“دعاء نصر” تتألق بـ حوار خاص حول نجاح مهرجان التذوق الثاني بالإسكندرية
إعداد وحوار/ سعيد المسلماني
اعزائي متابعي عالم النجوم يسعدنا ويشرفنا في يوم مليئ بالنجاحات من داخل عروس البحر المتوسط مدينة الاسكندرية ان يكون لنا هذا اللقاء مع رائدة من رواد المجتمع السكندري صاحبة الإبداع داخل عالم الصحافة والإعلام هي الاعلامية والصحفية د. دعاء نصر رئيس مجلس إدارة مؤسسة عالم النجوم الإعلامية.
أهلا وسهلا بحضرتك د. دعاء؟
* اهلا وسهلا بيك وبكل جمهور ومتابعي عالم النجوم سواء من الاسكندرية أو من خارجها بجميع محافظات مصر اهلا بيكم جميعا ويارب دائما عالم النجوم تكون عن حسن ظنكم وتكون ليكم رسالة الفكر والابداع .
ممكن حضرتك تكلمينا عن فكرتك ورؤيتك لـ مهرجان التذوق بصفة عامة؟
طبعا لو هتكلم عن مهرجان التذوق مش هتكلم علي فكرة التذوق بحد ذاتها.
لان المهرجان يضم أكثر من فكرة وابداع ولا يقتصر على الطهي فقط علشان كدا لما بنيجي نصف المهرجان بنصفه بالمهرجان الترفيهي، لان المهرجان يضم مسابقات طهي ويضم حضور إعلاميين وفنانين وشخصيات عامة وهامة.
وفكرة المهرجان بطبيعتها وزي ما قولت قبل كدا و هكررها تاني
مبني على المحبة والحضور من أجل إسعاد الجميع وتشجيع المواهب الجديدة من خلال المسابقات والتكريمات التي تقدمها مؤسسة عالم النجوم الاعلامية، وبدعم الشركات الراعية للمهرجان.
وفي نقطة أنا بسعى ليها وباذن الله احققها وهي أن مهرجان التذوق مايكنش في اسكندرية فقط، لازم يكون له انتشار كبير في جميع محافظات مصر وبإذن الله نصل إلى أن يكون بجميع أنحاء الوطن العربي.
ايه الاساسيات إللي حضرتك كنتي مركزة فيها بما يخص المهرجان؟
لو هنتكلم عن فكرة الاساسيات انا كـ “دعاء نصر” كل شئ في المهرجان بالنسبة ليا اساسي.
بمعنى ماينفعش يكون صرح كبير زي مهرجان التذوق ويكون فيه خلل في شئ أو تقصير في شئ لان ده مش هيزعلني انا بس اكيد هيزعل كل محبي وداعمي عالم النجوم.
واكيد وبعد كل التجهيزات والتحضيرات دي ان يكون فيه تقصير أو خلل.
وبفضل الله وبفضل دعمكم والمجهود المبذول مش هقول مني بس، هقول مننا جميعا اكيد بنصل وسوف نصل إلى كل ما نتمنى.
وفي النقطة الأهم من الاساسيات إللي ممكن نتكلم فيها لان في شئ أهم وفعلا مهم جدا
انك في الوقت ده بيكون عندك داعم وحافز داخلي باستكمال التجهيزات بإقبال محبينك وداعمينك للنجاح وهذا يكفي بأن التركيز يكون مضاعف وباذن الله مايكونش في اي خلل في أي شئ لا في الاساسيات ولا في الفرعيات
أكيد كل عمل له صعوبات … ايه الصعوبات إللي واجهتك بما يخص المهرجان؟
بص يا سعيد هي فكرة صعوبات انا مش بسميها كدا،
انا بسميها تحديات “بمعنى” أي شئ أو أي عمل اكيد بيكون له ابعاد وبتكون راسم له تفاصيل معينة وأوقات بتجد عليك أمور طارئة، دي بقي انا بسميها تحديات المواقف واكيد طول ما انت مؤمن من جواك بإنك قد التحدي اكيد هتوصل وتجتاز كل الصعوبات وهتمر عليك رغم شدتها بشئ من النجاح عندما تجد عملك اكتمل بدون تقصير.
