تامر فرج للمخرج وائل فرج: “لما يكون فيه منك هاي كوبي”

كتبت: ابتسام السيد عبد الغفار

وفقاً للتشابه الكبير بين الفنان تامر فرج وأخيه المخرج وائل فرج، نشر الفنان تامر فرج منشور عبر حسابه الشخصي على “فيسبوك” ، يوضح فيه ذلك التشابه قائلاً :

“لما يكون فى منك هاى كوبى، نفس مشكلة كل سنة ،اللى كان حاضر مهرجان الجونة ده اخويا المخرج وائل فرج مش انا ،وحاضر بصفته كمخرج وشركته أحد رعاة المهرجان ،انا محضرتش المهرجان ولا مرة والمصحف ،وان شاء الله مش هحضر غير لما يكون ليا لزمه ومدعو رسميا من إدارة المهرجان اللى أكيد فاكرين زى ناس كتير ان انا اللى بحضر كل سنة ،وائل راجع بيقولى ان احساس غريب قوى انك مش عارف تحس ان انت هو انت ،وان الناس بتعاملك على انك واحد تانى وانت بتضطر تتعامل وتتصور كواحد وانت جواك واحد تانى ،فتحس انك هاى كوبى مش اصلى ،ربنا يخلينا لبعض يا لول ومنتحرمش من بعض ابدا وتفضل كده مشرفنى فى الحتت اللى مابروحهاش ،القمر.”

ليرد عليه المخرج وائل فرج عبر حسابه الشخصي على “فيسبوك” قائلاً :

“من أغرب المواقف اللي حصلتلي فالمهرجان بسبب موضوع الشبه ده واللي وقفت قدامها صامت لمدة ثواني بدون أي تعليق مش عارف المفروض أقول إيه

الموقف الأول: أحد الأصدقاء جاي يسلم عليا وبيقولي على فكرة أنا صاحب وائل أخوك ،بعد لحظات صمت رديت عليه (ما هو أنا وائل أخوه وصاحبك يا أهبل)

الموقف الثاني: صديقة عزيزة ومقربة جداً ومتعرفش تامر معرفة شخصية قابلتها في حفلة وسلمت عليا بفتور غريب إفتكرتها زعلانه من حاجة ،تاني يوم قابلتني مقابلة حارة جداً وقالتلي لسه شايفة أخوك إمبارح في الحفلة.

أنا بقيت أقصد أكون ودود بزيادة مع اللي يعرفني واللي ميعرفنيش عشان مشوهش صورة إنسان تاني غيري ،عشان محدش يقول عليه تنك وبيتنطط.”

يذكر أن آخر أعمال الفنان تامر فرج مسلسل “الآنسة فرح” حيث يجسد شخصية “الفنان ماجد الألفى” الذى يعمل كممثل ويقوم ببطولة مسلسل يدعى “لهيب القبطان” ويقوم بدور والد الفنانة “أسماء أبو اليزيد” التى تجسد شخصية “فرح” التى تدور حولها احداث المسلسل.