إحسان الترك يفتح قلبه لـ جريدة عالم النجوم ويحكي مالم يحكيه من قبل

إحسان الترك يفتح قلبه لـ جريدة عالم النجوم ويحكي مالم يحكيه من قبل

إعداد / نهى مرسي .. حوار / دعاء نصر

إحسان الترك ممثلٌ مصريٌ بدأ مشواره الفني في مطلع الألفينات، حيث أدى أدوارًا ثانوية ومساعدة فقط،انحصرت في الأدوار المساعدة ذات الطابع الواحد. فغالبًا ماكان يلعب دور الطبيب أو رجل الأعمال أو المسؤول أو المدير. كما شارك العديد من النجوم في أعمالهم أمثال عادل إمام، وليلى علوي، وسميرة أحمد وغيرهم. مشواره الفني حافلٌ ومزدحم بالأعمال الدرامية والسينمائية، التي تجاوزت 30 فيلمًا سينمائيًا، و100 مسلسلٍ دراميٍ

السيرة الذاتية للفنان إحسان الترك

وُلد الفنان إحسان الترك في مدينة القاهرة في مصر. أحب الحاضنة الشعبية والبيئات البسيطة، وتمنى تمثيل أدوارٍ عنها. عُرف عنه غزارة إنتاجه الفني الذي بدأ مع مطلع الألفية الثانية. دخل السينما عن طريق الصدفة، عندما تقدم للتمثيل في أحد الأفلام فتعرّف على ممثلين في الوسط الفني.

أما أول ظهورٍ له فكان في إعلان لشركة أدوات منزلية، ثم في فيديو كليب “حط النقط على الحروف” للمغنية بوسي سمير

من أبرز أعماله الدرامية

مسلسل “حرس سلاح”، ومسلسل “بين شط ومية”، “العصيان” بجزئه الأول، زهرة وأزواجها الخمسة”، “أغلى من حياتي”، “القبة الحمراء، على نار هادئة”، وغيرهم الكثير من الأعمال

من أبرز أعماله السينمائية

فيلم “معالي الوزير ،فيلم “سحر العيون، وفيلم “بركان الغضب”.

حصل إحسان الترك على منصب سفير النوايا الحسنة في أمريكا. كما حصل على الدكتوراه الفخرية من جامعة نيوكاسل في انجلترا

حضرتك دخلت المجال عن طريق إعلان أدوات منزلية وبعدها كليب غنائي وبعد كده بدأ المشوار عرفنا علي أول دور شاركت فيه ؟

أول حاجة عملتها كان فيلم سحر العيون وبعدين تطورت الحكاية بقت هنا اعلان هنا كليب هنا حلقة مثلا في مسلسل كده يعني

حضرتك شاركت في العديد من الأعمال السينمائية والدرامية خلال مشوارك الفني، ما أقرب الأعمال التى قدمتها إلى قلبك؟

بصي يا استاذة دعاء أنا مفيش عمل انا عملته ماحبتهوش للعلم يعني ، وبعدين انا مش من الممثلين اللي يقولك ايه ابعت لي الاسكريب لما اقراه واعيش الليله ومش عارف ايه والكلام ده ، انا بتأقلم علي هوا المشهد اللي في ايدي انا حتي مش بيبقي معايا ورق و داخل علي مشهد واعمل مشكلة معاهم واخد نسخة المخرج اقرا المشهد وبعدين ادخل أشتغل ، انتي واخدة بالك ،

بس طبعا اقرب الأعمال لقلبي “أمرأة من الصعيد الجواني” دي اللي كنت عامل فيها شخصية مختلفة عن الشخصية ، اللي حطوني فيها لانهم حكموني في دور الباشا والوزير لكن هنا انا كنت عامل فيها صعيدي
وعندك برضه ضربة معلم والناس كلها اشادت به ناس كبار يعني في الوسط ، أنا العبد لله عاشق ولهان لشغلي

