محمد ثروت ضيف راديو عالم النجوم في ليلة العيد
بدأت أولى حلقات راديو عالم النجوم يوم 5/5 لعام 2021 تحت رعاية الإعلامية د. دعاء نصر رئيس مجلس إدارة مؤسسة عالم النجوم باستضافة كوكبة من علماء وكتاب وفنانين.
وفى الحلقة الثانية تم استضافة الفنان الكبير محمد ثروت في فقرة نجم النجوم والفقرة إعداد وتقديم د. دعاء نصر التي بدأت بالحديث عن الفنان الكبير محمد ثروت.
النهاردة لقاءنا اعزائي المستمعين مع فنان بدرجة الامتياز في الفن الأصيل. صوت وأداء ليس للمراهنة ولكن للخلود.
نجمنا نجم النجوم فى مجاله ومهما طالت غيبة الفن الجميل نلاقيه راجع اكثر أصالة وابداع.
يلا بينا نفرح معاه بفرحة العيد لانه لما عاد تانى عاد زى هلال العيد برونقه الجميل .
انهاردة معنا عبر أثير راديو عالم النجوم الفنان الكبير محمد ثروت.
أهلا وسهلا بحضرتك وكل عام وحضرتك طيب وعيد سعيد.
انهاردة لقاءنا له طعم الحاجات الحلوة ورائحة الفن الأصيل.
ونوعد حضرتك إننا مش ممكن نستعجل فراقك عنا عبر أثير راديو عالم النجوم.تسمح لينا نبدأ مع حضرتك أسئلة محبينك للرد عليها.
السؤال الاول :
انهاردة مع أخر يوم في شهر رمضان المبارك ووقفة عيد الفطر المبارك نحب أن نقدم التهنئة لحضرتك بخصوص مشروعك الانسانى وهو أتوبيس ثروت “العيادة المتنقلة” ضمن مبادرة رئيس الجمهورية لتطوير الريف المصرى.. ممكن حضرتك تكلمنا عنه للإيضاح اكثر؟
والله ببساطة شديدة جدًا أنا ليا مؤسسة ثروت للأيتام بقالها 28 سنة والحقيقة المبادرة لسيادة الرئيس كلمني أحد الأصدقاء من دكاترة القلب وهو متخصص في الكشف علي العيوب الخلقية لقلب الأطفال وطلب مني مكان كعيادة للكشف وقولتله هتخدم مين قالي هتخدم أبناء القرى في محافظة الغربية .قولت له عشان نسهل علي اهالينا نفقات الانتقال والنفقات التي تلزم هذه الزيارات لمراكز الكشف أنا هجهز أتوبيس وتجيب أنت الاسطف بتاعك والمعدات وننزل القرية والناس في مكانها يتم الكشف علي الحالات الحقيقة هما فرحوا بالتجربة دي وسألته يا دكتور علاء هو “علاء الغمراوي” وقولت له انت في الطبيعي بتكشف كام كشف قالي من ٥٠ : ٦٠ وصلنا في هذه الجوالات الي ١٩٠ و٢٢٠ و ٢٥٠ حالة في اليوم .
فالحمد لله لاقي نجاح كبير جدا وكمان الكشف عن الأنيميا والصفرا عند الأطفال حديثي الولادة.
السؤال الثاني :
ماهو البعد الصحى لأهالينا فى الريف المصري من خلال مؤسسة ثروت الخيرية لدعم سلامة قلبك وصولا لصحة أفضل لقلوب المصريين؟
والله أنا الحقيقة ان الخدمة الصحية بدأت توصل لكتير من الأماكن اللي كانت محرومة القرى والنجوع والمحافظات النائية لا الحقيقة في تطور صحي ويكفينا الحقيقة فخرا أننا تخلصنا أو انتهت مشكلة فيروس سي الذي كان هاجس كبير عند المصريين. ليه أقارب توفاهم الله بفيروس سي والحمد لله.
السؤال الثالث :
حضرتك فى إحدى لقاءاتك الصحفية وخاصة لقاءك الصحفى بجريدة عالم النجوم. قولت أن اغنيتك الأخيرة يامستعجل فراقى هتكون بداية لاعاده إنتاج أعمالي ..تعقيب حضرتك اية؟
والله إن شاء الله هتكون فعلا بداية لأعمال تانية كتيرة علي النسق اللي عملته هتكون حاجة مختلفة حاجة جديدة حاجة يعني مقدرش أقولك غير يارب تسعد الناس.
