أريد حلاً بقلم: نيفين نصار
انا رجل عندي 58 سنة بشتغل مهندس مدير ادارة مشروع في الكويت راتبي ولله الحمد 1800دينار كويتي، مشكلتي هي انا حاسس بالوحده وعايش كأنى ميت زوجتي و4 أولادي في مصر محدش بيسأل عليا خالص غير كل اول شهر عشان احول لهم فلوس لكن محدش يكلمنى يقولى عامل ايه واحشني يا بابا حتى برجع من الشغل كانى داخل القبر مش راجع البيت، حاسس انى مليش لازمه غير انى اله الفلوس وبس نزلت اجازه شهرين بس ملقتش انتماء من الأولاد ولا امهم ولا كأنهم يعرفوني اصلا ..فكرت انزل استقر في مصر قولت غربة بغربه ولاكن انا معنديش اي دخل في مصر وكمان اولادي مينفعش ينزلوا عن المستوى الي كانوا عايشين فيه +أنهم في جامعات خاصه ال4+اشتراكات نوادي اقساط سياره لكل واحد وأمهم، وكمان مطلوب منى شقة لكل واحد منهم عشان يبقى يتزوج فيها، حاسس انى حملت نفسي ما لا اطيق من الالتزامات وفي الاخر هموت وحيد جالي القلب والضغط والسكر ومحدش بيرفع عليا سماعة التليفون ومينفعش انزل قبل ما اسدد الي عليا وكمان فلوسي خلصت كل الفلوس بحولها مصر ولا بتكفي مصاريفهم حاليًا والاقساط اللي بيطلبوها حد يقولي اعمل ايه بالله عليكم اولادي حاسس انى ظلمتهم وظلمت نفسي معاهم ودلعتهم زياده عن اللزوم لدرجه انهم ميعرفوش قيمة الفلوس و طلباتهم مجابه على طول..انا فعلا اتدمرت نفسيا وحتى صحتي لا تسمح انى اعمل لوظيفة تانية لتسديد التزامتي وشكرا ..
حل المشكلة
أولاً: دى ضريبة الغربة كان لازم من الأول تأخذ زوجتك معك لو الظروف لا تسمح يبقي كنت تحط النقط على الحروف.. الحقيقة حضرتك اللي عملت في نفسك كده .. كان لازم يعرفوا قيمة القرش ده.
ثانيًا: كان لازم تكلمهم كل يوم تكلم مراتك وتهتم فبالتالي هي هتتكلم وتصر علي انك تشوف ولادك وتكلمهم تطمن عليهم تعرف بيعملوا اية مصاحبين مين ايه أهدافهم وطموحاتهم تتكلم معاهم تحسسهم بوجودك انت رب الأسرة… .. واعتقد أن الانترنت سهل كل حاجه حاليا .. لكن الحقيقة حضرتك تركت المسئولية كاملة للام.. طبعا اللوم مش عليك لوحدك ولكن على الام كمان .. بس انت عودتهم علي انك اله فلوس فقط فين دورك كأب تتابع ولادك ومراتك و تحتويهم حتي لو بعيد ويكونوا منتظرين رجوعك .. وكمان كنت المفروض تدخر جزء من الفلوس لحين نزولك لبلدك بقرار نهائى .. وكنت المفروض تعودهم أن مش كل حاجه مجابه الأهم فالاهم، متزعلش مني دى ضريبة الغربة وده اللي اتعودوا عليه العمر ده كله بأن كل طلباتهم مجابه مفيش حاجة هتقدر تغيرها .
بس يا ترى السؤال المهم هنا الأطفال لما يكبروا ويكون شباب وبنات زى الورد و طلباتهم كلها مجابه !!!
هل يكونوا على قدر من المسئولية في حياتهم أم لا ؟
هل يعتمد عليهم في المستقبل أم لا ؟
ضريبة الغربة قاسية جدًا
