الفنان عادل شعبان وحوار خاص مع عالم النجوم
إعداد / نهى مرسي .. حوار / دعاء نصر
الممثل عادل شعبان هو من مواليد محافظة الإسكندرية أكمل حياته الدراسية حتى حصل على بكالوريوس تربية رياضية وماجستير إدارة عامة MPA ودبلوم NGO بكلية الإقتصاد والعلوم السياسية ودبلوم MOIS. ممثل مصري موهوب. يقوم بأداء أدوار متميزة في العديد من الأعمال الدرامية. سواء مسرح و تليفزيون وإذاعة وسينما يتميز بالقدر على التقمص لمختلف الشخصيات. ويتمتع بحضور وخفة ظل وصوت مميز.
بداية حديث الفنان القدير عادل شعبان .. بداية تحية تقدير واعزاز الاعلامية الاستاذة دعاء نصر. ولـ جريدة عالم النجوم مع تمنياتي الطيبة مع بداية تقدم والتوفيق والنجاح ان شاءالله. و اتمني ان اكون ضيف خفيف عليكم، من خلال رحلتي المتواضعة بين دروب حياتي الفنية.
طبعا الفنان عادل شعبان فنان ونجم كبير بس اتعرف اكثر والشهرة زادت ب ” للعدالة وجوه كثيرة ” كلمنا عن التجربة دي وعن اعمالك بصفة عامة ؟
للعدالة وجوه كثيرة مكنتش اولي الإطلالات على الشاشة يمكن على المستوى الاحترافي اه. و لكن سباقها عدة محاولات، وتجارب من خلال قناة اسكندرية المحلية. وانتاج درامي تقريبا بالجهود الذاتية. وسبقها تاريخ طويل في مجال المسرح، لسنين طويلة وأعداد كبيرة من العروض في نطاق اسكندرية. هو كان نطاق محدود والحقيقة مكنش يوجد وسائل انتشار وسائل السوشيال ميديا.
فكانت تعتمد على الجهود الذاتية ومجهود الفنانين، فإنهم يقومون عمل يوفروا جمهور ورغم كل المصاعد حقيقي. الحقيقة انا مفيش حد رشحني خالص للعدالة وجوه كثيرة. هيا كانت اجتهاد شخصي مني وتوجهت للاستوديو بالصدفة وقبلت الاستاذ محمد فاضل. و كنت سعيد ان بقابل مخرج كبير وعرفته بنفسي وقلت له ان انا اتمني ان اكون معاه في هذا العمل حتى. هو كان مستغرب جدا يعني انت مين يعني. لان انا كنت قبل كده مسافر خارج مصر لمدة تزيد عن 12 سنة ومكنتش اشتغلت احتراف قبل كده فبالتالي مكنش حد يعرفني. بس الاستاذ محمد فاضل كان مخرج عملاق يعني يمتلك الحاسة السادسة بالنسبة للممثلين ومن خلال حوار قصير.
هل كنت سعيد بعرض العمل في رمضان؟
طبعا كنت سعيد جدا بعرض العمل في رمضان الكلام ده كان سنة 2004 تقريبا وفي الوقت ده مكنش في فضائيات كتير. وكان الجمهور بيتلف حوالين الشاشة الصغيرة اللي كانت غنية بالانتاج الدرامي والفني فبالتالي العمل اتشاف انا كنت سعيد جدا طبعا بالانطباعات اللي جاتلي سواء من المحيطين به. أو من أقاربي يمكن اللي ميعرفنيش شخصيا مخدش باله ان انا اللي عملت الدور ده لان كانت لسه بداية الحكاية. ومكنش الدور كبير اوي لكن كان ليه بصمة ويمكن دي سياستي واهتمامي ان انا دايما اهتم باختيار الأدوار التي تترك بصمة مش اللي تعدي وتمر مرور الكرام فانا كنت سعيد جدا.
من هو مكتشف عادل شعبان؟
والله اللي اكتشف ان انا عندي موهبة تمثيل اصحابي واهلي والمحيطين بيا يعني كانوا دايما يكتشفوا ان انا فيه حاجة فوق العادي، بدايتي كانت في فرق الكشافة كنا بنعمل حفلات سمر من اسكتشات تمثيلية كنت أنا متميز جدا في ده وكنت بلمس يعني انطباع زملائي، وكانوا مبسوطين جدا ويمكن الاسكتشات دي كانت فيها جانب كوميدي فكنا بجيد تقديم هذه الاسكتشات وكنت بكارتها. كنت ساعات بخترع اسكتشات في البداية كانت لوحدي بعد كده بدات اضم ليه زملاء.
