حسام حبيب ينهي الجدل ويوضح علاقته بشيرين عبدالوهاب
كتبت: مادونا عادل عدلي
رد الفنان ” حسام حبيب ” على حسابه الرسمي على الانستجرام حتي يحسم الجدل القائم منذ أيام حول علاقته بزوجته النجمة شيرين عبد الوهاب، بعد التسجيل المسرب لوالده حسام حبيب.
حيث نشر فيديو له وظهر في بداية الفيديو وهو يحتضن زوجته شيرين برفقة طفلتها، وقال ساخرًا من الشائعات التي تم تداولها عبر مواقع التواصل الاجتماعي مؤخرا: “هالو.. إيه رأيكم فيا وأنا بضحك على شيرين وواخد الكريدت كارد بتاعها.. إيه رأيكم فيا.. وإيه رأيكم فينا.. حلوين صح.. بكره هنعمل لكم فيديو من المحكمة”، ثم قبلت شيرين زوجها حسام حبيب الذي طلب منها أن تغادر الغرفة هي وابنتها ليستكمل رده.
وقال : “أنا عمري ما عملت فيديو ولا اهتميت إني أرد على أي حاجة اتقالت في يوم عليا” وقدم الشكر لمن وقفوا بجواره في هذه الأزمة معتبرًا أنهم إخوته، مضيفًا: “أنا مبحبش أدافع وأقول أنا معملتش لأن أنا أكبر بكتير أخلاقًا”.
واستكمل: “اللي حصل للأسف إن أقرب الناس لينا هما اللي زاقين ناس على ناس، برضه قريبين مننا عشان مش عايشين حوالينا، الناس دي كلها كان ليها مصالح إن شيرين تكون منتهكة ومش فاهمة حقوقها ولما جه بني آدم فهم شيرين حقوقها وبقت شيرين هي المسؤولة عملوا كده”.
وشيرين عندها شركة بتدير أعمالها وانا مليش دعوة بيها والناس كلها في السوق عارفين الكلام ده، ناس بروفيشنال شغالين مع شيرين ومبياخدوش أوامر أو إرشادات من حد”.
“شيرين أقدم مني وأنجح مني، ولما بتقولوا كدة بتقللوا من شيرين عبدالوهاب وأنا اتجوزتها وهي شيرين عبدالوهاب أنجح واحدة في الوطن العربي وناجحة ومش محتاجة حد يقولها تعمل إيه ومتعملش ايه، ولو هي حد قالها تعمل إيه يبقى ضيعت تعب السنين هباء، وأعتقد إن شيرين أكبر من كده، أما بالنسبة لأقرب الناس لينا أنا عارف إن عشان شيرين بقت الحمد لله أدرى بأمورها وقادرة تسيطر عليها أكتر وده مموتهم لأنهم مش عارفين يعملوا حاجة أكتر من كدة لأن الحنفية اتقفلت بالبلدي يعني وهم هيفضلوا يعملوا الحاجات دي”.
و”الحمد لله أنا دايما بقول لشيرين، وشيرين بتقولي كده، إن ربنا اختارنا لبعض ولما اتنين ربنا اختارهم لبعض لا يمكن يفرقهم إنسان مش سوي ومعتقدش إن فيه إنسان عنده علاقة كويسة بربنا يزق حد على حد واللي اتزق عليه من حقه يتكلم عني كده”.
ورد حسام حبيب على ما نشره لوالده في حقه وحق شيرين قائلًا :”أنا مش همشي ورا حد بينكر ولا مبينكرش وصوته ولا مش صوته، أنا ميخصنيش الكلام ده، أنا عندي مشكلة في الثقة في الناس اللي حواليا والشخص ده مش أول مرة يأذيني وأنا آسف إني بقول الشخص ده”.
“أنا مش عايز حد يزعل مني على إني بقول الشخص ده لأني صعب جدًا إني أقول الاسم العادي بعد اللي قاله واللي بيعمله أيا كان حد جرجره أو حد سجل له، أنا عندي تسجيل إن صاحبة الموقع اتزقت عليه من 6 شهور”.
وأشار حبيب أن شيرين تعرف جيدا كافة حقوقها وقال : “شيرين راشدة وعارفة حقوقها وابعدوا عنها وسيبوها تعيش لحياتها وبيتها وفنها وجمهورها وكفاية وإحنا لحد دلوقتي بنقول حسبنا الله ونعم الوكيل وده مش معناه ضعف ولو الحاجات دي استمرت أنا قادر أرد عليها وأجيب حقي بالقانون ومش هيفرق معايا درجة قرابته، أساس القصة وأطراف القصة واللي زق البنت من أقرب الناس لينا ومش هيفرق عندي صلة القرابة إيه لكن هيفرق عندي إنه بيفتري وبيتكلم في الأعراض وجاب سيرة أمي”.
وشكر والدته، معتبرًا أنها علمته كل الأخلاق الكريمة وأن كل شيء جيد فيه تعلمه منها، وقال في نهاية حديثه : “أمي والراجل اللي خلفني منفصلين من 30 سنة وهي اللي ربتني وعلمتني وكانت دايما تقولي اسأل عليه ووده مهما أذاك، ومهما عمل، وأنا كنت بعمل كدة لحد آخر لحظة، أنا سألت دينًا وشرعًا لما الأذي يوصل لكدة.. لا كدة كفاية أوي وربنا هيجبلنا حقنا”.
وشارك حسام حبيب بفيديو آخر وجه فيه الشكر للكابتن إبراهيم سعيد، قائلا: “بشكرك أنت بـ100 راجل، وفعلا عندك حق مالهم بتوع الصنايع، دول أنضف وأرجل ناس وولاد بلد”، والإعلامي عمرو أديب، والإعلامية بسمة وهبة.
ورد على الصحفية التي فعلت كل هذا وفي فيديو أخير له عرض تسجيل صوتي لها يكشف جميع نواياها وأنها تخطط لذلك منذ 6 شهور بحجة السبق الصحفي وتخليص شيرين عبد الوهاب من إستغلال حسام حبيب لها كما قالت.
