إتيكيت جبر الخواطر من كتاب مملكة الإتيكيت بقلم : هايدي سلامة
متصل الآن …
انا مش بخير… ازاى !!!!!
أنت طول الوقت متصل الآن وكنت منزل أستوري فاطمأنيت عليك لما شوفتها .حاول على قد ما تقدر إنك تراعي ظروفى ، وتحترم خصوصياتي، مين قال انى لما أتواجد على وسائل التواصل انى كده انا بخير ….
مش لازم يبقوا متاحين لك وقت ما يكون وسائل تواصلهم “متصل الآن ” ممكن يكونوا متصلين شغل ، تعب ، مرض ، حزن ، جبر خاطر لحد آخر، قدر ظروفهم ومواعيدهم ، وبلاش تلوم وتخلي اللى بينك وبينى انك شوفتلى حالة او تعليق انا محتاج أسمع صوتك وأحس أنك فاكرني
حط في عقلك دايمًا إن الخيبات والصدمات من اللي حواليك مش هتنتهي أبدًا مهما مرت السنين.. أنت اللي لازم تغير من عقليتك وتفكيرك وحكمك على اللي حواليك.. وتركز في اختياراتك وتتوقف عن التوقعات العالية علشان تحافظ على قلبك من الكسر
لازم تتقبل فكرة إنه عادي مش كل الناس ممكن تحبك أو تقبلك.. لأنه طبيعي إنك ما تعجبش كل الناس.. لكن لازم تعجب أهلك وأصحابك واللى جعلتهم فى يوم من الأيام من المقربين لك يتقبلوك بجمالك وعيوبك.. لازم يشوفوك عظيم قوى ولو فى يوم من الأيام وقعت يساندوك ويقويك .. اللي مش متقبلك واللي بيحاول يكسرك أو يضايقك..ابعد عنه ركز في الناس إللى أعطاها الله لك سند.. وخليك واثق من نفسك وكن أنت الإنسان الراقى الذى يجبر الخواطر..
متنتظرش حاجة معينة تحصل علشان تكون بعدها سعيد.. سلم أمورك كلها لله وارضى باللي كتبه لك وخلي عندك النية إنك تكون سعيد بكل قدر هترزق بيه وهتلاقي نفسك فعلاً سعيد وراضي بكل شيء
السعادة مُعدية.. يعني كل لما تبقى فى وسط ناس روحهم حلوة يجبروا الخواطر ومعبرين وقادرين على إنهم يغيروا مودك كل ده هينعكس عليك وهتحس بسعادة في حياتك وهتتفائل بكل اللي جاي لأن الشعور بيتزرع جواك تلقائي.. فكتر حواليك من الناس اللي تجبر الخاطر .
أفضل كلمة ممكن تسمعها فى حياتك هى
” أنا حاسس بيك “
إبدا تعاطفك بأنك تسمعه صح باهتمام وتركيز ، وتشجعه يطلع كل اللى جواه ، وقوله: ” كمل..” ، “انا متفهم اللى بتمر بيه”، “انا بحاول أعرف المشاعر إللى أنت حاسس بيها .. لحد ما يقولك الشعور إللى بيمر بيه هو ده إللى المفروض يحصل مش نطمئن على بعض لمجرد أنه “متصل الآن ”
حكاية تخص الكاتب عزيزى القارئ
الوالدة كانت فى الإنعاش وفى آخر لحظات حياتها وكان تليفونها متصل الآن …… والمفاجأة أنه فضل متصل حتى بعد الوفاة بلحظات
وفى النهاية،،،
أتعود انك متتعودش
في حاجات كانت هتبقى حلوة أوي لو كانت جت وقت ما أحنا كنا عايزين أوعي تطلب من حد انه يهتم بيك اوعي تستني حد يسأل عليك وأمسح الرقم اللي مستنيه يتصل بيك علشان ما يصعبش عليك نفسك وقول بأعلى صوت
……انا مش متصل الآن……
………انا مش بخير ………
