الفنان “خالد كمال” يكشف عن مشاركتة في الدراما الرمضانية لعام 2022

حوار / آيه سالم

عندما تأمل أن تفعل شئ بسهولة عليك أولاً أن تجتهد لأن الشئ الذي يأتي بسهولة يذهب بسهولة دون لذة لأن الأعمال العظيمة لا تأتي بالغصب أو القوة بل تأتي بالمثابرة ، و لا تعترف أبداً بالفشل حتي تخوض أخر محاولة و لا تتوقف أبداً عن النجاح و لا تقل بأنها أخر محاولة حتي يتم النجاح و تصل إلي ما تريد .

هناك أشخاص يعشقون الفن و يبقي هو السبيل الوحيد لإسعادهم فيتركون كل شئ خلفهم و يركضون وراء الفن لأن الكثير منهم يمتلك رسائل هادفة و شخصيات مختلفة غير مكررة و يريد كل منهم تقديم الموهبة التي تليق بالجمهور الذي ينتظر كل مميز و جذاب و يبقي همهم الأول هو الفن الذي يلمس القلوب و الذي لا ينسي أبداً .

دار بيني و بين الفنان “خالد كمال” حوار شيق للغايه حول أعماله الفنية المميزة و قام بالكشف عن مشاركتة في الدراما الرمضانية لهذا العام 2022 .

من هو “خالد كمال” ؟

ممثل مصري مواليد 6 مايو 1996 تخرج من كلية تجارة إداره أعمال جامعة حلوان ، شغفه الأول هو التمثيل .

أشتغلت أول ما أتخرجت في بنك كبير لمده 6 شهور وبعد كده حسيت إن ده مش مكاني ومش لاقي نفسي فيه فقررت إني أسيبه خالص و أتجه إني أثبت نفسي في المجال اللي بحبه ونفسي أقدم حاجه فيه لأني نفسي من و أنا طفل صغير إني مش عاوز أكون نسخة مقررة من شئ و إن نفسي إن الدنيا كلها تعرف إن فيه شخص موجود في الدنيا دي أسمه “خالد كمال” .

متى بدأت تمثيل و هل التمثيل بالنسبالك موهبة و لا دراسة ؟

أنا من و أنا صغير جداً كنت دايماً بقلد ناس قرايبي ودايماً كنت الشخص اللي دمه خفيف في العيلة ولما دخلت المدرسة و خصوصاً و أنا في ثانوية عامة بدأ يزيد الموضوع ده عندي وكنت بقلد كل أصحابي في المدرسة بالظبط وكل المدرسين بتوعي و كنت معروف دايماً وسطهم بالفنان حتي من قبل ما أعمل حاجة و أول مره أقف قدام كاميرا كان في فيلم “كنغر حبنا” لرامز جلال وسارة سلامة إخراج الأستاذ “أحمد الجندي” و من هنا بدأ حبي الكبير جداً للفن و خدت قرار إن لازم أكون موجود وسط كل النجوم دي وأبقي واحد منهم ، و درست تمثيل من خلال ورش كتيرة و كمان أنا إشتغلت في مسرح الجامعة طول ال 4 سنين في الكلية برضوا وكنا بنعمل عروض هناك .

ما هي الأعمال التي قمت بتقديمها ؟

قمت بتقديم المسلسلات الأتية( أفراح القبه – الجماعة الجزء الثاني – حكاية مره – أرض جو – الحرير المخملي – اللعبة الجزء الثالث – حلوة الدنيا سكر – ورا كل باب – القاهرة كابول ) ، كما قمت أيضاً بتقديم عدة أفلام و هم ( كنغر حبنا – مولانا – شريط 6 – الحارث – ريتسا ) و فيلم قصير مشروع تخرج جامعة مصر الدولية بآسم (عندما يموت هذا الرجل) ، وقدمت العديد من الإعلانات من ضمنهم ( بطولة حملة إعلان uber bus – بطولة إعلان معرض أبو حتة للسيارات – بطولة إعلان the investors bank العاصمة الإدارية الجديدة – بطولة إعلان famous burger (السعوديه) .