السؤال الرابع :
هل توقعت نجاح أغنية يامستعجل فراقى على هذا النحو اللى تخطت المليون مشاهده بعد ساعات قليلة من صدورها؟ وهل صدور الأغنية كان عن قصد فى عيد الحب؟
مكدبش عليكي بالنجاح الكبير ده ده فاجئني واللي فاجئني أكتر الناس تحس إن الفن بخير والدنيا بخير والذوق العام بخير ومش ذى كتير ما بيقولوا الجمهور عايز كده لا الجمهور عايز حاجة تخاطب قلبه وكيانه ووجدانه ومشاعره ثم ان في شرايح عمريه اتعرفت عليه واتعرفت عليها من خلال رصدي لبيانات اليوتيوب والفيس بوك والانستجرام .
إللي عايزه اقوله ان الإنسان في مصر كل حاجة حلوة موجوده بس لازم نبص للجزء الإيجابي ومنهتمش بالسلبي لان السلبي ده من أدوات الحياة مش معقول نبقي دايما بنبص علي الحاجة الغريبة السلبية ونسيب الحاجة اللي اتربينا عليها وملت مشاعرنا طول سنوات.
السؤال الخامس :
حضرتك فى بدايتك كانت أغاني الأطفال لها نصيب كبير .. فهل حضرتك تنوي إعادة بعض أعمالك التي لازالت عالقة مع الجمهور المصرى والوطن العربي مثل الاغانى الرومانسية واغانى الأطفال؟
دا حقيقة انا دلوقتي بصور رسوم متحركة لأغنية جدو علي الأغنية اللي ربت أجيال كتيرة وانت من هذه الأجيال وشباب كتير بيعلموها لولادهم وعندي اغنية اسمها حمادة اللي بيغلب أهله و بياكل حلويات وبتسوس سنانه واغنية حفيدتي اللي هي فريدة مقدرش أقولك هي عاملة فيه أيه.
السؤال السادس :
ماهو الجديد لدى الفنان محمد ثروت؟
والله أنا عندي بعد العيد في مفاجأة مقدرش أقولها وهي اغنية جديدة هتكون بعد العيد بأسبوعين شهر بالكتير ودي هتكون مختلفة عن اللي قبلها.
السؤال السابع :
انهاردة وقفة عيد الفطر المبارك.. مين اللى هتقوله كل سنة وانت طيب؟
هقول لكل الدنيا هقول لمصر هقول للعالم العربى هقول للناس كلهم كل سنة وانتم طيبين كل سنة ومصر طيبة كل سنة واحنا في سلام وأمان وندعي ربنا ان الأيام تكون بركة وخير علي الدنيا كلها.
السؤال الثامن :
رأيك ايه فى الجيل الجديد من المغنيين؟ وهل هو جيل مظلوم ولا جيل ظلم نفسة ؟ ولا متطلبات العصر ظلمتهم؟
لا أنا مش مؤمن بالكلام ده حتة ظلم نفسه واتظلم مفيش حد عنده موهبه وبيبذل مجهود مبيوصلش لحاجة ولولا اختلاف الاذواق لبارت السلع بس هي محتاجه مجهود شوية محتاجة انسان عنده رؤية عنده فكر ويتوكل علي الله.
السؤال التاسع :
الفنان محمد ثروت يقدر يقولنا هو من أى جيل .. هل جيل الوسط ولا جيل الشكل المختلف؟
أنا الجيل اللي ظهر بعد رحيل عبد الحليم حافظ مباشرة انا تلميذ الأستاذ محمد عبد الوهاب تعاملت مع قمة هذا الفن في هذا البلد في اكتر من لحن استاذ عمار لحن لي أكتر من ١٠ ألحان واختياره كان ليه انا من ابناء جيلي كلهم اتعاملت مع اساتذة الفن كله مفيش ملحن عربى ما تعملتش معاه .
مثلت في السينما فيلمين وعملت 3 مسرحيات وغنيت في 3 مسلسلات غنيت للوطن غنيت اطفال غنيت ديني بحب بلدي اوي مؤمن بها سعيد اني ابن من ابنائها وده شرف ليه بدعي ربنا سبحانه وتعالي انه يثبتني علي اني معملش حاجة تزعل الناس او حاجة اخجل منها.
وفى نهاية لقاءنا لا يسعنا إلا أن نتوجه بالشكر والامتنان وإتاحة الفرصة لمستمعى ومحبى راديو عالم النجوم وجمهورك بهذا اللقاء الشيق.. مع تحياتى
دعاء نصر
