الفنانة “رنا الهواري” تخرج عن صمتها وتبوح لعالم النجوم بـ سر إنفصالها عن المنتج “محمد مختار”
الفنانة “رنا الهواري” تخرج عن صمتها وتبوح لعالم النجوم بـ سر إنفصالها عن المنتج “محمد مختار”
حوار / آيه سالم
تعود الفنانة “رنا الهواري” زوجة المنتج الشهير “محمد مختار” بقوة إلى الساحة الفنية بعد غياب لوقت طويل في إطلالة جديدة و مميزة بعدسة الفوتوجرافر الصحفي “محمود مودي” الذي يتميز في إلتقاط الكادرات المميزة ، لتكشف عن سر إختفائها عن الساحة الفنية .
ما هو سر إختفاءك عن الساحة الفنية لفترة طويلة ؟
– بعدت لإني إتهاجمت كتير من الناس من داخل الوسط، من ناس متوقعتش منهم كده أبداً و كمان الناس خارج الوسط بداوا يبعتولي أسئلة تتضمن إتهامات زي أنتي ليه إتجوزتي حد أكبر منك ؟ أو أنتي إتجوزتي منتج علشان ينتجلك ؟ وبدأ كلام كتير فيه تجريح عن إبني و حسيت إني متلغبطة و مشتتة ما بين إني أبرر للناس و أدافع عن إبني و بيتي و ما بين إني أهتم بإبني فا فضلت أبعد لحد ما الناس تهدى و أستغل الوقت ده إني أكون موجودة جنب إبني في وقت هو محتاج لي فيه و الأمومة محتاجة شوية تضحية .
هل فعلاً فرق السن بينك و بين المنتج محمد مختار كان فيه مشكلة ؟
– أنا بالنسبالي عمري ما حسيت بفرق سن بيني و بين محمد لإن السن بالنسبالي شكل وروح و محمد أكتر إنسان بيهتم بشكله و رياضي و عنده طاقة إيجابية مش موجودة عند أي حد أصغر منه و ده إللي كان يهمني أنا، و على فكرة السن مجرد رقم يعني التفاهم أهم شئ و إحنا كفنانين عندنا رقي لأن الفنان بطبعه راقي فمسألة زي السن دي تفرق بس مع الناس إللي فكرها محدود إنما أحنا إللي بنوصل رسائل للناس مختلفة لازم نوصل ديماً إن الحب لا يعرف سن محددا .
كان لديكي فرصة أن تستغلي شهرة زوجك المنتج “محمد مختار” للوصول إلى الشهرة و لكي تصلي بشكل أسرع لماذا لم تستغلي هذا ؟
– فعلاً كان عندي فرصة و لو كنت طلبت من محمد أي شيء لمساعدتي فنياً مكنش هيتردد لحظة و ده كان واضح من تصريحاته في الوقت ده ، لكن أنا مش من النوع إللي يحب الشهرة على أكتاف أي حد زي ناس كتير عملوا كده، لو أنا كنت عايزة شهرة بالطريقة دي كنت إستغليت إسم عمتي نبيلة عبيد من غير محمد و من غير ما أتجوز زي ما الناس إتهمتني .
ما سر إنفصالك عن زوجك المنتج محمد مختار ؟
– تم الإنفصال بيني و بين محمد من سنتين تقريباً لكن علاقتنا متغيرتش أبداً بالعكس بقى فيه بينا رابط أقوى و أسمى و هو إني أم إبنه الوحيد و على طول مع بعض، علشان كده أنا حسيت إني لو صرحت بهذا الكلام الناس هتتكلم لكن آن الأوان إني أقول، لأني متصالحة جداً مع حياتي ، أما بالنسبة للسنين و العشرة و تمسك محمد بيا فده شئ عظيم لإنه هو الوحيد إللي عارف إن إللي بيني و بينه حب و بس و الان أصبح حب و عمر كمان الحمد لله” .
ما هي علاقة “عمر محمد مختار” ب إخوته من الفنانة “رانيا يوسف” ؟
– الحمد لله علاقة عمر بإخواته قوية جداً و بيتكلموا مع بعض فيديو بشكل يومي لإنهم شبه عايشين في إسبانيا بحكم الجامعات و الدراسة و لكن أول ما بيرجعوا مصر بييجوا على طول و بنقضي مع بعض إجازاتهم كلها و بنخرج و بنفضل مع بعض و بنعرف نعمل عيلة و دي أحسن حاجة في حياتي إني أحس إن عمر محظوظ إن له إخوات بيحبوه و بيهتموا بكل تفاصيله ، و الحقيقة أنا و رانيا علينا عامل كبير جداً و قدرنا نخلي الأولاد قريبين و بيحبوا بعض الحمد لله .
بعد كل هذا الإختفاء عن الساحة الفنية هل في أعمال الفترة المقبلة ل “رنا الهواري” ؟
– أكيد طبعاً 6 سنين كفاية جداً أنا قدمت رسالتي مع إبني في وقت كان صعب أثق في حد و خصوصاً إن مامي متوفية و كمان محمد مامته متوفية و حاسة إني عندي طاقة كبيرة جداً و في مشاريع قدامي في الفترة اللي جاية بقرأها و إن شاء الله أقدر أرجع للناس بالشكل إللي بتمناه .
