أحمد رمزي “رسام فيكتور آرت” : أكبر داعم ليا بعد ربنا هو بيج رامي.. ونفسي أدخل جينيس كأصغر رسام ديجيتال
حوار: أحمد الدخاخني
” رب ضارة نافعة”, كانت العلاقة بين الطالب الثانوي أحمد رمزي وبين الرسم منذ الصغر علاقة بسيطة, لم يكن في تفكيره أن يكتسب احتراف الرسم بـ”فيكتور آرت” إنما فقط كان يمارسه على سبيل الهواية ليس أكثر, حتى أتت ظروف جائحة كورونا وتطبيق الحجر الصحي والالتزام بالمنازل, فقرر أحمد الاحتراف في الرسم الديجيتال وأن يثبت ذاته فيه, وتفنن في رسم صور العديد من المشاهير في عالم الفن والرياضة مثل محمد صلاح وبيج رامي ومحمود الخطيب والفنان يحيى الفخراني وغيرهم.
وفي حوار خاص تواصلت ” عالم النجوم” مع الرسام أحمد رمزي, أحد أبناء محافظة الإسكندرية والذي يبلغ من العمر 17 عاماً, للحديث عن بدايته في اكتشاف موهبته في الرسم, كما يلي:
في البداية كيف اكتشفت موهبتك في الرسم ؟
من سنتين كده بدأت أرسم فيكتور بس كان الموضوع عادي اللي هو مش في دماغي أحترفه او أشتغل فيه وكده لحد فترة الحجر الصحي و القعدة في البيت فترة طويلة أوي قررت أرسم وأطور ده وأعمل فيه مشوار, والموضوع مكنش سهل و مكنش صعب, كان سهل عشان بعرف استخدم الفوتوشوب من وأنا عندي 7 سنين بسبب أن جدي عنده استوديو تصوير فكان معلمني استخدمه وانا صغير, وكانت الصعوبة كلها أن مفيش جهاز كويس يشتغل ويستحمل وكمان التقليل من المجهود وكان في كل رسمة ده و مكنش فيه سرعة إنتشار.
كم من الوقت تستغرق في رسم صورة ؟
من 8 ل 10 ساعات بس أكيد مش متواصلين مفيش حد يستحمل كل ده قدام شاشة.
من هم أكثر الناس تشجيعاً لك ؟
أهلي وعيلتي كلها عموماً بيستنوا كل حاجة وكمان بستخدم جهاز بابا يعني من غيره مكنش فيه أي حاجة هتكون موجودة, و المدرسين بتوعي برضه بيستنوا شغلي الجديد, و طبعا أكبر داعم ليا وسبب أني مكمل بعد ربنا هو بيج رامي.
هل حصلت على جوائز أو تكريم ؟
لا.
من هي الشخصية المشهورة التي تعتبرها مثلك الأعلى ؟
عموما هيكون أحمد حلمي و إيلون ماسك, مع أني زعلان جدا من احمد حلمي عشان يوم ما رسمته هو شاف الرسمة و ماردش عليا.
ما هي أحلامك الكبيرة التي تسعة لتحقيقها ؟
أخش كلية طب أسنان لأنه حلمي و حلم أهلي كلهم, وفي مجالي نفسي فعلاً أخش جينيس كأصغر رسام ديجيتال, حلم صعب بس الأحلام مش بفلوس يعني فعادي.
