ع الأفيش .. بقلم / حمادة العسكري
كله مخلص ع الأفيش
صوره آه أفعال مفيش
كدب بدرجة إمتياز
كله راسم ألف دور
منظر بس مفيش شعور
تمثال مصنوع من إزاز
فجأه الطبع يبان ويغلب
والكلام الحلو يقلب
رد بارد وإبتزاز
كله حلو ف البدايه
أخر مشهد ف الحكايه
تتباع من كل العزاز
كله عاش نفس الروايه
إختلاف بس الوجوه
نفس الفكره ف النهايه
الإحساس نفسه وأخوه
اللي يمشي الطريق ده
إكسبوا ثواب رجعوه
أيوا اللي عليا عدي
مش عايزكو تجربوه
ماتتعلقش بحب غايب
الحنين تملي جايب
ف البال كل الذكريات
إسكت جوه القلب داري
إتعلم ماتقولش شاري
غير من بعض الصفات
اللي فات معدش راجع
هتسيب نفسك للمواجع
شوفلك مخزن أو چراچ
ماتتعشمش ف لمه عيره
خليك آه زي الجزيره
أقرب حد ليك البلاچ
كله عاش نفس الروايه
إختلاف بس الوجوه
نفس الفكره ف النهايه
الإحساس نفسه وأخوه
اللي يمشي الطريق ده
إكسبوا ثواب رجعوه
أيوا اللي عليا عدي
مش عايزكو تجربوه
