حمدي عباس الفنان خفيف الظل يفتح قلبه في حوار شيق مع عالم النجوم

حمدي عباس : محمد رياض فاجئني بشخصيته وروحه السمحة الجميلة  وحنان ترك فنانة قوية جدا

إعداد وحوار/دعاء نصر 

حمدي عباس فنان خفيف الظل وموهوب ومن مدرسة  الكاتب الكبير لينين الرملى، تربي على خشبة المسرح وكان عضواً في فرقة أستوديو 2000، بداية ظهوره  على شاشة التليفزيون كان في مسلسل عفاريت السيالة  و لفت الانظار إليه في مسلسل سارة مع القديرة حنان ترك، وكان له ظهور مميز فى مسلسل «طلعت روحى»، من خلال شخصية حامد الخواجة «اللى عارف كل حاجة»،  اللازمة الشهيرة له فى العمل، وتوالت الأعمال بعدها وكانت أخر أعماله مسلسل بنت القبائل الدراما الصعيدية التي حققت نجاح ساحق.

بدايةً حضرتك شاركت في العديد من الأعمال الدرامية والسينمائية؟أيه أكتر عمل شاركت في أقرب لقلبك؟

 والله كل عمل وليه ذكرياته الحلوة.. لكن في بعض الأعمال الواحد يرتبط بالناس والفنانين الزملاء اكتر بيها ..زى طلعت روحى..وسارة..وبت القبايل..وطبعا الاعمال المسرحية لان العشرة فيها بتكون اطول.

مشهد للفنان من مسلسل عفاريت السيالة

https://youtu.be/O9KicOJg7RM

عفاريت السيالة كانت البداية على ما أعتقد للفنان حمدي عباس؟ ولا كان في قبله؟ تفتكر الدور جه ازاي؟ وأخذت في كام؟

كان فيه قبل عفاريت السيالة حاجات صغيرة اوى..لكن هى دى البداية فعلا قدام الكاميرا..لكن بدايتى الحقيقية فى المسرح ..مع الاستاذ الكبير لينين الرملى الله يرحمه..لانى كنت عضو فى فرقة  ستوديو ٢٠٠٠ ودى كانت المدرسة الكبيرة اللى اتعلمت فيها قبل وأثناء دراستي.

مسلسل سارة من علامات الدراما المصرية والناس كلها تعلقت به وقتها؟ شخصية محروسة علمت مع الناس وخصوصا بالطريقة اللى كانت بتناديك بها؟

مسلسل سارة .. كان العمل فيه بالنسبة لى حلم جميل .. حنان ترك فنانة قوية جدا ..وانسانة رائعة .. ومحبوبة من الجميع حتى العمال .. شيرين عادل مخرجة بتحب الممثل متجاوبة ..أحلام الجريتلى وعبدالله مشرف كانوا اسرتى بجد ..رغم صغر حجم الدور لكنه حقق لي شهرة كويسة.. ولازلت أدين بالفضل لكل الناس دى انها ساعدتني أقدم نفسي بكل حب.

أيه أكتر فنان أستمتعت بالعمل معه وتتمنى تكرر التجربة معاه تانى؟ ومين تتمنى تشتغل معاه ولسه محلفكش الحظ؟ وأكتر مخرج؟

بصراحة الفنانين الممتعين فى الشغل كتير..من الأجيال الكبيرة ..ومن نجوم الشباب..يعنى مثلا الله يرحمه ممدوح وافى  والاستاذة عبلة كامل ربنا يديها الصحة ..كانوا فى قمة المتعة بالنسبة لي على المسرح……وفى الفيديو فاجأني .. محمدرياض بشخصيته وروحه السمحة الجميلة وعشرته الطيبة .. ومن نجوم الشباب كتير زى القمر انجى وجدان ..واسلام ابراهيم ..وبالنسبة للمخرجين استمتعت بـ رامى رزق الله اوى ..لانه فنان اوى وانسان درجة اولى..لسة محالفنيش الحظ مع أساتذة كبار زى عادل امام..و مخرجين مبدعين زي كاملة أبو ذكرى.