ما هي اهدافك وطموحك التي تسعي لتحقيقها؟

أنا نفسي أكون ممثل ساب بصمة بيناقش قضايا هادفة زي كتير من الأساتذة الكبار اللي أتعلمت منهم و مازلت بتعلم منهم زي الأستاذ “عادل إمام” زي “أحمد حلمي” زي “أحمد عز” و “نور الشريف” و غيرهم طبعاً من الأساتذة الكبار ، و نفسي مبقاش نسخة مكررة من حد نفسي أكون “خالد كمال” زي ما أنا بأسلوبي وطريقتي وأتمني إن في يوم من الأيام يكون ليا شأن كبير في مجالي و أتمني من ربنا إنه يوفقني و يكرمني في ده و أعظم شئ فعلاً هو حب الناس و الجمهور الحب الغير مشروط الناس اللي بتحبك علشان بيشوفوا نفسهم فيك وتتكلم بلسانهم وتوصل الرسالة اللي نفسهم يقولوها .

من هو الممثل المفضل لـ “خالد كمال” و من الذي يؤثر في حياته ؟

كل الفنانين اللي إشتغلت معاهم بحبهم و بحب صحابي جداً النجوم الشابة اللي في سني و اللي بتجمعني بيهم صداقة قوية جداً في الفتره الحالية نظراً لشغلنا مع بعض ، بس طبعاً أنا بحب الأستاذ “سيد رجب” و الأستاذ “خالد الصاوي” و آيضاً النجوم ( أحمد عز – حنان مطاوع – محمد ممدوح – خالد النبوي – سوسن بدر – أحمد فهمي ) و غيرهم كتير طبعاً و منهم اللي إشتغلنا مع بعض كتير قبل كده .

هل لديك مواهب آخرى بخلاف التمثيل؟ ومن هو اكثر مشجعيك في مشوارك

أنا بحب التمثيل ده أول شئ طبعاً بحب أسمع مزيكا و بحب الجيم و القرآءة و التصوير و الإخراج و الكتابة ، أول ناس وقفت معايا هما أهلي وبالأخص والدتي كانت داعم أساسي ليا و كانت دايماً لما أعمل حاجة جديدة تحب تتفرج عليا أووي و تشجعني دايماً و طبعاً أصدقائي القريبين مني جداً هما اللي كانوا شايفين إني لو فعلاً بدأت و خدت الخطوة هقدر إني أعمل حاجة كويسة و ده حصل الحمدلله .

الفن و التمثيل بالنسبالك إيه ؟

الفن عموماً و التمثيل خصوصاً هما حياتي هما الشئ اللي أنا عايش علشانه بجد و مش مجرد كلام وسبق و ذكرت إني فعلاً وقفت كل حاجة في حياتي علشان أثبت نفسي و أقول أنا موجود و عندي حاجه أقدمها وخدت القرار ده في وقت صعب جداً في حياتي و أستحملت توابعه و الحمدلله ربنا وفقني و كرمني جداً و وقف معايا وكنت دايماً بقول يارب أنا مش عندي حد يقف معايا أو يساعدني غيرك فيارب ساعدني وقويني وخليني أكمل فالفن و التمثيل بالأخص هو حياتي هو الحاجة الوحيدة اللي لو عندي هموم الدنيا بمجرد ما بدخل اللوكيشين و أقف قدام الكاميرا بنسي كل حاجه وكأني أتولدت من جديد ، فاللهم ديمها نعمة يارب العالمين .

هل لديك مشاركات في الدراما الرمضانية لعام 2022 ؟

بإذن الله بحضر لكذا حاجه قريب جداً بعد ما أنتهيت من تصوير مشاهدي في مسلسل “اللعبه 3” بطولة “شيكو و هشام ماجد” ، و في مسلسل إن شاء الله في رمضان حاجة هتكون جديده عليا شخصية أول مرة ألعبها و مبسوط جدً بالتجربة بس مش هعلن عنها دلوقتي هخليها مفاجأة .