أديني عايش .. بقلم / حمادة العسكري
أنا أكتر واحد شاف وجع
وأكتر واحد إتخدع
مش لاقي حضن يضمني
زي اللي من شجره إتقطع
طريق كل يوم يضيق
ومطبات طول الطريق
أعز حبيب وأقرب صديق
واحد ورا واحد رجع
أنا أكتر واحد إتنسى
شاف دموع صبح ومسا
حنيتي آه قلبت قسى
من كتر الخذلان والبكى
من كتر ضعفي بقيت قوي
مابقاش ليا دراع يتلوي
جوايا حزن فيه بنكوي
يبكي جبال لو يتحكا
أديني عايش طول ماانا عايش هشوف
من كتر خوفي مابقتش حاسس خوف
من كتر دمعي مفيش ف عيني دموع
كسرتني الوحده قطمت وسطي الظروف
قلبي ف بحر جراح غرق
موج عالي ومركب ورق
أجمل عمر كده إتسرق
عدى كأنه ساعة زمن
غربه آه وسكة سفر
م الوجع مفيش مفر
لو ذنب إمتى يتغفر
لإمتى أدفع التمن
١٠٠ خاطر ليا إنكسر
وجعي فيا ساب أثر
من كتر عشرتي للبشر
شعاري ممنوع الثقه
جوه مني جرح نافذ
بالحياه مابقتش حاسس
معدش دافع ولا حافز
كل النوافذ مغلقه
أديني عايش طول ماانا عايش هشوف
من كتر خوفي مابقتش حاسس خوف
من كتر دمعي مفيش ف عيني دموع
كسرتني الوحده قطمت وسطي الظروف
