل عيش وجبنة بس لمة الأسرة اللي بتديها طعم تاني خالص طعم احلي بكتير فهو ده اللي الواحد مفتقدة لمة الأسرة الكبيرة حوالين اكل حتى لو كان فول وعيش بيبقي له طعم مختلف تاني خالص بيكون له طعم احلي كتير وكأنك بتاكلي مثلا ديك رومي ولا حاجة بس دي اللي كانت بيدي اللمة طعم حلو .
تفتكر هيكون في تراويح ولمة العيلة السنة دى ولا الوضع اللى احنا في بسبب كورونا هيستمر ؟
لا طبعا اتمني يارب اتمني واعتقد ربنا رحيم بينا و رحمن رحيم فأكيد ان شاء الله رمضان يارب تكون الغمة انزاحت والأزمة اتحلت فنعرف ننزل مساجدنا نعمر المساجد تاني. نصلي التراويح نصلي صلاتنا في المسجد يارب ربنا تقبلنا يارب. وتقبل منا دعاءنا وترجع الأمور. ويحفظنا ونرجع نصلي في المساجد تاني يارب ان شاء الله ويزيح عنا الغمة. لان هو سبحانه هو الوحيد القادر على رفع البلاء ده فاحنا نرجوه. وبنتوسل وبنتضرع يارب تنزاح الغمة و نرجع نصلي التراويح ونصلي في مساجدنا والمساجد تنفتح تاني يارب ان شاء الله .
تحب تقول أيه لمحبينك وللشعب المصري بمناسبة قدوم شهر رمضان؟
احب اقول لمصر ولشعب مصر ربنا يحفظكم جميعا ويحرصكم. ويحميكم وربنا يرفع عنا الوباء يارب ان شاء الله ونعيش رمضان زي ما بنحبه. و زي ما بنتمناه. وندخل مساجدنا. ويترفع الادان في المسجد والصلاة وان شاء الله تبقي ايام سعيدة. ويارب ربنا يحفظنا. ويحفظ مصر يارب ان شاء الله. واحنا في امان احنا في امان الحمدلله أمان من عند ربنا برضه احنا لو بنبص للي بيحصل في البلاد التانية. وبنشوف عندنا احنا الحمدلله علي كل شئ برضه باللي عندنا الحمدلله علي كل شئ احنا في امان. فيارب يارب بزود علينا الأمان. ويحمينا دايما ويحفظنا. وكل سنة واحنا طيبين وكل سنة ورمضان كريم علينا يارب ان شاء الله وعيد سعيد علينا. وكل سنة واحنا بخير ان شاء الله وشكرا .
كلمة أخيرة بس أحب أوجها لشعب مصر ولكل الناس اللي بيحبونا وبنحبهم. وبقولهم حمايتك فعلا انك تبقي في بيتك يعني فعلا التواجد في البيت ده اضمن ليك واضمن لينا. و أضمن لأسرتك ولابوك ولامك. ولكل حد مهم بالنسبة لك خليك فعلا خليك في البيت عشان لغاية ما تنزاح الغمة نلتزم بالتعليمات نغسل ايدينا نعمل كل الإجراءات الاحترازية اللي مطلوبة مننا. و ربنا يارب يعدي الأزمة علي خير. وخلونا واهو فرصة كويسة اننا قعدنا في بيوتنا. او بنشوف أسرنا وبنتواصل وبنطمن علي بعض فخليكم في البيت. و ربنا يحفظنا ويحمي مصر. ويحميكم جميعًا يارب. ويخرجنا من الغمة دي علي خير وكل سنة وأنتم طيبين .