الفنان إحساَن التـرك

ايهما تفضل العمل في السينما ام التليفزيون؟

والله انا بفضل العمل بشكل عام يااستاذة سواء كان سينما أو تليفزيون انتي شوفتي فيلم الفلوس، اه، شوفتي شغلي فيه، علي فكرة المشهد ده متقطع نصفه، ليه لان لما كنت بطلع بره بيجبولي الفاتورة بتاعة المحل،

وبعدين بعمل مشكلة مع صاحب المحل، قطعين نصفه، قاطعين نصفه ليه علشان الوقت تقريبا متفهميش ما هو فيلم بوحة انا مصور حوالي 10 مشاهد طلع اية مشهدين تلاتة ما هو في المونتاج بيحصل ترتيبات تانية بقي قالولي انا عامل في فيلم بوحة ده كوميديا مشكلة يعني ماينفعش تعمل كوميديا وانت جانبك فلان الفلاني وبتاع دا اللي انا بقصده آية،

إن في فيلم الفلوس ده كنت عامل عملية في العمود الفقري اخد فيها 17 غرزة في رقبتي من ورا وبعد ماطلعت من المستشفى ب 3او4 ايام طلبوني نزلت جري علي الشغل. حضرتك بتعشق شغلك؟ طبعا يعني في شغل بيكون في إحسان الترك، بس وأوقات مفيش إحسان انا من النوعية دي.

الفنان إحسان الترك مين من الفنانين عملت معاه وبتتمني تشاركة مرة آخري واكتر مخرج؟

طبعا الاستاذ عادل إمام عملت معاه 3 أعمال تقريبا ويسرا ومدام سميرة احمد الميزة هنا ان أنا بحبهم من قبل مااكون ممثل وانا الحمد لله خفيف معاهم،

طيب والمخرجين ؟ لا العمالقة بقي عندك الاستاذ سمير سيف الاستاذ علي عبد الخالق الاستاذ احمد يحيي احمد السبعاوي وعم أسماعيل عبد الحافظ هما الناس دي في منهم اللي مات وفي منهم اللي عايش انما الجداد دول كلهم سامح عبد العزيز في بداياته خالص

انا كنت بشتغل معاه من الناس الجميلة وعندك احمد شفيق برضه نفس الشئ. هما دول اللي بحب اشتغل معاهم اكرم فريد من الشخصيات الجميلة عملت مع اكرم فريد فيلم اسمه معالي الوزير بطولة احمد زكي الله يرحمه .

حضرتك شاركت الفنان محمد رمضان في نسر الصعيد؟

اه طبعا و في مسلسل اسمه نادي الشوارع و هانم بنت باشا صح هو ده ونسر الصعيد والأسطورة

كنت عايزة اعرف رأي حضرتك في محمد رمضان كإنسان وايه رايك في الضجة اللي حواليه وأنه أفسد الذوق العام للفن؟

بصي في ناس تقول الاستاذة دعاء دي كذا كذا كذا، طيب انا الاستاذة دعاء دي معايا زي الفل، مقدرش اقول عليها كلمة وحشة ومحمد كويس، تامر حسني انا اعرفه من زمان، محمد ده جوا اللوكيشن انسان عادي جدا وبنقعد نتكلم ونضحك ونهزر غير اللي الناس بتقوله بصراحة يعني،

لقاء مع الفنان إحسَان التـرك

الفنان إحسان الترك

يعني ما أفسدت الذوق العام للفن؟

انا هقولك علي حاجة يا استاذة دعاء هل محمد رمضان اللي مسك سكينة وسينجة وعمل ده ولا ده شغل اتعرض عليه، يعني احنا كنا بنقول شرير الشاشة، مين انتي صغيرة هههههه شرير الشاشة كان مين محمود المليجي علي ما أنا سمعت بقي ان محمود المليجي ، كان من أطيب مخاليق ربنا، عادل ادهم انا اعرفه شخصيا، من ايام ما كان بيجي الكويت كان بيجي لاخته وجوز اخته صحبي تقعدي معاه الجمال والخجل والرقي اللي ربك خلق لكن شوفي أدواره عامله ازاي،