اتمني فعلا بمهرجان التذوق نكون قد إجتازنا كل التحديات واسعدنا الجميع
فكرة الجمع بين الطهي والفن تحت مظلة واحدة … إيه أساس الفكرة وكيف سعيتي لتنميتها؟
* فكرة الجمع بين الطهي والفن يبقى هنقول كلمة بحجم رسالة الطهي ورسالة الفن اللي احنا بنسميها كـ إعلاميين إبداع
كل مجال منهم له مبدعينه سواء كان الفن او الطهي فلابد من الجمع بين مناطي الفنون لنجد الابداع والتميز داخل صرح كبير زي مهرجان التذوق الثاني بالاسكندرية.
وفي شئ مهم لابد من ذكره مش لازم يكون المبدع بحجم المتألق ممكن يكون المبدع بحجم الموهوب الذي يسعى للنجاح علشان كدا الحمد لله كان لعالم النجوم السبق الأول في تواجد مبدعي الفن والتذوق تحت مظلة واحدة وهي كيان عالم النجوم الذي يسعى دائما إلى كل ما هو راقي وجميل ومفيد للجميع.
بعد النجاح الكبير الذي حققه مهرجان التذوق في دورته الاولي. ليه حضرتك محاولتيش تكون النسخة الثانية بمحافظة آخري ؟
* طبعا انا جاوبت على جزء من السؤال دا في السؤال الثاني بس هتكلم عنه بتوضيح أكثر
الحمد لله نجاح مهرجان التذوق الاول كان دافع كبير جدا لاستكمال مسيرة وهدف ابداعي، فأنا حبيت أعمل النسخة الثانية في الاسكندرية بس بتقنيات وتجهيزات أعلى و فكر إبداعي جديد، وطبعا كل الحضور شاهدوا كل الكلام ده، وبإذن الله انا ناوية اجوب ارجاء محافظات مصر بمهرجان التذوق ليزداد الجمال جمال وتألق،
وللعلم فكرة مهرجان التذوق في جميع المحافظات مش فكرتي انا بس ده مطلب من ابناء المحافظات بأننا نقيم الاحتفالية علي ارض محافظاتهم
وباذن الله هيكون هدف ونسعى لتنفيذه لإرضاء وسعادة الجميع
مسابقة “الكل كسبان” فكرة برؤية جديدة ممكن حضرتك توضحي تفاصيلها؟
بصراحة اسئلة الحوار معاك فيها شئ جميل بيديني دافع كبير لاستكمال الحديث دون توقف.
بالنسبة للمسابقة من اسمها “الكل كسبان” يعني مفيش حد من المشتركين هيخرج من المهرجان وهو مش فائز معانا
وذي ما قولت ان ده مهرجان ترفيهي مبني علي المحبة. وطبعا لما كل المتسابقين هيفوزو هيكون دافع ليهم في سبيل النجاح.
بس طبعا في شئ من التميز للمبدعين اصحاب المراكز الأولى لانهم تألقوا في مجال الطهي من خلال المسابقة ونالو إعجاب الجميع بشهادة كبار شيفات السوشيال ميديا وتم تكريمهم اولا ثم تكريم باقي المتسابقين بمشاركة لجنة التحكيم ، وطبعا اخذنا الصور التذكارية وباذن الله يكون لينا لقاءات جديدة ومهرجانات أكثر نجاحًا كالمعتاد.
” سعادة الجميع لا تنقص من سعادتي شئ ” هدف وداعم دائم للإعلامية دعاء نصر؟
* فعلا دي حقيقه أنا اؤمن بيها جدا بأن سعادة الجميع لا تنقص من سعادتي شئ
معنى انك تسعد انسان دي قيمتها كبيرة عند ربنا ولما تحس ان ربنا بيستعملك لجبر الخواطر ده في حد ذاته راحة نفسية وبيخلي عندك إصرار و الحمد لله بيكون أكبر داعم ليك في سبيل الحياه بإنك تسعد كل إللي حواليك
دائما ليكي مفاجأة سواء كان في حضورك أو في تجهيزاتك؟
مش هتكلم فيها هترك لك المساحة الكاملة للتحدث عن مفاجأة مهرجان التذوق في دورته الثانية بالإسكندرية؟
*فكرة المفاجأة اللي في المهرجان هي كما ما اعلنت عنها من خلال المهرجان ” مبادرة 1000 هنا” وده عمل خيري أهم اهدافه التكافل الاجتماعي الذي يدعم بعض الأسر ودار الايتام والمستشفيات والشوارع وكل محتاج، وبفضل الله بدأنا بالفعل وتم عمل أول 100 وجبة وتم توزيعها علي المحتاجين ولَك ان تتخيل مدى سعادتهم ادامها الله عليهم وأطعمهم من فضله.
