أيمن حسين يكتب: إنت ربنا بيحبك
جملة “إنت ربنا بيحبك” دي أغلى وأهم جملة ممكن تسمعها فى الدنيا. مين مننا ميتمناش إن ربنا يكون بيحبه؟! أكيد كلنا نتمنى ده وبعد كده مش عايزين حاجة تانى من الدنيا. بس خليني أقولك إن عشان ربنا يحبك لازم يكون عندك شوية حاجات كدة بسيطة جدا بس فى نفس الوقت هي حاجات جميلة جداً جداً.
لازم يبقي ضميرك صاحي ويحاسبك دايما، لازم يكون قصدك ونيتك خير. وكل حاجة عايز تعملها تشوف ربنا قصادك قبلها ، لازم تكون مش كداب… مش غدار. مش بتضحك على حد ولا تمثل حاجة جواك حاجة تانية ، لازم متبقاش منافق وأفّاق وماشى ورا مصلحتك أيا كان بقى هتدوس على مين او هتئذي مين ، لازم متبقاش خاين للوعود وناكر للجميل. لازم متستقواش على الضعيف وتعامل الناس البسيطة بحب وود عشان كلنا زى بعض.
دعوات الناس
أصل الناس دي دعواتهم أحلى ما في الدنيا وبتكون فعلا من القلب ومن غير مصلحة وبتوصل على طول. و كمان لازم تحب لغيرك اللى بتحبه لنفسك ، لازم حاجات كتير جداً عشان ربنا يحبك. ببساطة كده زي ما بيتقال (لازم تكون شخص طيب).
بس مش معني كده ولا مطلوب منك تبقي ملاك يعني لإن أكيد كلنا فينا عيوب وأخطاء… الفكرة كلها ان احنا نقدر رغم عيوبنا نعمل الحاجات دى كلها ربنا يحبنا.
وعلى فكرة لو إنت فعلاً إنسان نضيف من جواك وفيك حاجات حلوة بالشكل دة وربنا حبك هتعرف وهتحس ده. وهتشوفه بعنيك في حاجات كتير حواليك و بتحصلك.
هتلاقي مثلا ربنا بيديك إشارات لحاجات كتير إنت متعرفهاش عشان ينبهك وينجّيك من مصير كان ممكن يأذيك.
هتلاقى ربنا ينقذك من حاجات هي في حقيقتها شر بس انت ياما دعيت ربنا يحققهالك وتمنيتها وافتكرت إنها خير وهو عشان بيحبك بعدها عنك.
هتلاقى ربنا بيكشف لك حقيقة ناس حواليك كنت متخيل انهم بيحبوك بجد انهم ناس كويسين فعلاً لكن هما مش كده.
هتتصدم وتكتشف فجأة إن اللي كنت واثق فيه و مستأمنة على نفسك – يمكن أكتر ما كنت مستأمن نفسك على نفسك – كنت بالنسبة له مجرد مصلحة وخلصت.
هتشوف حب ربنا ليك فى حب الناس فيك. وهتلاقي سيرتك طيبة رغم محاولات تشويهها من ناس عندهم نقص، بس هتلاقى فجأه ربنا باعت حد يدافع عنك ويقول فى حقك كلمة كويسة وإنت مش موجود رغم إن مفيش بينكم أى مصلحة.
هتعرف إن ربنا بيحبك بتسخير حاجات كتير فى طريقك عشان تبقى إنت إنت ده دلوقتى ماشى فى سكتك دي اللي هي أحسن بكتير من طرق حلمت بيها وربنا برضه بحبه ليك قفلها قدامك.
يعنى بإختصار عشان ربنا يحبك يا سيدي حبه إنت الأول. وصدقني دي حاجة حلوة أوي. ببساطة… لو إنت إنسان نضيف وطيب أقدر أقولك ((إنت ربنا بيحبك))