اه شر طيب ، احنا بناخد الانطباع على المسلسل من الشاشة لكن انا بالنسبالي لو سالتيني علي محمد رمضان لو سالتيني على الزعيم عادل إمام كان يقولك عادل امام ده متعنطز دا مناخيره في السما تدخلي تعملي المشهد معاه وانتي بتترعشي بس انا الحمد لله مكنش عندى الكلام ده انا اول مااشتغلت كنت بدخل اشتغل مع الممثلين التقال دا كان كرم ليه ماكنتش بتهز ابدا،

تصريحات إحسان الترك عن احساسة بالوقوف أمام الفنانة القديرة سميرة أحمد

الوحيدة اللي كان قلبي بيرجف ادامها مدام سميرة احمد وليه معرفش روحت عملت معاها مسلسل اسمه احلام البوابة كانت طالعة وزيرة وانا عضو مجلس شعب ورايح لها عاوز واسطة وناس وبتاع كنت داخل اللوكيشن وقلبي هيفط من صدري زي مابيقولوا هههههه بس انا اول ما دخلت البروفة واندمجت

انا رزعت المكتب ادامها بقولها انتي مش هتنفذي انتي مش هتعملي وانا هعمل وهسوي كنا في البروفة يعني بس هيا ندهت الاستاذة رباب حسين من المخرجين العظماء، الباجوري دول اللي الواحد نفسه يرجع يشتغل معاهم تاني ساندرا نشأت علي الرغم انها صغنونة بس جبارة يعني فجدت بقي الاستاذة رباب حسين قال ايه اللي اتعملته، انت هديت الدنيا علي المكتب خليك هادي شوية قولتلها حاضر قالتلي، الاستاذة كشت وهيا ست جميلة وربنا يعطيها الصحة والعافية.

الفنان إحسان الترك في إحدى لقاءاته

إحسان الترك

الفنان إحسان الترك يصرح : مفيش حد مشتغلتش معاه

كله مفيش حد مااشتغلش معاه تقريبا، حسن حسني واحمد عز محمد رمضان تامر حسني واتفرجي علي جمال تامر في اللوكيشن ومحمد نفس الشي مش زي الناس مش فاهمة عنه انا لما بقرأ عنه حاجة لان انا اتعملت معاه في الناحيتين يعني لما كان لسه، ولما ربنا كرمه الراجل بالنسبالي متغيرش في تعامله معايا حتي الأساتذة المخرجين العمالقة زي ماقولتلك وأحمد صقر كل الاساتذه اللي ذكرتهم كانوا بيتعاملوا معايا بكل رقي وطبعا انا هتعامل معاكي كويس انتي هتتعملي معايا احسن ما انا هتعامل معاكي كمان اللي بخاف منه الأستاذ محمد النقلي ، ليه ؟ .. بخاف منه ههههههههه ،

هو حبيبي وطبعا وكده، شديد صح، اه شخطتين في اللوكيشن خلي الحيطان توقع ههههههه هيا ليها حدودتة بس انا مش هقدر اتكلم فيها الحدوتة دي،

ليه ؟ هي مش حصلت قدام الناس كلها؟

معلش بقي يا أستاذة ماشي، كان في نجمة في العطار والسبع بنات انا ماكنتش فيه لكن بنتي اللي كانت فيه ف المهم كان في نجمة كبيرة معاها ابنها والشغالة وخرجت تشتري حاجة من بره اللوكيشن ورجعت وهو كان عاوزها تدخل تصور فزعق وعمل وهد الدنيا ومشاها وجاب غيرها يعني، علشان طلعت تشتري حاجة اه طبعا دا انتي تحت الكاميرا .

ايه الفرق بين الفن زمان ودلوقتي من وجهه نظر الفنان إحسان الترك ؟

الفن زمان كأولاد صغيرين كنا بندخل السينما نتعلم حاجة يعني انا ابويا وامي والمدرسة علموني ان السرقة حرام والقتل حرام والمخدرات دي بتضيع الواحد، انا النهاردة ذاكرت القاتل بتمسك بعد 50 سنة في فيلم رصيف نمرة خمسة

فاكرة اه بتاع فريد شوقي لما والفنانة اللي معاه اكتشفت القاتل كان زكي رستم من السبحة بتاعته مكنتش فردوس عبد الحميد اه فعلا معلش انا اسف تعالي فيلم المرأة المجهولة شادية في آخر الفيلم لما ادمنت شكلها بقي عامل ازاي وهكذا يعني.

