إسراء حسنين تتفنن في محاكاة الأماكن السياحية والدينية بالقهوة وبقايا الطعام
حوار: أحمد الدخاخني
إسراء حسنين الهادي, فنانة تشكيلية شابة من بنات ميت نما بمركز قليوب محافظة القليوبية, تخرجت في كلية التربية بنات قسم علم النفس, والتي تبلغ من العمر 27 عاماً, فمنذ صغرها وهي تمتلك موهبة الرسم من نوع خاص وطريقة مبتكرة غير تقليدية, حيث تبدع ” إسراء” في تصميم صور وتحويل بقايا الطعام إلى لوحات فنية, وتقوم بتشكيل صور شخصيات مشهورة في عالم الرياضة والفن وأشخاص أخرى عن طريق القهوة والشاي والنسكافيه, وتفننت بأدوات الطعام في تصميم الأماكن السياحية والدينية مثل الحرم المكي والمعالم السياحية في مصر والقدس الشريف, وأثارت تصميماتها إعجاب الكثير من متابعيها وأصدقائها لدرجة الإبهار, كما شاركت في العديد من المعارض الفنية وحصلت فيها على أوسكار وشهادات تقديرية منها معارض التي قد أقيمت ببرج القاهرة وقاعة الأهرام للفنون التشكيلية.
وفي حوار خاص تواصلت ” عالم النجوم” مع الفنانة التشكيلية إسراء حسنين, للحديث عن تفاصيل بداية اكتشافها لموهبة الرسم عن طريق بقايا الطعام والقهوة, والصعوبات التي كانت تواجهها أثناء ممارستها لتصميم اللوحات الفنية, بجانب معرفة أحلامها الكبيرة التي تسعى لتحقيقها في المستقبل, كما يلي:
كيف اكتشفتي موهبتك في الرسم عن طريق أدوات الطعام والقهوة ؟
الرسم بالأكل بدأت فيه من صغري كان عندي حتة إعاده تدوير أي شئ قدامي وبالأخص بواقي الطعام المتبقية مني كنت أحب أعمل بيها أشكال او أزوق الاكل ولما ماما لاحظت ده بدأت تجبلي اسكتشات وألوان وتشجعني, وفي حتة إعادة التدوير كنت مثلا أخد أطباق الفلين بتاع الجبنة واعملها برواز أو إزازة دواء أعملها فازه وهكذا بدأت اطور من نفسي ورسمي على مدار سنين تعليمي وكان المدرسين بيدعموني ويشجعوني لما لاحظوا موهبتي فضلت اتعلم أنواع كتير من الرسم لحد الجامعة لما ظهر الرسم الفعلي بالأكل وكان للأطفال لتشجعيهم على الأكل وظهور الرسم بالقهوه حبيته جدا بس وقتها مجربتوش فضلت كدا لحد بعد جامعة وكان التصوير من زمان بحبه بس بطبع العادة مكنش اي طفل عنده كاميرا أو فون وقتها فمكنتش مهتمية بيه لحد ما جيت في بداية الكورونا ٢٠٢٠ كانت ماما وقتها تعبانة ومبقدرش تهتم بالزرع اللي زرعاه على السطح وزعلت إنه بدأ يموت فأنا قررت إن هطلع أصوره ليها بشكل حلو وكان وقتها أول مره اصور الصور وعدتها و وريتها لماما وأهلي انبهروا بيها لدرجة فكروها من علي النت وشجعوني انزلها على الفيس ام نزلتها صحابي كلهم شجعوني أكمل تصوير وإن شغلي حلو فبدأت أعمل أفكار تصوير إبداعي وأعمل ثيمات تصوير وأكون الفكرة كاملة واصورها من ضمنهم عملت زي شط وعليه قواقع وكنز وعملت حاجة اسمها أفكار تصوير ابداعي ان نعمل حاجات كريتيف وكدا ف رسمت وقتها موتوسيكل بفشار ورسمت وجه شخص برز وكوبايات قهوة ورسمت كرة أرضية على بسكوته أوريو ورسمت كاميرا بلبن بودر ورسمت ولد وبنت نازلين من قمر بالبهارات كل دا مكنش في بالي ان استمر في المجال اصلا.
