كيفية إزالة الأحكام الجنائية من الحاسب الآلي لوزارة الداخلية
بقلم: ريهام مرتضي البنا
في حالة وجود حكم جنائي سابق عندك حكم جنائي وبيظهر في الكماين أو المطارات أو الفيش والتشبيه والموانئ وعايز تزيله عشان ترتاح.
بداية يجب توضيح أن الأحكام الجنائية ثابتة في ثلاث أماكن تابعة لوزارة الداخلية وهي :
اولا : شبكة وزارة الداخليه التابعه للسجل المدني ودي بيظهر عليها الأحكام النهائية التي المتهم نفذها فعلا وهي دي الاحكام اللي بتظهر في الفيش دون غيرها ودي بتبقي طريقة مسح الحكم منها عن طريق طلب رد الاعتبار وده طلب يتقدم لمحكمة الجنايات التابع لها سكن المتهم بشرط ان يكون عدي علي تنفيذ الحكم المدة القانونية. مع الأخذ في الاعتبار أن أول جنحة مبتنزلش في الفيش .
ثانيا : شبكة ادارة تنفيذ الأحكام التابعة للأمن العام ودي بتظهر عليها أي قضية اخدت حكم حتى لو مانفذش فيها المتهم ودي اللي موجودة في الكماين والاقسام بس مابتنزلش في الفيش الجنائي لو المتهم مانفذش فيها حتى لو عليه عشر قضايا بس لو المتهم راح يعمل فيش بيروح يستلمو تاني يوم ممكن بتوع المباحث يكشف عليه ويمسكو وهو رايح يستلمو . عشان تشيلها من الحاسب تجيب شهادة من الجدول وتروح المديرية او الامن العام وحدة تنفيذ الاحكام اللي في طره وبطاقه المتهم وهما يبعتو يستعلم عن صحة الشهادة لو سليمه يسددوها وطبعا بتمضي أن الشهادة سليمة .
ثالثا : شبكة المعلومات الجنائية او كارت التسجيل الجنائي ودي بتبقي عبارة عن كارت معلومات للمتهم فيه اسمه واسم والدته وشهرته وسوابقه ودرجة خطورته ومواصفاته الجسدية وده هما عاملينه عشان يقدروا يعرفوا المسجلين خطر وده بيبقي عن طريق لما متهم بيخرج كفاله او براءة بيطلع في عرض المباحث بيبعتوا المتهم لمديرية الامن عشان يتسجل أنه متهم في قضية كذا
– والحقيقه ان ده صعب جدا انك تشيل اسم متهم من عليه لأن وزير الداخلية أصدر كتاب دورى رقم 7 لسنة 2013 بشأن الشروط الواجب توافرها لكي تمسح اسم من المعلومات الجنائية وهي أن يعدي خمس سنين على آخر اتهام دون صدور حكم بعد كده في لجنة تنعقد في الأمن العام كل تلات شهور بتقدم لها الطلب .
المشكله ان ساعات اللجنة ترفض المسح بحجة أن العنصر المتهم خطر عشان كده أساتذة محامين رفعوا دعوى في مجلس الدولة اسمها محو وشطب المعلومات الجنائية من كارت المعلومات الذكي وهناك العديد من الأحكام التى صدرت لصالح المتهمين فى هذا الشأن .