في أول الحديث دخلت شمال في محمد رمضان انا إحسان الترك لو جالي دور حد قالي هتعمل معلم وهطلع بسكينة وهتغز وقالي هتضرب بيها مين وبتاع لازم هعمل كده ما ده اكل عيش، (ماهو انا عاوزة رايك عشان اوصله لناس كتير)

ويكمل الفنان إحسان الترك قائلا :

قالي طيب هو اللي عمل كده الدور اللي حكم عليه كده، ايوه . انا هقولك علي حاجة اول دور طلعت فيه كنت طالع مستشار كان ليه مشهدين يعتبروا صامتين كلمتين كده.

لان كنت ليه بقول بسم الله الرحمن الرحيم اتصنفت بعد كده مستشار قاضي اب كلاس مش عارف ايه اب صايع كذا قصة الراجل المركب اللي هيا السلام اسمه ايه بلاش،

فاكرة مسلسل احنا الطلبة اهو احنا كنا قصة الراجل بتاع المركب السلام العبارة نفس القصة انا كنت بمثل الشخصية دي اتحكمت بشخصية اية الباشا،والوزير، والمحافظ والكلام اللي مبيأكلش عيش اوي،

بس معلش انا ممثل بين انا بعمل الكاركتيرات اللي بعملها كراجل صعيدي فلاح. (بس بيليق عليك دور الباشا البرنس)، اه مش هنختلف (بس تعدد الأدوار طبعا جميل لازم لانك ممثل)

يروي إحسان الترك تفاصيل حضوره علي خشبة المسرح

يعني وانا على المسرح وانا عامل معلم اساتذة محترمين من ضمنهم استاذ فهمي الخولي من ضمنهم، من ضمنهم ناس عظيمة أشادوا قالولي يا عم إنت ورتنا عبد الفتاح القصري، وورتنا محمد رضا وورتنا عادل ادهم،

ايه ياعم انت فيك ايه الناس ليه غفلانة عنك المخرجين ليه غفلانين عنك بتوع التليفزيون وبتوع السينما هيا دي المشكلة اللي وقعين فيها. واحد زي الفنان عبد الرحمن أبو زهرة التاريخ يطلع يعيط، يشوفوني كاني لسه ممثل جديد.

كنت لسه هسال حضرتك متعاطف معاه في كتير من المصريين متعاطفين معاه ومع هاجموه؟

طبعا متعاطف معاه حتي لو هو وحش في اللوكيش زي ماقالوا، ماشي وبعدين لو شتم فيها ايه يعني دا راجل كبير.

تصريحات إحسان الترك عن الأحداث التي يتعامل بها الجيل الصاعد

امال تعالي شوفي عيال لسه صغيرة بيعملوا ايه دلوقتي ييجوا يقولوا للمخرج لا انا مش عايز دى انا عاوز فلانة، طبعا لازم اتعاطف معاه دا قيمة وقامة دا عبد الرحمن أبو زهرة من واحنا عيال صغيرة بنشوفه في السينما في اية. الدنيا اتقلب حالها .

إحسان الترك يصرح بأن الاعلام هو من يصنع النجم

اه ماهو لازم عفوا الإعلام هو اللي بينجم الواحد مننا زمان كان في توفيق الدقن الاهرام كتبت والاخبار كتبت الجمهورية كتبت مكنش في غير الا 3. 4 جرايد دول يعني اخدتي بالك يقابلوه ويعرفوه نفسيته اية واخلاقة اية، النهاردة فين الاعلام النهاردة ليه مش يركزوا في فئة من الوسط الفني مش لاقين ياكلوا مش بيركزوا عليهم ليه ويعملوا معاهم لقاءات ليه .

وكما يكمل حديثه الفنان إحسان الترك قائلا :

تعتبر قنبلة والفتيل بتاعها طالع لو لطش في هتعمل مشاكل انتي بتستألي ب 2 مليون ونص بني ادم، كتير كانوا عاوزين يعملوا وقفة من قبل رمضان لما أعدنا اتكلمنا قولتلهم لا ياجماعة مينفعش البلد مش مستحملة ومن ضمن الاسماء اللي فاكرها. فين عم فايق عزب فكراه طبعا.