ما هي الصعوبات التي كانت تواجهكِ أثناء الرسم ؟
الصعوبة في فكرة رسمي كله صعب أنا برسم بحاجات مش تقليدية زي الألوان, مرة ارسم بشاي وقهوة ونسكافيه ومرة بستخلص اللون من مادته الأولية وأنا اللي بصنعه سواء من ميه بقدونس أو رمان أو هريسه شكه وهكذا في الصعوبه بتكون في كل الخامات وكل رسمة يعتبرها رحلة ومغامرة وأنا بقعد اكتشف فيها حاجات جديدة والتغلب على صعوبتها عشان أوصل لنهاية الرحلة, ومن ضمن الصعوبات لو هرسم بنوتيلا قوام النوتيلا صعب جدا التحكم فيه ومش سهل التعامل معاه ولازم تكنيك معين فين فيه بس عملت منها رسومات كتير بس أشهرهم رسمة عمر الشريف وفاتن حمامة, ومن أكتر الصعوبات اللي دايما بتواجهني هي النسكافيه لأنه في الأصل قهوة سريعه الذوبان وانا بستخدمه عشان أحدد الرسمة, أما أجي ألون بالقهوة والشاي وهما بيكون سايلين أول أما يحول علي النسكافيه يدوبه فعشان أتعاب على المشكله دي نوعا ما بقيت ادخل الرسومات الفرن لوقت معين وبطريقة معينة تخلي النسكافيه يمسك وميدوبش.
كم من الوقت تستغرقين في رسم صورة ؟
الوقت بيترواح علي حسب الصورة لو صغيرة ممكن تخلص في نفس اليوم, لو الصورة تفاصيلها كتير شوية تاخد حوالي 3 ايام انما لو الرسمه كبيرة من مقاس ٥٠في ٦٠ لـ ٧٠ في ١٠٠ الرسمة بتاخد أسبوع وممكن أكتر, وأكتر حاجه بتأثر على الوقت الخامات لازم تاخد وقتها على الورق عشان تمسك فيه قبل مبدأ تلوين إنما لو هعمل ماكت زي ماكت الحرم المكي ده بياخد وقت حوالي ٢٠ يوم, ولو أفكار تصوير بيتراوح بين يومين او 3 أيام زي فكرة محطة القطار بدبابيس الدباسة.
من هم أكثر الناس تشجيعاً لك في حياتك ؟
ماما أول حد شجعني لأني كنت أول حاجة بعملها بروح اوريها ليها وهي تقولي جميلة ويلا اعملي غيرها من صغري على كده ولحد النهاردة لو أي حد في البيت حاول يحبطني هي ال بتقف جمبي ويلهم اخواتي البنات الأكبر مني, وكل صحابي شجعوني ويعتبر من غيرهم مكنتش وصلت اللي أنا فيه.
ما هي الجوائز التي حصلتي عليها ؟
أنا مشاركتش في مسابقات قبل كدا بس شاركت في كذا معرض وخدت جوائز تكريمه كتير من ضمنهم شهادة تقدير في معرض لمسات, وأوسكار وشهادة تقدير في معرض لمسة فنان المقام في قاعة فنون في جريدة الأهرام, ودرع وميدالية وشهادتين في معرض خيال فنان وشهادتين من معرض رؤي عربية المقام ببرج القاهرة.
ما هي أحلامك الكبيرة التي تسعين لتحقيقها ؟
حلمي هو الإنتشار ونشر فني ورسمي في العالم من مشرقه لمغربه, حلم كبير بس مفيش حاجة كبيره على ربنا, كما يقال الحد الوحيد لحلمك هو خيالك وأنا خيالي واسع وبإذن الله هوصل فني للقمة و اللي بتمنى أحققه ف يوم من الايام ان أثبت نفسي لنفسي قبل العالم وأقدر اكفل نفسي بموهبتي معتمدش على حد وافتح معارض ليا ف جميع أنحاء العالم وان يتعرض رسمي ف أشهر معارض وان افتح وكاله بتضم أغرب انواع المواهب واغرب طرق الرسم واكون أنا الراعي لكل المواهب الناشئه واساعدهم يخرجو فنهم للعالم وفي النهاية هقول سأستمر في السعي حتي يمل السعي مني.
