تامر حسني يكشف كواليس ألبوم «لينا ميعاد» ويتحدث عن التحدي والنجاح
كشف الفنان تامر حسني عن كواليس وتفاصيل ألبومه الجديد لينا ميعاد الذي طرحه أمس الثلاثاء، والذي حقق انتشارًا واسعًا وتصدر تريند مواقع التواصل الاجتماعي في أقل من 24 ساعة.
وكتب تامر عبر صفحته الرسمية على فيسبوك: “حابب أستغل الفرصة الحلوة دي، خصوصًا إن أغنية الذوق العالي مع حبيبي النجم الكبير محمد منير تصدرت التريند العام، وكل أغاني الألبوم الـ13 دخلوا التريند من أول يوم. عاوز أقولكم حاجة مهمة، عشان أوصل للمرحلة دي، وأخلي الألبوم يعجبكم بالشكل ده، مشيت مشوار طويل جدًا.”
وأضاف: “كنت بقرأ كل تعليقاتكم سواء السلبية أو الإيجابية، وبعتبر ده من حبكم ليا، وده اللي خلاني أركز واتعهد مع نفسي إني أفرحكم وأقدملكم حاجة تليق بيكم وتفخروا بيها. كمان احترمت كل ذكرياتكم اللي ارتبطت بأغانيي، وتعبت تعب غير عادي لدرجة إني دخلت مستشفيات نص السنة، ومع إني مش بحب أتكلم عن ده، بس حبيت أوضح قد إيه الموضوع كان صعب.”
وتابع تامر: “أنا بحبكم جدًا، ومن أول يوم ظهرت فيه، كنت واحد منكم. عارف إن في ألبومات قدمتها ماكنتش عند توقعاتكم، وفي ألبومات تانية عملت بصمة مش هتتنسي. هي دي الحياة، شوية نجاح وشوية إخفاق، لكن كان جوايا تحدي كبير إني أقدم حاجة أقوى حتى من ألبوم عيش بشوقك اللي كلكم بتحبوه.”
وأوضح: “فضلت أدرس السوق الموسيقي وأنماط الأغاني الجديدة اللي باحترمها وباحترم الفنانين اللي نجحوا فيها، واشتغلت على تطوير أدائي وصوتي سنتين كاملين في الاستوديو، وسط تعب ومجهود كبير مع المهندسين والموزعين والملحنين والشعراء. كتير منهم زعلوا مني لأني كنت طول الوقت باعدل وأعيد وأسجل من أول وجديد، بس دلوقتي فرحتي لا توصف بعد ما سمعت إشادتهم وكلامكم الجميل.”
واختتم تامر حسني رسالته قائلًا: “أنا ممتن لكل حد نصحني أو انتقدني من قلبه عشان يخليني أفضل أحسن، ودي كانت أكبر دافعة ليا إني أتعب وأطور. تعبت عشانكم وعشان أكون واجهة فنية مشرفة لمصر في كل حتة بغني فيها. شكرًا لكل صنّاع الألبوم، وشكرًا ليكم يا أغلى الناس على دعمكم وفرحتكم اللي مفرحاني.”