اه فين نصر سيف. فين شريف خير الله ، فين يحيي زكريا دا اللي انا فاكره دا ممثلين انا بتكلم عن ناس معروفة، وتعالي بقي مخرج و 3. 4 معاه لان بيبقي في واحد مخرج منفذ وواحد ديكور ولوكيشن وبالنسبة للستايلست واللي معاه وحتى المكوجي اللي معاه، الناس دي بتشتغل موسم وبتريح منتظرين الموسم الجديد

الفنان إحـسان التـرك

الجانب الإنساني للفنان إحسان الترك

والله انا مفيش اسبوع اتنين الا اهلا يا احسان ازيك اهلا يا حبيبي والنبي يا احسان انا مش معايا اجيب عشا للبيت معلش هاتلي 100 جنية او 50 جنية ينفع كده لا طبعا، دي فئة عريضة مش سهلة يعني النهاردة بيخلق مشاريع علشان بيعيد تدوير القناة علشان يوفر فرص عمل.

ولما تروحي لشركة الانتاج كلمة واحدة تاني يلا ياماما بالسلامة ولما تشوفي حلمة ودنك، لو اشتغلتي تاني كلمة واحدة بس غلط او مثلا معجبتهمش ماهو ماينفعش، كنا الاول قطاع الإنتاج بيعمل اعمال مخيفة فين الأعمال الاجتماعية فين مسلسل زيزينيا بلاش شوفتي انتي مسلسل اوبرا عايدة (دا اتصور عندنا فى اسكندرية) .. مصر كلها كانت بتتفرج عليه انا كنت عايش بره في الفترة دي لا، انا بقول لحضرتك اوبرا عايدة انا كنت في الكويت الفترة دي كنتي تلاقي بصي عذاب بقي مش عذاب الناس كلها متجمعة مع بعض علشان تتفرج علي اوبرا عايدة دا غير أرابيسك و زيزينيا و ليالي الحلمية فين الاعمال دي هاتيلي بقي حد في الأعمال دي ممثل نص نص كلهم نجوم جديدين مش زي الايام دي.

إحسان الترك يتحدث عن صفات النجم الأوحد

يقولك انا النجم الأوحد مثلا اجيب احسان التركي اعطيله 20 مليون جنية واجبله من تحتيه ستارة واعطيله 10 جنية واقلب ويقولك انا بيع بالنجم ده عادل امام نفسه قالها ياجماعة انا من غير الكامبرس ما أسواش حاجة

كان حصل مشكلة بين الكومبارس بمجرد انه اعد علي ترابيزة في الحفله مش بيعمل حاجة كان حصل بينه وبين مساعد اخراج مشكلة وعادل امام عرف، قال انا كعادل امام مسواش حاجة من غير الكومبارس ده وعلي اللي عمله هد الدنيا في فيلم ببوس، وقال انا اللي هشتغل لوحدي في الفيلم الراجل فضل يزعق . انت كنجم النهاردة “س ” من الناس مش هيشيل العمل لوحده ولازم اللي يشيل معاه في دور خمس مشاهد او مشهدين اقولك علي حاجة انا ايه مشهد في مسلسل اسمه أولاد الشوارع

انا كنت بقوم بدور الدكتور اللي محمد رمضان بيجيب ليا كل يوم كام عيل اللي هو كان بيسرح العيال في الشارع بمناديل وكده فبيجبله كل كام يوم عيل فالدكتور ده بياخده ويعطيلة 15000 الف جنية وياخد الواد يذبحه ويبيعه أعضاء

وانا جيت حصل معايا مشكله فى مصورتش الليلة دي فجابوا عم محمد توفيق بتاع المسرح الله يرحمه عمل الدور ده ومات جت برضه الاستاذة شيرين عادل المخرجة كلم الاستاذة عاوزاك اية ياعم سعيد في آية رئيس شئون الممثلين بيكلمني شيرين عادل بتقول الدور ده مفيش غيره اللي هيعمله المهم روحت عملت المشهد كان بيني وبين الاستاذ احمد خليل .