ممكن باللقاء الجميل دا تحدثنا عن الاعمال الأقرب لقلبك؟
اكثر عمل قريب لقلبي أعتقد حسن ومرقص لأنه كان بيجمع عملاقان الزعيم عادل امام ربنا يعطيه الصحة والمرحوم العالمي عمر الشريف ولحظي ان شغلي كان معاهم مشاهد صغيرة لكن كان لها تأثير كبير عليه وحتى على المشاهدين وحتى على الاستاذ عادل نفسه هو كمان يتمتع بذكاء كبير جدا ويتمتع برؤية الحقيقة وعنده حس عالي جدا وقدر يستكشف من اللي الممثل ومين اللي مش ممثل، فهو أبدي إعجابه الحقيقي بأدائي، وأثنى عليه وكذلك الفنان عمر الشريف الله يرحمه ويحسن إليه فأنا كنت سعيد جدا بالتجربة دي
مين اللي ساعد عادل شعبان لوصولة لـ النجومية؟
هو الحقيقة مفيش حد ساعدني بشكل مباشر، يمكن المساعدة اقدر اترجمها بمعني ايه ان يكون في تعاون اثناء التصوير ويكون مف نوع من الآنانية ويكون في نوع من الندية. ويكون في معنى العدالة فالحقيقة يمكن انا لمسته في ماجد المصري. شخصية رائعة جدا ومتصالح مع نفسه ومعندوش اي مشكلة ف ان اي حد يبقي كويس خالص. لان هو كويس اصلا فـ ماجد المصري أنا بحبه جدا وهاني رمزي.
ممكن تكلمنا عن تجربتك في الإختيار؟
الاختيار كانت تجربة عظيمة جدا بالنسبالي وفرصة رائعة وانا طبعا محظوظ إن كنت مشارك في هذا العمل وتشرفت بهذه الحقيقة لأن كان عمل وطني جميل ونال الإعجاب للعالم كله يعني مش على المستوى الوطن العربي بس لا ع مستوى الجاليات العربية الموجودة وده في كل أنحاء العالم وحقق نسبة مشاهدة رهيبة جدا ومسلسل الحقيقة كان صادق جدا، يمكن دوري في الاختيار كان يمثل خط موازي للعمليات العسكرية والحياة العسكرية وكنت بأيدي شخصية نوعية من الناس اللي هيا تهتم بمصالحها فقط.
ما هي وجهه نظرك في السوشيال ميديا بصفه عامة ؟
السوشيال ميديا من وجهة نظري هو سلاح خطير جدا. وممكن جدا يحقق انتشار ويحقق جماهيرية ولكنه للأسف غير صادق انا شايف اللي بينفع الفنان او اللي بيفيد الفنان هو عمله الفني، والذي يقدمه من الفن مش السوشيال ميديا، يمكن السوشيال ميديا سهولة استخدامها وسهولة انتشارها، وتقريبا بدون تكلفة ساعدت ناس كتير جدا انهم يحققوا الجماهيرية. ولكنهم الحقيقة مش فنانين مش كلهم فنانين يعني الفنان الحقيقي هو بيقدم أعمال.
لو حبيت تتكلم عن 2020 ممكن تقول ايه؟
2020 اجمل ماعجبني في هذا العام رقمة، انه رقم مميز 2020 الحقيقة هيا كلها ايام ربنا والحمد لله على كل حال طبعا كانت سنة كلها تحديات واعلام ومصاعد، ولكنها ايام الله، واكيد ربنا ليه حكمه في ده والحقيقة أظهرت لينا حاجات مكناش واخدين بالنا منها وأظهرت لينا ان الخروج من البيت نعمه من عند ربنا لما اتحبسنا في البيت شعورنا اد ايه ان احنا كنا في نعمة مكناش بنخرج وكان في حظر وكان في خوف وكان في هلع وفقدنا ناس وحبايب وقرايب.