وطبعا إللي حابه اني اوضحه تفصيلًا إن مبادرة ” 1000 هنا” هي عمل خير اشترك ودعم فيه كل من حضر المهرجان دون اقصاء احد.
يعني كلنا مشاركين في عمل الخير ده و هيكون عبارة عن “1000” وجبة سوف توزع على المحتاجين ويعم الخير على الجميع.
علما بإني ممكن كنت عملتها انا وخلاص بس لانتشار الخير والمحبة احببت ان يشاركني الجميع من خلال المهرجان في هذة المبادرة من المتسابقين ، وضيوف المهرجان ، والرعاة “
قبل ان اختم مع حضرتك في مجموعة من الرسائل تحبي تقدميها؟
طبعا لازم يكون في رسائل شكر ولا يقتصر الشكر على التكريم فقط كما حدث ولكن.
أعلم تمام العلم وعلى يقين من شكر أهل الفضل عباده لله
” من لم يشكر الناس لا يشكر الله “
والشكر هو جزء من الحق لابد وأن يرجع إلى أهله.
رسالة لـ فريق عمل مؤسسة عالم النجوم !!
* شكرا ليكم ” فريق عمل عالم النجوم” كنتم فعلا قد المسؤلية وأنا فخورة بيكم جدا جدا وسعيدة جدا ان معايا فريق عمل يعمل بالمحبة والقوة والإصرار والعزيمة دي لإتمام نجاح المهرجان حتى آخر لحظة
بشكركم وبتمني من الله ان نظل دائما علي الريادة كما اعتدنا.
رسالة للفنانين و الإعلاميين الذين لبو دعوة حضرتك بالحضور !!
* اشكركم علي حضوركم الكريم الذي اسعدني شخصيا واسعد الجميع واتمنى من الله ان نتواجد دائما في كل عمل خير وكل عمل لإسعاد الجميع
بكرر شكري ليكم في المساهمة في أعمال الخير داخل “مبادرة 1000 هنا”
ولمزيد لنا ولكم في الخير بإذن الله
رسالة للجنة التحكيم والمتسابقين داخل مسابقة ” الكل كسبان” !!
رسالتي إلى لجنة التحكيم شكرا لكم على حضوركم الكريم وإسعاد الجميع بتواجدكم
واكرر شكري على حسن سير المسابقة تحت راية ولواء المصداقية والشفافية والنجاح لمن يستحق
رسالتي للمتسابقين. الف مبروك للفائزين معانا في مسابقة ” الكل كسبان” وطبعا الحمد لله مفيش حد خسر و الذين لم يحالفهم الحظ للحصول على مراكز باذن الله في فرص جاية كتير ومع الاجتهاد تتحقق الامنيات.
رسالتي للفائزين وأصحاب المراكز
الف مبروك التفوق في المسابقة واتمنى ان تواصلوا النجاح وتبدعوا حتى تصلوا إلى كل ما تسعون إليه
موفقين دائما بإذن الله
رسالة موجهة إلى رعاة المهرجان !!
بشكركم على الدعم والرعاية للمهرجان واتمنى من الله ان نكون دائما وابدا جميعا صفًا إلى صف في طريق الخير والنجاح بإذن الله
واخيرا وختاما ” رسالة الخير بـ مبادرة “1000 هنا” !!
* للمبادرة مش هقول رسالة بس هقول دي دعوة للخير لكل انسان يريد ان يتقرب إلى الله بالخير لان “خير الناس أنفعهم للناس” واتمنى ان تجول هذه المبادرة ليس مصر فقط ولكن الوطن العربي جميعا
اللهم استعملنا ولا تستبدلنا وكن لنا عونا ومعينا يارب العالم
بشكر حضرتك جدا على الحوار الجميل ده دكتور دعاء نصر رئيس مجلس ادارة مؤسسة عالم النجوم الإعلامية
ونتمني من الله ان يكون اللقاء نال اعجابكم متابعي عالم النجوم
وعلي أن يتجدد بنا اللقاء مع علم جديد ورائد من رواد الفكر والإبداع.
كل الشكر للمحاور المتميز سعيد المسلماني تحياتي.
