عصام شكري: كنت محظوظ بشغلي مع يحيى الفخراني ونور الشريف
كشف الفنان عصام شكري، تفاصيل بداياته الفنية، وتفاصيل عمله مع الفنان الراحل نور الشريف، والفنان يحيى الفخراني.
وقال عصام شكري، في لقائه مع الإعلامية إنجي هشام، في برنامج “المنسي”، المذاع عبر شاشة قناة “هي”: أنا كنت من العاشقين لمعهد الفنوان المسرحية من قبل ما أدخله، وأنا كنت عايز أدرس تمثيل ودخولي المعهد فتح حاجات كتير جدًا، ومش شرط الفنان اللي دارس تمثيل يكون أحسن من اللي مش دارس، واهم ما في الموضوع الموهبة، لكن المعهد بيفتح آفاق كتير عند الممثل وبيحببه في القراءة وبيعلمه يبحث.
وتابع: أشتغلت مع الأستاذ نور الشريف مسرحية لعبة السلطان، ونور الشريف فنان من الطراز الأول واتعلمت منه كتير وفرق معايا، وفضلت علاقتي بيه لغاية ما اتخرجت وجه حضر مشروع التخرج بتاعي، هو كان فنان متميز ومش هيجي زييه.
وأضاف: أنا كنت محظوظ أني اشتغلت مع دكتور يحيى الفخراني في أوبرا عايدة والليل وآخره، الأول كان أوبرا عايدة الأستاذ أحمد صقر المخرج كلمني ورشحني للعمل وقالي أنت هتصور بعد بكره، وكنت مترشح لدور الفنان الجميل محمد سعد اللي اعتذر عن الدور، وكان من حظي أني أعمل الدور ده لأني كنت بعاني من نمطية الأدوار اللي حطني فيها بعض المخرجين، ودوري في أوبرا عايدة كان 36 مشهد، مش المساحات الكبيرة اللي كنت بعملها وقتها.
وأردف: مسلسل الليل وآخره، اللي رشحني للدور كانت الفنان رباب حسين، وعندها إحساس بالممثل أوي وبتعرف توجهه، وجت بالصدفة أني أشتغل للمرة التانية مع الدكتور يحيى الفخراني، وكلنا استمتعنا بالعمل.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
https://youtu.be/Pw6tKc5qW60?si=5jwpTafvAhrB5Nl-
