حمادة العسكري يكتب: قلبي شافها من بعيد
قلبي شافها من بعيد
حاولت أجمع نفسي وأهدى
حسيت بلهفه وإرتباك
والخطوه تقلت مره واحده
نسيم هواها عدى جنبي
صحى فيا الذكريات
حبها عايش في قلبي
مين اللي قال الحب مات
ومهما قولت نسيتها إوعوا تصدقوا
القلب عمره ما ينسى اللي بيعشقه
انا لما بحتاج حضنها باخد صورتها
في حضني وقلبي يحكي ع اللي مزهقه
نفس الغلاوه يمكن اكتر حبيتين
عمر الفراق ما مره فرق بين روحين
من كل قلبي بدعي ليها بالسعاده
من غيرها ساده لون الحياه وطعم السنين
*******
حرمت عيني م النظره ليها
خايف يبان فيا الحنين
وهو كان حاضن إيديها
مشهد سريع لكن حزين
يازمان لو ينفع تاني ترجع
تتغير فجأه خطوط سيرك
أكتر إحساس ممكن يوجع
حبيبك يبقى نصيب غيرك
ومهما قولت نسيتها إوعوا تصدقوا
القلب عمره ما ينسى اللي بيعشقه
انا لما بحتاج حضنها باخد صورتها
في حضني وقلبي يحكي عاللي مزهقه
نفس الغلاوه يمكن اكتر حبيتين
عمر الفراق ما مره فرق بين روحين
من كل قلبي بدعي ليها بالسعاده
من غيرها ساده لون الحياه وطعم السنين
