اللي عايز يمشي يمشي … بقلم : الشاعر الغنائي حماده العسكري
إتربيت ع الشهامه
والأصول والجدعنه
ما اتكلمش عن نفسي يامه
ماأتبهاش ولا أقول أنا
اللي يمشي بالسلامه
مش ناقصه غلب وعكننة
اللي يخرج من حياتي
عمري ما أفشي مره سره
حتى لو كان طالني شره
اللي عايز يمشي يمشي
يلا فضوا مكان لغيركم
إنتوا جبتوا خلاص آخركم
كنت مغفل نفسي جايز
قولوا عني عقلي بايظ
اللي كان منكو عايز
كان يجيني يضحك ف وشي
كنت بدي في عز محني
أخف عنكوا ودهري محني
ولو واحد فيكم لمحني
م الحمول واقع بيمشي
كنت بضحك بوش مطفي
كنت أداري الهم وأخفي
كنت ماشي معاكوا بعواطفي
كنت أدادي كتير وأسايس
الغريب انا كنت مرضي
أزرع في أرض مكنتش أرضي
كنت بفرش ليكو وردي
وكنت انا على شوكي دايس