دقائق من الصراع السينمائي بين ترك وخليل يرويها لنا الفنان إحسان الترك

لو شوفتيه عبارة عن 6 دقائق على الشاشة صراع مابيني وما بين الأستاذ أحمد خليل مصر كلها كلمتني عليه، كان ليا فيلم اسمه البيه رومانسي بتاع محمد عادل امام لما انا بطردهم هو وعم حسن حسني الله يرحمه وباسم سمرة وانا بطردهم وبجبلهم الكلاب

وهو مشهد مكنش ممثل تقيل له مش هينفع مش هسترخص امي وامك قالوا ايه يامسترخص يامستوكس لما اجيب ممثل اعطيله 10 جنية غير لما اعطيه 3 جنية بس بقي الانتاج اصل ده صحبي ودا ابن صحبي ودا قريبي وحاجات مش عايزين نتكلم في الكلام الغلط يعني، ف ده اللي واقعين فيه يااستاذة ربنا يعينا .

إحسان الترك ومعاناته بعد مشاركته بالأسطورة

انا من وقت الاسطورة اهة رابع سنة معنديش حاجة دا في حد ذاته ظلم، طيب افتح بيتي منين بس في اللي ساترني، في غيري مش لاقي يجيب عشا لاولاده ونجوم ، والحجة اية وانا مش بعرف امثل يابني هو انا اسمي مش معروف لو الحاجات دي مش متوفرة ماشي،

بس الحمد لله اسم الواحد معروف وصورته بتطلع علي الافيش، انا كنت عامل مسرحية في الاسكندرية اللي كنت عامل فيها معلم هبعتلك الافيش بتاعها شوفته مفيش علي الافيش غير العبد لله وتعالي اتفرجي المسرح كان عامل ازاي

وكنا حاجزين يومين عرض واليومين بقوا ثمانية وهبعتلك الافيش ، عيب اللي احنا فيه ده بهدلة انا حزين علي عبد الرحمن ابو زهرة والله، قوتلك اكتر من ابويا من عمي من خالي حزين بمعني الكلمة علي الراجل ده اكتشفوني من جديد.

إحسان الترك يتحدث عن براعة صداقاته وحسن اختيارهم للكلمات

هعطيكي ارقام ناس تكلميهم وتعرفي منهم اكتر مني كمان وهيكلموكي بكل وضوح وصراحة يعني، احنا مايقارب من 2 مليون بني ادم ياناس وبعدين المشكلة ايه بقى احنا عاملين زي الورد البلاستيك

بقي مناظر من غير ريحة تلاقي لابس البدلة ومفيش في جيبة 10 جنية الكارثة بقي لما يدخل يشتري حاجة تبقي كاتبة عليها 10 جنية وتدخلي عليه اهلا بيك يانجم بقت ب 100 جنية بتحصل ماهي الناس اللي بتاخد الملايين دي فاكرين ان الناس كلهم بتاخد كده دي مصيبة مش كارثه بس، هتتحل ان شاء الله،

اخر سؤال للفنان إحسان الترك تتمنى تحقق اية قبل انتهاء 2020 وتقول لمحبينك ايه بمناسبة عيد الاضحى المبارك؟

اتمنى قبل ما تنتهي 2020 أن ينتهي النفاق والدنيا ترجع لاصولها أن كل فئات الشعب تشتغل مش انا او انتي بس الناس طالعة من تجربة كورونا تجربة مريرة احنا كوسط فني بنعاني من قبل ازمة كورونا من 3:4 سنين

بقول لجمهوري بمناسبة عيد الاضحى كل سنة وانتم طيبين وانا النهاردة سعيد إن كنت معاكم وان كنت مع الاستاذة دعاء نصر وشرف كبير ليه اللقاء ده وان هيا جمعتني بيكم وكل سنة وانتم طيبين ويعود عليكم بكل خير وسعادة يارب ومازالت بطالب بمقابلة السيد رئيس الجمهورية، بإذن الله.