جمال يوسف لـ عالم النجوم: نور الشريف مدرسة خاصة في الثقافة والفن 

حوار/ حمادة سليمان أبو الوفا

بعد غياب يعود من جديد الفنان جمال يوسف للشاشة الفنان الجميل المبدع احد مبدعين الفن يحكي تفاصيل مرضه واخر اعماله وحكايات كتير في حوار خاص لجريدة عالم النجوم 

هو ممثل تليفزيوني وسينمائي مصري، شارك في العديد والعديد من الأعمال، ومن أهم أعماله التي شارك بها: مسلسلات (التوأم) عام 1997، (أم كلثوم) عام 1999، (البحار مندي) عام 2001، (فارس بلا جواد) عام 2002، (الليل وآخره) عام 2003، (عباس الأبيض في اليوم الأسود) عام 2004، (مبروك جالك قلق) و(ريا وسكينة) عام 2005، (حدائق الشيطان) عام 2006، ومسلسل (القاصرات) عام 2013، كذلك شارك ببعض الأفلام، ومنها: (صعيدي رايح جاي) و(أيام السادات) عام 2001، (فيلم هندي) عام 2003، وفيلم (الغابة) عام 2008.

كلمني على بداية أول عمل ليك ومين اللي رشحك ليه؟ 

أول بدايتي كانت فرقة الاستاذ محمد صبحي (بالعربي الفصيح) اما اول عمل ليا كان مسلسل (زيزينيا) كان اخراج الاستاذ جمال عبد الحميد وبطولة الدكتور يحي الفخراني واثار الحكيم، وكان في مسلسل اسمه (كعب داير) والاتنين تعرضوا في وقت واحد. 

ما هو العمل الاقرب لقلبك في مجمل اعمالك الرائعة عبر مشوارك العظيم؟ 

انا عملت مسلسلات كتير لكن الأقرب ( بنت بنوت ) كان تأليف الاستاذ محسن زايد وإخراج الراحل الأستاذ ياسر زايد و كمان مسلسل (قانون عمر) بطولة حمادة هلال وإخراج الأستاذ أحمد شفيق وتأليف الأستاذ فداء الشندويلي و المسلسلين دول كانوا قريبين جدًا من قلبي وكان في مسلسل تاني اسمه (قسمتي ونصيبي) بطولة بثينه رشوان واخراج الأستاذ رضا النجار كنت عامل فيه دور جديد عليا. 

حضرتك بتحضر لحاجة جديدة في الفتره اللي جايه وفي حاجة لـ شهر رمضان؟ 

بصور حاليا مسلسل اسمه( حضرة العمدة) بطولة الفنانة روبى والفنانة وفاء عامر والفنان احمد بدير والفنان محمد مهران والفنان إيهاب فهمي ومجموعة كبيرة جدا من الفنانين الكبار، اخراج الأستاذ عادل أديب وان شاء الله يكون عمل كبير هيتعرض ان شاء الله في شهر رمضان وان شاء الله ينال اعجاب الجميع. 

نفسك تشتغل مع مين من المخرجين والفنانين الكبيرة و ما هو الدور اللي انت بتحلم ان انت تقدمه؟ 

طبعا كان نفسي أشتغل مع الأستاذ عاطف الطيب وفي مخرجين طبعًا كتير اوي اوي اللي هم موجودين دلوقتى زى الأستاذ ياسر سامي نفسي اشتغل معاه جدا وفي طبعا الأستاذة مريم ابوعوف، والأستاذة مريم الاحمدي و الأستاذة مي ممدوح. 

في مجموعة مخرجين عندنا الصراحه شطار جدًا وشغلهم عالي جدًا جدًا وعندهم فكر. 

من هو اكثر شخص واقف معك في محنتك المرضية وعايز تقول له شكرًا على وقفتك معايا؟ 

اللي وقف معايا نقابة الممثلين ممثلة في الأستاذ الدكتور أشرف زكي الي لسه ناجح في الانتخابات وبقوله الف مبروك مدام نهال عنبر الفنانة الكبيرة ومدام عفاف رشاد وناس كتير جدا والفنانة وفاء عامر ونشوى مصطفى والفنان الكبير محمد صبحي أبويا الروحي اللي اتعلمت على يده كل حاجة حلوة ناس كتير جدًا والأستاذ محمد أبو داود والأستاذ ناصر سيف بصراحة الوسط كله كان واقف جنبي والله يرحمها الفنانة دلال عبد العزيز الوسط كله واقف معايا علشان منساش حد. 

شفناك في دور الضابط في أكثر من عمل وكنت رائع فيه سبب اتقانك لهذا الدور؟ 

أولا يرجع الفضل الأكبر مسلسل (حضرة المتهم ابي) كنت عامل فيه دور الضابط الطيب الي بيحاول يساعد الأستاذ نور الشريف والمسلسل اتعرض كتير من كتر ما تعرض ساعدني في الانتشار اكتر وانا فعًلا عملت دور الضابط حوالي ثلاث مرات وطبعًا لما تبقى مع الأستاذ نور الشريف كل دقيقة بتتعلم فيها حاجة جديدة صندوق ثقافة متنقل وكل حاجة عنده بمعلومة الحقيقة استفدت منه كتير جدًا. 

اشتغلت مع نجوم مصر الكبيرة زي الأستاذ نور الشريف والأستاذ محمد صبحي والفنانين الكبار جدًا ايه الفرق ما بين نجوم الجيل العظيم ده ونجوم الجيل الحالي؟ 

في طبعا دلوقتي نجوم عندهم قدر كبير من الثقافة زي ياسر جلال وطارق لطفي واشتغلت معاهم وهم دول يكاد يكون شربين من المدرسة القديمة لكن الاستاذ نور والاستاذ صبحي والدكتور يحي الفخراني مثلا انا اتعلمت من الاستاذ صبحي ازاي اتعلم الحياه مثلا رحت عند الاستاذ صبحي المسرح اربع عشر خمسة عشر سنة شبيت علي كل القوانين الاستاذ صبحي كان عنده انضبط في واقفت على المسرح وفي مواعيدك واحترامك لنفسك والجمهور والناس لما تشوفك بره تحترمك. 

اما الأستاذ نور الشريف كل دقيقه بتقعد معاه يعني ثقافة كل دقيقة معلومة جديدة بتاخدها في حياتك يعني فاهم في الدراما اوي وفاهم في الشخصيه جدا كنا بنعمل مسلسل اسمه (عرفة البحر) وكنا قاعدين في اسكندرية في الفندق بيحضرو لنا الفطار الصبح الساعة ستة الساعة خمسة ونص بيبقي موجود كان يقعد جنبنا يعرفنا المشاهد اللي هتحصل النهارده كان بيوجهك كا ابن من أبنائه كان جيل عظيم جدا لا يعوض