مسلسل طلعت روحي هل ليه جزء تاني؟ وكنتم كفريق عمل متوقعين نجاحه بالشكل ده؟

كنا بنتمنى كلنا كفريق عمل فى طلعت روحى انه يكون فيه جزء تانى ..لكن اللى حصل من ظروف للشركة المنتجة حالت دون هذا..طلعت روحى من نوعية المسلسلات التي بتتوقعى نجاحها من على الورق..لأنه مكتوب بشكل رائع وابدع شريف بدر الدين فى رسم المواقف والشخصيات..والاستاذ رامى رزق الله ..عنده موهبة فى تسكين شخصيات المسلسل واختيار الممثلين ..غير طبعا الصورة والإيقاع بتاعه تحسيه بيعزف مقطوعة جميلة ..احنا كنا عيلة واحدة فى المسلسل ده لان معظم الأحداث فى مكتب المحاماة..وعشنا مع بعض فترة طويلة لكنها ممتعة وجميلة

بما أنك شاركت في مسلسل هبة رجل الغراب  أية وجهة نظرك أن الجزء التانى ملقاش نجاح واستحسان الناس زى الجزء الأول؟

هبة رجل الغراب نجح بكل أجزائه..يمكن اكون من الممثلين القليلين اللى اشتغلوا فى الجزئين..لكن كل جزء كان له شكل وطعم وجمهور مختلف عن التانى.

أيه رأيك في المحتوى اللى بيتقدم حاليا؟ وإيه أكتر عمل شدك في دراما رمضان 2020؟ و اكتر فنان عاجبك وأكتر فنانة؟

انا شايف اننا بنتطور كتير ..فى المحتوى والصورة وطريق التقديم..بالنسبة للأعمال الدرامية رمضان اللى فات..كان فيه سباق فنى حقيقى..اعمال كتير عجبتني ..زى الاختيار ..بميت وش..النهاية..ليالينا٨٠..الفتوة..عجبتنى نيللى كريم لانها اول مرة تعمل كوميدى وكانت عسل.. خالد الصاوي كان روعة..ياسر جلال عجبنى جدا

الفنان حمدي عباس أيهما أقرب لقلبك العمل في الدراما أو السينما أو المسرح؟  

هو كل شكل فنى من التلاتة ليه طعمه ..لكن ممكن نقول ان الاتصال المباشر بالجمهور فى المسرح هو الأكثر متعة

دورك في مسلسل بنت القبايل دور مركب شرير بس دمه خفيف؟ كلمنا طباري ورد فعل الناس عن المسلسل؟

شخصية طبارى .. رشحني فيها الاستاذ حسنى صالح المخرج..اللى أشكره على ثقته فيا..لان الشخصية على الورق مختلفة عنى تماما..لكنه قالى انت هتعملها كويس..وادانى فرصة لمذاكرة الدور ومتطلباته كمخرج من الشخصية ..وامتعنى بصراحة اثناء التصوير رغم التعب والمجهود من وقوع منفوق الجبل لتعذيب فى مغارة لمعارك فى الصحراء..لكنه كان مجهود لذيذ..وفيه استمتاع بالحالة الفنية اللى حاصلة..وعلى المستوى الشخصى انا كنت عايش فى بيتى مع اهلى ..فى شركة الجابرى..وكان فيه نخبة من الفنانين الكبار فنيا وانسانيا حببتنى فى العمل اكتر واكتر

تقول أيه للناس اللى بتحبك بمناسبة قدوم عيد الأضحى؟ وايه اللى بتتمناه قبل أنتهاء 2020 ونفسك يتحقق؟

أحب اقول كل سنة وانتم طيبين ..عيد سعيد علينا كلنا..واتمنى الخير لمصر وللوطن العربي كله